Yəməndə İranın dəstəklədiyi husilər Qırmızı dənizdə ticarət gəmilərinə hücumlarını davam etdirir. Husilər İsrailin Eylat limanına gedərkən hədəfə aldıqları Eternity C adlı gəminin tamamilə batdığını elan ediblər.
Gununsesi.info xarici mediaya istinadən xəbər verir ki, Liberiya bayraqlı “Eternity C” gəmisinin husilərin hücumundan sonra batdığı bildirilir.
Husi ordusunun sözçüsü Yəhya Seri video açıqlamada, “İşğal altındakı Fələstinin Umm əl-Reşraş limanına (Eilat) doğru hərəkət edən gəmi (Eternity C) pilotsuz qayıq və ballistik raketlə hədəf alındı” deyib.
Seri gəminin tamamilə batdığını və gəmi heyətinin bir qisminin tibbi yardım göstərildikdən sonra xilas edilərək təhlükəsiz yerə aparıldığını bildirib.
Eternity C gəmisində olan 25 nəfərdən 6-nın xilas edildiyi, onlardan 5-nin Filippin, 1-nin Hindistan vətəndaşı olduğu bildirilir.
Hücum nəticəsində 4 nəfərin öldüyü bildirilir. İtkin düşən 13 ekipaj üzvünün xilas edilməsi üçün xilasetmə işləri davam edir.
Husilərin həftənin əvvəlindən pilotsuz gəmilər və raketlərlə hücum etdiyi gəmini ekipajın bir gecədə tərk etdiyi bildirilir.
Qeyd edək ki, Husilər ən yaxınlarda Magic Seas gəmisini batırdılar və onun ekipajı Birləşmiş Ərəb Əmirlikləri tərəfindən xilas edildi.
Orxan
