Batıgöz Sağlamlıq Qrupu (Medco Hospital Group) və Pasha Investments arasında strateji əməkdaşlıq müqaviləsi imzalanıb. Razılaşmaya əsasən, ilkin mərhələdə Batıgöz-ün Bakı, Sumqayıt, Goranboy və Lənkəran şəhərlərində fəaliyyət göstərən filialları bu partnyorluğa daxil edilib.
2025-ci ilin sonuna qədər Tovuz və Zaqatalada açılması planlaşdırılan yeni klinikalar da əməkdaşlıq çərçivəsinə daxil ediləcək.
Qeyd edək ki, Batıgöz klinikalar şəbəkəsi, beynəlxalq tibbi idarəetmə şirkəti olan Medco Hospital Group-un tərkibinə daxildir. Peşəkar həkim komandası ilə çalışan Batıgöz hazırda 5 ölkədə 15 mərkəzlə fəaliyyət göstərir. Oftalmologiya sahəsində beynəlxalq miqyasda tanınan Batıgöz Sağlamlıq Qrupu eyni zamanda, ümumi tibbin müxtəlif istiqamətləri üzrə də müayinə, müalicə və cərrahi əməliyyatlar üzrə ixtisaslaşıb. Bütün klinikalar ən müasir texnologiyalarla təchiz olunmuş, beynəlxalq tibbi standartlara uyğun infrastruktur və pasiyent yönümlü xidmət modeli ilə fərqlənir.
Tərəfdaşlığın əsas məqsədi yalnız oftalmoloji və ümumi tibbi xidmətlərin keyfiyyətini yüksəltmək deyil, həmçinin tibbi sahədə investisiya dayanıqlığını təmin etmək, yerli və regional miqyasda sağlamlıq xidmətlərinin əlçatanlığını artırmaq və xidmət coğrafiyasını genişləndirməkdir. Belə ki, imzalanmış razılaşmaya əsasən, növbəti mərhələdə Mərkəzi Asiya və MDB ölkələrində yeni Batıgöz filiallarının açılması planlaşdırılır.
Bu strateji əməkdaşlıq, Azərbaycanın səhiyyə sektoruna yönəlmiş dayanıqlı və məqsədyönlü investisiya fəaliyyətinin nümunəsi olmaqla yanaşı, Batıgöz-ün beynəlxalq mövqeyinin daha da möhkəmlənməsinə şərait yaradır.
Eyni zamanda bu təşəbbüs, ölkəmizdə Prezident İlham Əliyevin rəhbərliyi ilə həyata keçirilən sosial siyasətin – xüsusilə vətəndaşlara keyfiyyətli və əlçatan tibbi xidmətlərin təmin olunmasına yönəlmiş strategiyanın tərkib hissəsi kimi qiymətləndirilə bilər. Dövlətin səhiyyə sahəsinə göstərdiyi davamlı diqqət və dəstək, özəl sektorun da bu istiqamətdə məsuliyyətli və sistemli fəaliyyətinə zəmin yaradır.
Pasha Investments şirkətinin bir parçası olaraq, ölkəmizin səhiyyə sisteminin inkişafı yolunda bu strateji əməkdaşlığı birlikdə həyata keçirməkdən qürur duyuruq.
