İsrail-İran müharibəsi də rəqəmsal cəbhəyə keçdi. Saxta xəbərdarlıqlar, rəqəmsal sui-qəsd əməliyyatları və kiberhücumların 700% artması müharibənin indi görünməz cəbhədə aparıldığını sübut edir.
Gununsesi.info xarici mediaya istinadən xəbər verir ki, İsrail və İran arasında beşinci günə qədəm qoyan qarşıdurmada təkcə raket və hava hücumları deyil, rəqəmsal hücumlar da səhnədədir.
Son hadisələr göstərir ki, müharibə artıq kiber və psixoloji ölçülərə keçib.
Bu yaxınlarda İsrailin Milli Kiber Müdirliyi ölkə daxilində vətəndaşların telefonlarına saxta təcili mesajlar göndərildiyini açıqladı.
Hökumətin “Oref Alert” sistemini təqlid edərək göndərilən bu mesajlarda “Sığınacaqlarda terror aktı ehtimalı var. Növbəti xəbərdarlığa qədər sığınacaqlarda qalmaqdan çəkinin” ifadələri yer alıb.
Səlahiyyətlilər bu mesajların ictimai çaxnaşma yaratmaq məqsədi daşıyan psixoloji əməliyyatın bir hissəsi olduğunu və onların İrana bağlı qruplar tərəfindən sızdırıldığını iddia edib.
İsrailin İranda onlarla əsas fiqurunu qətlə yetirməsi İsrail kəşfiyyatına diqqət çəkib.
“Unit 8200” adlı elektron kəşfiyyat qrupunun İrandakı sui-qəsdlərdə əsas rol oynadığı bildirilir.
Bu kəşfiyyat bölməsi rəqəmsal hücumlara da cavab verə bilər.
İranı hədəf alan yüksək səviyyəli sui-qəsdlər üçün kəşfiyyat məlumatlarının İsrail kəşfiyyat təşkilatının gizli elementi olan “Unit 8200” tərəfindən toplandığı iddia edilib.
Ötən il Tehranda qətlə yetirilən Həmas lideri İsmayıl Haniyənin monitorinqində və Hizbullahın peycerlərinin partladılmasında da rol oynayan bölmənin həmçinin 20 yüksək rütbəli iranlı komandirin öldürülməsinə və 14 nüvə alimin ünvanının müəyyən edilməsinə kömək etdiyi bildirilir.
Orxan
