Vyetnam 1988-ci ildən qüvvədə olan iki uşaq siyasətinə son qoymaq qərarına gəlib.
Gununsesi.info xarici mediaya istinadən xəbər verir ki, Cənubi Asiya ölkəsi Vyetnam insanların ikidən çox uşaq sahibi olmasını qadağan edən siyasəti ləğv etmək qərarına gəlib.
Bloomberg xəbər saytının məlumatına görə, paytaxt Hanoyda Vyetnam Milli Assambleyasının Daimi Komitəsi tərəfindən bu gün təsdiqlənən yeni hüquqi tənzimləmə cütlüklərə nə vaxt uşaq sahibi olacaqlarına, neçə uşaq sahibi olacaqlarına və uşaqları arasında nə qədər yaş fərqinin olacağına qərar vermək hüququ verir.
Əvvəllər qüvvədə olan qanun “xüsusi hallar” istisna olmaqla, hər ailədə bir və ya iki uşağa icazə verirdi. Qanun Vyetnam Sosialist Respublikasının qurucusu və yeganə qanuni partiyası olan Vyetnam Kommunist Partiyasının üzvü olmayan şəxslərə çox nadir hallarda şamil edilsə də, partiya üzvləri qanunu pozduqları təqdirdə xəbərdarlıq ala, mükafatlarını azalda və ya tutduqları vəzifələrdən uzaqlaşdırıla bilərdilər.
1988-ci ildə, bu uşaq məhdudiyyəti ilk dəfə tətbiq ediləndə ölkədə ümumi doğuş səviyyəsi qadın başına dörd doğuşdan yuxarı idi. Vyetnamda doğum səviyyəsi 2024-cü ilin dekabrında ən aşağı nöqtəyə çatıb. Dekabrda qeydə alınan doğum nisbəti hər qadına 1,91 uşaq olub. Bu həm də o demək idi ki, ölkədə doğum nisbəti ardıcıl üçüncü ildir ki, “özünü yeniləmə sürətindən” aşağı düşüb.
Vyetnam Səhiyyə Nazirliyi keçən il qanuna dəyişikliklər təklif etmişdi. Təklif olunan dəyişiklik cütlərə və ya valideynlərə neçə uşaq sahibi olacağına və onların yaş aralığına qərar verməyə imkan verəcək.
Orxan
