Ukraynanın Rusiyanın bombardmançı donanmasına qarşı genişmiqyaslı əməliyyatı bütün dünyada onun hava bazalarının zəifliklərini üzə çıxarıb. Ukraynanın bu əməliyyatı artıq müharibə tarixinə taktiki və psixoloji dönüş nöqtəsi kimi yazılıb.
Gununsesi.info xarici mediaya istinadən xəbər verir ki, 7 dekabr 1941-ci ildə Yaponiya İmperator Donanması ABŞ-ın “alınmaz qala” adlandırdığı Havay adalarına qəfil hücum etdi.
Altı təyyarədaşıyandan buraxılan Yapon döyüş təyyarələri Pearl Harborda yerləşən səkkiz döyüş gəmisini, 328 təyyarəni və 19 dəniz gəmisini məhv edib və ya sıradan çıxarıb.
Bu hücum təkcə ABŞ-ı İkinci Dünya Müharibəsinə gətirmədi, o, dəniz müharibəsində təyyarədaşıyanların mütləq üstünlüyünü elan etdi. Həmin gün müharibə qaydaları dəyişdi.
Tarix bir daha təkrarlandı və 2025-ci ilin bazar günü səhəri ukraynalılar bu dəfə müharibə qaydalarını pozdular.
Ukraynanın SBU kəşfiyyat agentliyinin istiqamətləndirdiyi irimiqyaslı pilotsuz təyyarə hücumunda Rusiyanın dərinliklərində, cəbhə xəttindən minlərlə kilometr uzaqlıqda yerləşən beş ayrı hava bazası hədəfə alınıb.
Onlardan ikisi Rusiyanın Uzaq Şimalında və Sibirdə yerləşirdi.
Rus komandirləri öz ərazilərindən “məsafə” anlayışına zireh kimi baxdıqları kimi, Amerika strateqləri də Pearl Harborun təhlükəsizliyini həddən artıq qiymətləndirdilər.
Bununla belə, Ukrayna kamuflyajlı yük maşınlarında daşınan mobil buraxılış sistemləri sayəsində dronları Rusiyanın ürəyinə yerləşdirməyi bacarıb.
Atışlar uzaqdan həyata keçirilib və hədəflər tam dəqiqliklə vurulub.
Ukrayna prezidenti Vladimir Zelenski deyib ki, hakimiyyətin “Hörümçək toru əməliyyatı” adlandırdığı zərbə Rusiya bombardmançılarının üçdə birini məhv edib və ya sıradan çıxarıb.
Zelenskinin açıqlamasına görə, hədəfə alınan təyyarələr arasında Tu-95 və Tu-22 tipli strateji bombardmançı təyyarələr, həmçinin ABŞ-nin AWACS sisteminə bənzər imkanlara malik A-50 havadan erkən xəbərdarlıq və nəzarət təyyarələri olub.
Rusiyalı hərbi bloggerlər əməliyyatı 84 il əvvəl Pearl Harbora edilən hücumla müqayisə ediblər.
“Washington Post”un fikrincə, bu bənzətmə məntiqli ola bilər, çünki hər iki hücum bir vaxtlar üstünlük təşkil edən silah sistemlərinin köhnəlməsindən xəbər verir: 1941-ci ildə döyüş gəmiləri, indiki pilotlu təyyarələr.
Ümumilikdə, inşası on minlərlə dollara başa gələn dron dəstəsi Rusiyanın ən qabaqcıl təyyarələrinə 2 milyard dollar dəyərində ziyan vurmuş ola bilər.
Pilotsuz təyyarə zərbəsi strateji riskləri artırsa və qaçılmaz olaraq Rusiyanın qisas almasına səbəb olsa da, bu, Putini ciddi danışıqlara məcbur etmək üçün lazım olan yüksək təzyiq taktikasını da təmsil edir.
Üstəlik, bu hücum Türkiyədə tərəflərin yenidən danışıqlar masasına oturmağa hazırlaşdığı bir vaxta təsadüf edir.
Hərbi analitiklərin fikrincə, bu əməliyyatla ukraynalılar təslim olmaqdan imtina etdiklərini və döyüşü davam etdirmək üçün həm əzmkarlığa, həm də gücə malik olduqlarını açıq şəkildə göstərirlər.
Orxan
