တရုတ်နိုင်ငံ၊ ဘေဂျင်းမြိုတော်မှာ လူတူစက်ရုပ်တွေချည်း သီးသန့် ယှဉ်ပြိုင်တဲ့ ဘောလုံးပွဲ တစ်ခုကို ကျင်းပခဲ့ပါတယ်။
ပြီးခဲ့တဲ့ သီတင်းပတ်ကုန်က ၄ သင်း ယှဉ်ပြိုင်တဲ့ ပြိုင်ပွဲမှာ စက်ရုပ်တွေကို လူသားထိန်းချုပ်မှု မပါဘဲ ဉာဏ်ရည်တု (AI) နည်းပညာ သီးသန့်နဲ့ ကိုယ်တိုင် ဆုံးဖြတ်ပိုင်ခွင့် ပြုထားတာပါ။ အဲဒီလို AI သီးသန့်နဲ့ ယှဉ်ပြိုင်တဲ့ စက်ရုပ် ဘောလုံးပြိုင်ပွဲဟာ ကမ္ဘာပေါ်မှာ ပထမဆုံး ဖြစ်တယ်လို ပွဲစီစဉ်သူတွေက ကြွေးကြော်ထားပါတယ်။
တစ်ဖက်ကို စက်ရုပ် ၃ ရုပ်စီ ယှဉ်ပြိုင်ကြရတာဖြစ်ပြီး စက်ရုပ်တွေမှာ နည်းပညာမြင့် အာရုံခံ ကိရိယာတွေနဲ့ AI အထောက်အပံ့ ပစ္စည်းတွေ တပ်ဆင်ပေးထားပါတယ်။ အဲဒီ နည်းပညာတွေ၊ ကိရိယာတွေ ဘောလုံးရဲ့ ရွေ့လျားပုံကို ထောက်လှမ်း သိရှိနိုင်စေပြီး ကွင်းထဲမှာ အသင့်တော်ဆုံးဖြစ်အောင် ရွေ့လျား ကစားဖို စက်ရုပ်တွေကို ကူညီပေးပါတယ်။
စက်ရုပ်တစ်ရုပ် လဲကျသွားရင် ကိုယ့်ဖာသာ ပြန်ထနိုင်အောင်လည်း စီစဉ်ပေးထားပါတယ်။ ဒါပေမဲ့လည်း အဲဒီ စနစ်ကတော့ သိပ်ပြီး အလုပ်ဖြစ်ခဲ့ပုံ မပေါ်ဘဲ ပြိုင်ပွဲတလျှောက်မှာ တချိုစက်ရုပ်တွေကို လူသားဝန်ထမ်းတွေက ထမ်းစင်နဲ့ ထုတ်ယူသွားရတာ တွေ့ရပါတယ်။ အဲဒီမြင်ကွင်းကို ပရိသတ်တွေကလည်း ပွဲကျနေခဲ့ပါတယ်။
Public Service Announcement
တရုတ်ဟာ AI နည်းပညာ အထောက်အပံ့ပါတဲ့ လူတူစက်ရုပ်တွေကို အဆင့်မြှင့်တင် ထုတ်လုပ်နိုင်ဖို အားထုတ်နေတဲ့ နိုင်ငံတစ်ခုပါ။ အဲဒီ နည်းပညာ တိုးတက်မှုကို အားပေးဖိုအတွက် အာဏာပိုင်တွေက မာရသွန်၊ လက်ဝှေ့၊ ဘောလုံးစတဲ့ အားကစား ပြိုင်ပွဲတွေကိုလည်း ကျင်းပပေးနေပါတယ်။
အခုပြိုင်ပွဲရဲ့ ဗိုလ်လုပွဲစဉ်မှာတော့ ဆင်ဟွားတက္ကသိုလ်ရဲ့ THU စက်ရုပ်အသင်းဟာ တရုတ် စိုက်ပျိုးရေး တက္ကသိုလ်ရဲ့ တောင်ပင်လယ် စက်ရုပ်အသင်းကို ၅ ဂိုး – ၃ ဂိုးနဲ့ အနိုင်ယူပြီး ချန်ပီယံ ဖြစ်သွားခဲ့ကြောင်း သိရပါတယ်။
ကိုးကား: AP
