တရုတ်ကမြန်မာစစ်တပ်အတွက် သယ်ယူပို့ဆောင်ရေးလေယာဥ်နှစ်စီး ထပ်မံလွှဲပြောင်းဖို့ ရှိနေ

ဇွန်-၂၃၊ ၂၀၂၅။ People’s Spring

တရုတ်နိုင်ငံဟာမြန်မာစစ်တပ်ကိုသယ်ယူပို့ဆောင်ရေးလေယာဥ်နှစ်စီးကိုထပ်မံလွှဲပြောင်းဖို့ရှိနေတယ်လို့ သိရပါတယ်။

အချက်အလက်စုဆောင်းရှာဖွေရေးအဖွဲ့ Myanmar Witness က မြန်မာလေတပ်(MAF)မှာ မကြာခင်အသုံးပြုတော့မယ်လို့ ယူဆရတဲ့ လေယာဥ်နှစ်စင်းကို တရုတ်နိုင်ငံ၊ ကူမင်းအပြည်ပြည်ဆိုင်ရာလေဆိပ်မှာ ရှာဖွေတွေ့ရှိခဲ့တာပါ။

အဲဒီလေယာဉ်နှစ်စင်းဟာအသစ်ဖြစ်ပြီး MAF နာမည် တပ်မတော်(လေ)လို့ ရေးသားထားပြီး အရင်ကမရှိဖူးတဲ့ အမြီးနံပါတ်တွေကိုတွေ့ရတယ်လို့ Myanmar Witness က ဓါတ်ပုံနဲတကွဖော်ပြပါတယ်။

Public Service Announcement

Shaanxi Y-8F-200Wနည်းဗျူဟာမြောက်သယ်ယူပို့ဆောင်ရေးလေယာဉ်နှစ်စင်းဖြစ်တဲ့အမြီးနံပါတ် 5923 နဲ့ 5924 တို့ကို တရုတ်နိုင်ငံ ကူမင်းအပြည်ပြည်ဆိုင်ရာလေဆိပ်ရှိ နေရာတစ်ခုမှာ Myanmar Witness က ရှာဖွေတွေ့ရှိခဲ့ပါတယ်။

မြန်မာစစ်တပ်ဟာ မကြာသေးမီက မိတ်ဆက်ခဲ့တဲ့ Y-8F-200W အမြီးနံပါတ် 5922 ကို ၂၀၂၄ ခုနှစ် ဒီဇင်ဘာမှာ စတင်အသုံးပြုခဲ့တယ်လို့ သိရပါတယ်။

အဲဒါကြောင်း စစ်တပ်ရဲ့ လေတပ်(MAF)ဟာ စစ်ဘက်လေယာဉ်တွေနဲ့ပတ်သက်လို့ ဝန်ဆောင်နိုင်စွမ်းနဲ့ ဘက်စုံအသုံးပြုနိုင်မှုအတွက်အထူးအလေးသာတဲ့ Y-8 လေယာဉ်တွေကို ဆက်လက်တိုးချဲ့အသုံးပြုလျှက်ရှိကြောင်း တွေ့ရှိရတယ်လို့ Myanmar Witness က သုံးသပ်ပါတယ်။

အဲဒီ Y-8 နောက်ထပ်လေယာဉ်တွေ ရောက်ရှိလာခြင်းဟာ စစ်တပ်ရဲ့လေတပ်အတွက် ထောက်ပံ့ပို့ဆောင်ရေးနဲ့ လည်ပတ်နိုင်မှုစွမ်းရည်ကို တိုးပွားစေဖို့ ဖြစ်တယ်လို့လည်း သုံးသပ်ထားပါတယ်။

လက်ရှိမှာ စစ်ကောင်စီဟာလေကြောင်းအင်အားကို အဓိကထားပြီး တော်လှန်ရေးတပ်ဖွဲ့များကို ဖိအားပေးတိုက်ခိုက်နေတာကို တွေ့ရပြီး စစ်တပ်ရဲ့လေကြောင်းတိုက်ခိုက်မှုတွေမှာအပေါ့စားတိုက်

ခိုက်ရေးလေယာဥ်တွေဖြစ်တဲ့ Yak-130၊ K-8 နဲ့ FTC-2000G လေယာဥ်တွေကို အဓိက အသုံးပြုနေသလို JF-17၊ MiG-29 နဲ့ F-7 တိုက်လေယာဥ်တွေကိုလည်း အသုံးပြုတိုက်ခိုက်နေတယ်လို့ မြန်မာ့စစ်ဘက်ရေးရာနဲ့ လုံခြုံရေးဆိုင်ရာလေ့လာရေးအဖွဲ့(MDSI)က ပြီးခဲ့တဲ့မေလကုန်ပိုင်းက အစီရင်ခံစာထုတ်ပြန် သုံးသပ်ထားပါတယ်။

ရုရှားထုတ် SU 30 နဲ့ MiG-29 လို ​ခေတ်မီတိုက်လေယာဥ်တွေကို​တော့ အရေးကြီးစစ်ရေးပစ်မှတ်နဲ့စစ်ဆင်​ရေး​တွေမှာ အသုံးပြုတာများတယ်လို့ MDSI ကသုံးသပ်ပါတယ် ။​စစ်​ကောင်စီတပ်မှာ တိုက်​လေယာဥ် ၊ရဟတ်ယာဥ်အစီး​ရေ ၂၀၀ ​ကျော်ရှိပြီး​တော့ ​လေတပ်စခန်း ၈ ခုမှာ တိုက်လေယာဥ်၊ရဟတ်ယာဥ်တွေ အမြန်တိုက်ခိုက်နိုင်ဖို့ ဖြန့်ခွဲချထားတယ်လို့ MDSI ရဲ့အစီရင်ခံစာမှာ ဖော်ပြထားပါတယ်။ အစီး ၂၀၀ ​ကျော်ထဲမှာ ​ဟောင်းနွမ်းတဲ့ ​လေယာဥ် ၊ရဟတ်ယာဥ်ဘယ်​လောက်ရှိတယ်ဆိုတာနဲ့ အသုံးပြုလို့ရတဲ့ အစီး​ရေဘယ်​လောက်ရှိတယ်ဆိုတာကို​တော့မသိရ​သေးပါဘူး။

စစ်အာဏာသိမ်းပြီးနောက်ပိုင်းတော်လှန်ရေးဖွဲ့တွေကစစ်ကောင်စီတပ်ရဲ့ တိုက်လေယာဥ်နဲ့ ရဟတ်ယာဥ် အနည်းဆုံး ၁၂စီးကို ပစ်ချနိုင်ခဲ့ပါတယ်။

ဒါအပြင် စစ်တပ်အာဏာသိမ်းပြီး​နောက်ပိုင်း ပျက်ကျတဲ့ ​လေယာဥ် ၊ရဟန်ယာဥ် အနည်းဆုံး ၇ စီးရှိပါတယ် ။