■ စစ်သားအလောင်း ၈ လောင်းတွေ့ပြီး လက်နက်ခဲယမ်းများရ
“ရန်သူကို ရန်သူလိုပဲ ဆက်ဆံမယ်။ အဲဒီမတိုင်ခင်မှာ သူတို့တွေအမြန်ဆုံးလက်နက်ချပါ အလင်းဝင်ပါ”
− အထူးကွန်မန်ဒိုတပ်ရင်း တာဝန်ရှိသူ
ဇွန်-၁၅၊၂၀၂၅။ထားမြတ်/People’s Spring
ပဲခူးတိုင်းကျောက်ကြီးမြို့နယ်၊အုန်းပင်စုရွာအခြေစိုက် စစ်ကောင်စီတပ်စခန်းကို တော်လှန်ရေးပူးပေါင်းတပ်က တိုက်ခိုက်သိမ်းပိုက်ခဲ့ရာ စစ်ကောင်စီဘက်က သေဆုံးထိခိုက်ရှိခဲ့ပြီး လက်နက်ခဲယမ်းများ သိမ်းရခဲ့ကြောင်း ပြည်သူ့ကာကွယ်ရေးတပ်မတော်(PDF) အထူးကွန်မန်ဒိုတပ်ရင်း P29914က ယနေ့ သတင်းထုတ်ပြန်သည်။
အုန်းပင်စုရွာတွင်အထိုင်ချတပ်စွဲထားသော အင်အား (၃၀)ကျော်ရှိ စစ်ကောင်စီတပ်အား ဇွန်လ ၆ ရက်တွင် ကရင်အမျိုးသားလွတ်မြောက်ရေးတပ်မတော်(KNLA) တပ်ရင်း(၈)၊ တပ်ရင်း(၉)၊ အာဠာဝကစစ်ကြောင်း ၊ ၃၇၀၂တပ်ရင်း ၊ရန်ကုန် ပကဖ ၊ဧရာဝတီပကဖ တို့ နှင့် အတူ ပူးပေါင်းတိုက်ခိုက်ခဲ့ခြင်းဖြစ်ကြောင်း အထူးကွန်မန်ဒိုတပ်ရင်း P29914 က အသိပေးသည်။
Public Service Announcement
တိုက်ပွဲအစတွင်အပြန်အလှန်ပစ်ခတ်မှုရှိသော်လည်းနောက်ပိုင်းတွင် စစ်သားများ ထွက်ပြေးသွားဟုအထူးကွန်မန်ဒိုတပ်ရင်းတာဝန်ရှိသူက ပြောသည်။
“စစ်ရေးအခြေအနေကတော့အပြန်အလှန်တင်းမာနေတဲ့အခြေအနေပေါ့။ လက်ရှိမှာတော့ သိမ်းပိုက်ရရှိခဲ့တဲ့နေရာကိုတော့ ကျနော်တို့ အပြီးအပိုင်ထိန်းချုပ်လိုက်ပြီပေါ့နော်” ဟု အဆိုပါ တာဝန်ရှိသူက ပြောသည်။
အုန်းပင်စုရွာတိုက်ပွဲတွင်နတ်သံကွင်းမြို့နှင့် ကျောက်ကြီးမြို့ရှိ စစ်စခန်းများမှ လက်နက်ကြီးများဖြင့် ပစ်ကူပေးခဲ့ကြောင်း၊ တိုက်ပွဲအတွင်း ရန်သူအလောင်း (၈)လောင်းတွေ့ရှိခဲ့ပြီး ဒဏ်ရာရသူ အများအပြား ရှိနိုင်ကြောင်း ထုတ်ပြန်သည်။
တော်လှန်ရေး ပူးပေါင်းတပ်ဖွဲ့မှရဲဘော်၄ဦးဒဏ်ရာရရှိခဲ့ဟု အသိပေးသည်။
တိုက်ပွဲအတွင်း RPG 7 – ၁လက်၊ MA11 – ၁ လက်၊ G3 ကျည် – ၅၈၀ တောင့်၊ ၄၀မမ -၁၀လုံး၊ RPG ပိုယမ်း၁၁ခု၊ RPG အသီး၉ လုံး၊ MA ခွင်းဗုံး ၇ လုံး၊ ၊ လက်ပစ်ဗုံး၅လုံး၊ ၁၄မိုင်း ၇လုံး၊ ရှေ့ထွက်မိုင်း၃လုံး၊ MA ကျည်ဘောက် ၃ဘောက်၊ မိုင်းရှာစက် – (၁)လုံး စစ်အသုံးဆောင်ပစ္စည်းများသိမ်းဆည်းရရှိခဲ့ဟု ဖော်ပြသည်။
ဒေသတွင်း စစ်ရေး အခြေအနေမှာ စစ်ကောင်စီဘက်က ပြန်လည်ထိုးဖောက်ရန် ပြင်ဆင်နေသကဲ့သို့ လက်နက်ကြီးများဖြင့်လည်း အမြဲတမ်းလိုလို ပစ်ခတ်ပြီး လေကြောင်း လာရောက်မှုလည်းရှိသည်ဟု အထူးကွန်မန်ဒိုတပ်ရင်းတာဝန်ရှိသူက ပြောသည်။စစ်ရေး ပိုပြင်းလာမည့် အလားအလာရှိ၍ ပြည်သူများ ဘေးလွတ်ရာ တိမ်းရှောင်စေလိုကြောင်း ၎င်းက ပြောသည်။
ယခုနောက်ပိုင်းတွင် စစ်ကောင်စီတပ်က ပြည်သူ့စစ်မှုထမ်း တပ်သားသစ်များကို ပိုမိုအသုံးပြုလာကြောင်း၊ ယခင်တိုက်ပွဲများ၌ နယ်မြေများရယူရာတွင် တိုက်ခိုက်ရသည်မှာခဲယဉ်းသော်လည်း ယခုအခါ ယခင်ကဲ့သို့ ခဲရာခဲစစ် တိုက်ယူရသည့် အခြေအနေမျိုးမရှိတော့ဟု အထူးကွန်မန်ဒိုတပ်ရင်း တာဝန်ရှိသူက ပြောသည်။
“ဘာကြောင့်လဲဆိုသူတို့ကပြည်သူ့စစ်တွေကို အများအပြားသုံးလာတယ်။ တကယ်စစ်ရေးအတွေ့အကြုံရှိတဲ့သူတွေပါတယ်ဆိုရင်လည်း အများဆုံးမှ တယောက်နှစ်ယောက်အပြင် ပိုမပါတဲ့အတွက်ပြည်သူ့စစ်တွေချည်းပဲဖြစ်နေတဲ့အတွက် တိုက်ခိုက်တဲ့နေရာမှာ အလွယ်တကူပဲ စခန်းတွေကို ကျနော်တို့က ရရှိတဲ့အနေအထားမှာရှိပါတယ်”ဟု အထူးကွန်မန်ဒို တပ်ရင်းတာဝန်ရှိသူကပြောသည်။
ပြည်သူ့စစ်မှုထမ်းများအပါအဝင် စစ်ကောင်စီ တပ်သားများ အနေဖြင့်တိုက်ပွဲမဖြစ်မီ လက်နက်ချ အလင်းဝင်ရန် လိုအပ်ကြောင်းလည်း ၎င်းက သတိပေးသည်။
“ပြည်သူ့စစ်တွေ စစ်မှုထမ်းတွေအနေနဲ့တော့ကျနော်တို့ကတော့ ရန်သူကို ရန်သူလိုပဲ ဆက်ဆံမယ်။ အဲဒီမတိုင်ခင်မှာ သူတို့တွေအမြန်ဆုံးလက်နက်ချပါ အလင်းဝင်ပါ” ဟုအထက်ပါတာဝန်ရှိသူက ပြောသည်။
