ဇွန်-၁၀၊၂၀၂၅။ထားမြတ်/People’s Spring
ကရင်အမျိုးသားအစည်းအရုံး(KNU)တပ်မဟာ(၆)နယ်မြေ၊မြဝတီမြို့တောင်ဘက် မြန်မာ-ထိုင်းနယ်စပ်ရှိ လက်ကျန်စခန်းများကို စနိုက်ပါ၊ ဒရုန်းများ အသုံးပြု၍ နေ့စဥ် တိုက်ခိုက်နေကြောင်း KNU သတင်းရင်းမြစ်ကပြောသည်။
KNU တပ်မဟာ(၆)နယ်မြေရှိ ဘလယ်ဒို၊ ကနဲလေး၊ သေ့ဘောဘိုး စခန်းများ အပါအဝင် စစ်ကောင်စီတပ်စခန်းများကို မေလ နောက်ဆုံးပတ်နှင့် ဇွန်လဆန်းတွင် ဆက်တိုက်ထိုးစစ်ဆင်သိမ်းပိုက်ခဲ့သည်။ ထို့နောက် ဝေါ်လေ၊ ဥကရစ်ထ၊ ထီးကပလယ်စခန်းများအပါအဝင် စစ်တပ်စခန်း ၄ခုသာ ကျန်တော့သည့် အခြေအနေတွင် လက်ကျန်စခန်းများကိုဆက်လက်တိုက်ခိုက်နေခြင်းဖြစ်သည်ဟုသိရသည်။
“ထီးကပလယ်တော့ ထိုးတာကြာပြီ။ နည်းနည်း နည်းနည်းလေ။အခုက ကိုယ့်လူမထိအောင် နည်းနည်းနည်းနည်း ထိုးလာတာကြာပြီ။” ဟု KNU သတင်းရင်းမြစ်က ပြောသည်။ စခန်းသိမ်းပိုက်နိုင်ရေး တက်ရောက်တိုက်ခိုက်သည့် ပုံစံမဟုတ်ဘဲ စစ်ကောင်စီတပ်စခန်းကို ဒရုန်း၊ စနိုက်ပါ အသုံးပြုပြီးတိုက်ခိုက်နေခြင်းဖြစ်သည်ဟုဆိုသည်။
Public Service Announcement
ထီးကပလယ်တွင် စစ်ကောင်စီ၏ အမှတ် ၃၂ ခြေလျင်တပ်ရင်း( ခလရ ၃၂) နှင့် အမှတ် ၅၈၅ ခြေမြန်တပ်ရင်း (ခမရ ၅၈၅) တပ်တို့ အခြေချနေ တပ်စွဲ ထားသောစခန်းဖြစ်သည်။
“ထီးကပလယ် မကဘူး တခြားစခန်းမှာလည်းတရစ်ပြီးတရစ်ပဲ။ဝေါ်လေတို့ ဥကရစ်ထတို့မှာလည်း အဲဒီလိုပဲ။ သူများမတက်ဘူး သူများအဲဒီလိုချဉ်း
ကပ်ပြီးတော့ သူတို့ စစ်ကူမလာနိုင်တဲ့အခါကျတော့ စနိုင်ပါနဲ့ဘာနဲ့ အဲဒီလိုပဲတိုက်နေတာပေါ့။စစ်ဆင်တာဆို အကုန်လုံး စစ်ဆင်တာပဲလို့ ပြောလို့ရတယ်။ ဝုန်းကနဲ တက်သိမ်းတာတော့ မဟုတ်ဘူး။ အဲဒီနည်းက ကိုယ့်လူလည်းမနာအောင် ဟိုဘက်ကလည်း မခံနိုင်အောင် အဲဒါပဲ” ဟု KNU သတင်းရင်းမြစ်က ပြောသည်။
KNU နှင့် တော်လှန်ရေး ပူးပေါင်းတပ်အနေဖြင့် ယခု ၂၀၂၅ အတွင်း နယ်စပ်စခန်းများအားလုံးသိမ်းပိုက်နိုင်ရေးအတွက် ရည်မှန်းထားကြောင်းလည်း ၎င်းကပြောသည်။
KNU အနေဖြင့် တပ်မဟာ နှင့်ခရိုင် ၇ခုရှိရာ ခရိုင်၊ တပ်မဟာ အသီးသီးတွင် စစ်ရေးတိုးမြှင့်လုပ်လျက်ရှိသည်။ တပ်မဟာ(၇)၊ တပ်မဟာ(၄)၊ တပ်မဟာ(၅)၊ တပ်မဟာ(၆)နယ်မြေများ ရှိ စစ်ကောင်စီတပ်စခန်းများစွာကို ယခုနှစ်အတွင်း တိုက်ခိုက်သိမ်းပိုက်ခဲ့သည်။
စခန်းသိမ်းတိုက်ပွဲများအတွင်း စစ်ကောင်စီထံမှ လက်နက်ခဲယမ်းများစွာရရှိခဲ့ပြီးစစ်သုံ့ပမ်းများလည်းဖမ်းမိခဲ့သည်။ နယ်စပ်စခန်းများသိမ်းပိုက်ရာတွင်လည်း စစ်ကောင်စီတပ်ဖွဲ့ဝင်အများအပြား ထိုင်းနိုင်ငံဘက်သို့ ထွက်ပြေးခဲ့သည်။
KNU ပြောရေးဆိုခွင့်ရှိသူ ပဒိုစောတောနီးက “ပထမဦးဆုံးခြေလှမ်းကတော့ အထူးသဖြင့်ထိုင်းနယ်စပ်မှာရှိတဲ့ ၊အထူးသဖြင့်ကျွန်တော်တို့ နယ်မြေကိုလာပြီးစိုးမိုးယူထားတဲ့ နှစ်ပေါင်း ၃၀ ကျော် ကာလ ထိုင်းနယ်စပ်တစ်ကြောမှာရှိတဲ့ တပ်ဖွဲ့တွေကိုတော့အပြောင်ရှင်းဖို့ ပထမဆုံးလို့ပြောလို့ရတာပေါ့” ဟု ပြောသည်။
“ပြောရမယ်ဆိုရင်တော့ ဒီမိုင်ပေါင်းထောင်ချီတဲ့ အဲဒီထိုင်းနယ်စပ်ကရှိတဲ့ စစ်ကောင်စီရဲ့တပ်စခန်းတွေကိုကျွန်တော်တို့ ရှင်းထုတ်လိုက်လို့ ရပြီလို့ ပြောလို့ရတာပေါ့နော်၊အကုန်အစင်မဖြစ်သေး
သည့်တိုင်တောင် နည်းနည်းပါးပါးပဲကျန်တော့တဲ့အနေအထားမှာရှိတယ်။ဒါကကျွန်တော်တို့ရဲ့ ပထမခြေလှမ်းလို့ပြောလို့ရတယ် ။ဒီကနေတဆက်တည်းကျွန်တော်တို့ရှေ့တိုးရမယ်” ဟုKNU ပြောရေးဆိုခွင့်ရှိသူကပြောသည်။
