ဇူလိုင်-၃၀၊၂၀၂၅။ထားမြတ်/People’s Spring
ကချင်လွတ်လပ်ရေးတပ်မတော်(KIA)က မြို့သိမ်းစစ်ဆင်ရေးဖော်ဆောင်နေသည့် ဗန်းမော်မြို့ကို စစ်ကောင်စီက စစ်သင်္ဘောများဖြင့် စစ်အင်အား၊ ရိက္ခာခဲယမ်းဖြည့်တင်းရန်ကြိုးပမ်းနေသော်လည်း ရွှေကူမြို့အထွက်တွင် တိုက်ခိုက်ခံရ၍ အထိနာပြီး စစ်သင်္ဘောများ ဆက်မတက်နိုင်သေးဟု ကချင်သတင်းရင်းမြစ်အချို့က ပြောသည်။
ဇူလိုင် ၂၇ရက်တွင် ရွှေကူမှ ဗန်းမော်မြို့သို့ ဆက်လက်ထွက်ခွာချိန်ကတည်းက စစ်သင်္ဘောအုပ်စု တိုက်ခိုက်ခံနေရခြင်းဖြစ်ပြီး စစ်သင်္ဘောအချို့ ထိခိုက်မှုရှိနေသည်။
” သင်္ဘောတွေကတော့ ဆက်ပြီးမတက်ဘူး။ ကြက်တူရွေးနဲ့ …မှာ နားနေတယ်။ နှစ်ဖွဲ့ခွဲပြီးနားနေတယ်။ ကုန်းလမ်းကနေ ထိုးစစ်ဆင်တဲ့ စစ်ကြောင်းနှစ်ကြောင်းက ဒီနေ့ တော်တော်အထိနာပြီးမှ ပြန်ခေါက်တာပေါ့”ဟု ကချင်စစ်ရေးသတင်းရင်းမြစ်က ပြောသည်။
Public Service Announcement
စစ်သင်္ဘောအချို့ ထိခိုက်မှုရှိခဲ့သည်ဟု သတင်းရင်းမြစ်က ပြောပြီး သင်္ဘော ၂ စီး ထိမှန်အောင် တိုက်ခိုက်နိုင်ခဲ့သည့် ရုပ်သံဖိုင် ၂ခုကို သတင်းရင်းမြစ်က ပြသည်။
အခြား ကချင်စစ်ရေးသတင်းရင်းမြစ်တဦးကလည်း ဝဲမ၌ လူအင်အားနှင့် ရိက္ခာချပြီးသည့် သင်္ဘော ၃ စီး ဝဲမမှ ရွှေကူမြို့ဘက် ပြန်လှည့်ရပ်နားနေသည်ဟု လူမှုကွန်ရက်မှ တဆင့်အသိပေးသည်။ ထို့ပြင် ဝဲမမှ ထွက်လာသည့် စစ်ကြောင်းကို KIA ပူးပေါင်းတပ်က ယနေ့(ဇူလိုင်၃၀ရက်)နံနက်တွင် တိုက်ခိုက်ရာ ၁နာရီခွဲကြာမြင့်ခဲ့ပြီးစစ်ကောင်စီတပ် ၁၀ဦးကျော်သေဆုံးခဲ့ဟု ဆိုသည်။ ထို့ပြင် စစ်ကောင်စီတပ်က Y12 လေယာဉ်ဖြင့် ၁၁ကြိမ် ဗုံးကြဲခဲ့ဟုလည်း အသိပေးသည်။
သတင်းရင်းမြစ်တစ်ဦးကလည်း စစ်သင်္ဘောများကို KIAက တိုက်ခိုက်နေသော်လည်း အမှန်တကယ် ထိရောက်အောင် တိုက်ခိုက်နိုင်မည့် နေရာများ မရောက်သေးဟု သုံးသပ်သည်။
စစ်သင်္ဘောများ ဗန်းမော်မြို့သို့ ဦးတည်လာခြင်းနှင့်ဒေသ စစ်ရေးအခြေအနေများ မေးမြန်းရန် KIA သတင်းပြန်ကြားရေးဌာန တာဝန်ခံဗိုလ်မှူးကြီးနော်ဘူထံ ဆက်သွယ်နေဆဲဖြစ်သည်။
