ထိုင်းနဲ့ ကမ္ဘောဒီးယား ချက်ချင်းအပစ်ရပ်ဖို့သဘောတူလိုက်ပြီ

ဇူလိုင် – ၂၈ ၊၂၀၂၅/People’s Spring

ထိုင်းနဲ့ ကမ္ဘာဒီးယား တို့ကြား နယ်စပ်ဒေသတိုက်ပွဲတွေကို ဒီနေ့ (ဇူလိုင် ၂၈) ရက်က စတင်ပြီးချက်ချင်းအပစ်ရပ်ကြဖို့ မလေးရှားနိုင်ငံမှာ နှစ်ဖက်အစိုးရအဖွဲ့ ခေါင်းဆောင်တွေ မျက်နှာချင်းဆိုင်တွေ့ဆုံပြီး သဘောတူညီချက် ရရှိသွားပါတယ်။

ဆွေးနွေးပွဲအပြီးပြုလုပ်တဲ့ ပူးတွဲ သတင်းစာရှင်းလင်းပွဲမှာ ကမ္ဘောဒီးယားဝန်ကြီးချုပ် ဟွန်မာနတ်က နှစ်ဖက်အပစ်ရပ်သဘောတူညီချက်ကိုကြေညာတာပါ။

ဒီနေ့ ညပိုင်းမှာ အပစ်ရပ်ကြမှာဖြစ်ပြီး မနက်ဖြန် မနက်ပိုင်းမှာစစ်ဘက်ဆိုင်ရာအရာရှိတွေ ဆက်လက်ဆွေးနွေးကြမှာဖြစ်ပါတယ်။

Public Service Announcement

အိမ်နီးချင်း နှစ်နိုင်ငံကြား နယ်စပ် အငြင်းပွားမှုကို အခြေခံပြီး ဖြစ်ပွားတဲ့တိုက်ပွဲတွေ ငါးရက်မြောက်နေ့မှာ နှစ်ဖက် အပစ်ရပ်ကြဖို့ သဘောတူလိုက်ကြတာလည်းဖြစ်ပါတယ်။

ဒီလိုသဘောတူညီချက် ရဖို့ ထိုင်းရော၊ ကမ္ဘောဒီးယားပါ အဖွဲ့ဝင်အဖြစ် ပါဝင်နေတဲ့ အရှေ့တောင်အာရှ နိုင်ငံများ အစည်းအရုံး (အာဆီယံ)ရဲ့ အလှည့်ကျ ဥက္ကဋ္ဌ မလေးရှားနိုင်ငံမှာ တွေ့ဆုံဆွေးနွေးကြတာပါ။

ဆွေးနွေးပွဲမှာ မလေးရှား ဝန်ကြီးချုပ် အန်ဝါ အီဘရာဟင်ကိုလည်း တွေ့ရသလို အမေရိကန်နဲ့ တရုတ်ကိုယ်စားလှယ်တွေလည်းဆွေးနွေးပွဲတက်ရောက်ကြပါတယ်။