ဇူလိုင်-၃၀၊၂၀၂၅။People’s Spring
အမျိုးသားညီညွတ်ရေးအစိုးရ ယာယီသမ္မတနှင့် ပြည်ထောင်စုဝန်ကြီးများ မြေပြင်သို့ကွင်းဆင်းပြီးပြည်သူများ ၊ တော်လှန်ရေးရဲဘော်များနှင့်တွေ့ဆုံခဲ့သည်။
NUG ယာယီသမ္မတ ဒူဝါလရှီးလ ဦးဆောင်သည့် အစိုးရအဖွဲ့မှကာကွယ်ရေးဝန်ကြီး ဦးရည်မွန်၊ ပညာရေးနှင့်ကျန်းမာ ရေးဝန်ကြီး ဒေါက်တာဇော်ဝေစိုး၊ သယံဇာတနှင့် သဘာဝပတ်ဝန်းကျင် ထိန်းသိမ်းရေးဝန်ကြီးဒေါက်တာတူးခေါင်၊ကျန်းမာရေး ဒုတိယဝန်ကြီးဒေါက်တာခင်မောင်လွင်၊နိုင်ငံတော်သမ္မတရုံး အတွင်းဝန် ဦးဘရန်း၊ ပြည်ထဲရေးနှင့် လူဝင်မှုကြီးကြပ်ရေးဝန်ကြီးဌာန အတွင်းဝန် ဦးကွမ်မင်း၊ သယံဇာတနှင့် သဘာဝပတ်ဝန်းကျင် ထိန်းသိမ်းရေးဝန်ကြီးဌာန အတွင်းဝန် ဒေါ်နော်ထီးခူ နှင့် ရုံးအဖွဲ့သားများသည် NUG ထိန်းချုပ်နယ်မြေများသို့သွားရောက်၍ဒေသခံပြည်သူလူထုအပါအဝင်တော်လှန်ရေးရဲဘော်များနှင့်တွေ့ဆုံခဲ့ကြောင်း NUG ကထုတ်ပြန်သည်။
NUG ယာယီသမ္မတက အစိုးရအဖွဲ့ဝင်များ ပြည်တွင်းပြန်လာပြီး တော်လှန်ရေးအတွက်လုပ်ငန်းများထိရောက်စွာလုပ်ကိုင်ရန် ၂၀၂၄ နိုဝင်ဘာလတွင်တိုက်တွန်းပြီးနောက် အစိုးရအဖွဲဲ့ဝင်များမြေပြင်သွားရောက်ကြောင်းသတင်းများထုတ်ပြန်နေရာ ယခုခရီးစဥ်သည် NUGအစိုးရထိပ်တန်းတာဝန်ရှိသူများ အများဆုံးပါဝင်သောခရီးစဥ်ဖြစ်သည်။
Public Service Announcement
ခရီးစဉ်တွင်NUG ထိန်းချုပ်နယ်မြေများ၏ လုံခြုံရေး၊ အုပ်ချုပ်ရေး၊ အခွန်ကောက်ခံရေး ယန္တရားများနှင့် အနီးကပ်ထိတွေ့၍ တော်လှန်ရေး အောင်မြင်နိုင်ရေးအတွက် အထောက်အကူပြုနိုင်ရန်၊ မြေပြင်၌ ဦးဆောင်နေသည့် တာဝန်ခံများ၊ တော်လှန်ရေး ရဲဘော်ရဲဘက်များ နှင့် ထိတွေ့၍ ယုံကြည်မှု၊ ခေါင်းဆောင်မှု၊ စနစ်ကျသည့် စီမံခန့်ခွဲမှုများ တည်ဆောက်သွားနိုင်ရန် ရည်ရွယ်ချက်ဖြင့် သွားရောက်ခဲ့ခြင်းဖြစ်သည်ဟုဖော်ပြထားသည်။
ထို့အပြင် NUG ထိန်းချုပ်နယ်မြေများတွင်စိန်ခေါ်မှုများ၊ အခက်အခဲ ပြဿနာများကို သိရှိပြီး အဖြေ ရှာနိုင်ရန်၊ မြေပြင်၌တော်လှန်ရေးတာဝန်ထမ်းဆောင်နေကြသည့် တော်လှန်ရေး ရဲဘော်ရဲဘက်များနှင့် တွေ့ဆုံ၍ တော်လှန်ရေးခွန်အားနှင့် တော်လှန်စိတ် စွမ်းရည်ကို မြှင့်တင်ပေးနိုင်ရန်နှင့်ယာယီသမ္မတအပါအဝင် NUG အစိုးရ တာဝန်ရှိသူများသည် မြေပြင် ပြည်သူလူထုနှင့် တသားတည်းရှိနေသည်ကို ပြည်သူလူထုထံ သတင်းစကားပါး၍ တော်လှန်ရေး စိတ်ခွန်အား ပိုမိုမြှင့်တင်နိုင်စေရန်လည်း ရည်ရွယ်ကြောင်းအသိပေးထားသည်။
ထိန်းချုပ်နယ်မြေများသို့ သွားရောက်ခဲ့သည့် ခရီးစဉ်အတွင်း ဒေသခံလူထုအပါအဝင် မြို့နယ်/ခရိုင် အလိုက် ပြည်သူ့အုပ်ချုပ်ရေး တာဝန်ခံများ၊ မြို့နယ်/ခရိုင်အလိုက် ပြည်သူ့ကာကွယ်ရေးအဖွဲ့ တာဝန်ခံများ၊ ခရိုင်အလိုက် ပြည်သူ့ ကာကွယ်ရေးတပ်မတော် တပ်ရင်းမှူးများ၊စစ်ဒေသရုံးမှစစ်ဒေသမှူးနှင့် ရုံးအဖွဲ့များ၊ မြို့နေရပ်မိရပ်ဖိများ၊သံဃာတော်များနှင့် တွေ့ဆုံခဲ့သည်ဟုဆိုသည်။
ယာယီသမ္မတသည်ခရီးစဉ်အတွင်းစစ်ဘေးရှောင်ပြည်သူလူထုနှင့်တွေ့ဆုံ၍ ပြည်သူလူထု ကြုံတွေ့ခံစားနေရသည့် ဘေးဒုက္ခများကို အလေးအနက်ထား နားထောင်ခဲ့ပြီး စိတ်ဓာတ်ခွန်အား ဝေမျှခြင်းနှင့် စစ်ဘေးရှောင် ပြည်သူလူထုအတွက် ကူညီလှူဒါန်းမှုများ လုပ်ဆောင်ခဲ့ကြောင်းလည်းသိရသည်။
ခရီးစဥ်တလျှောက် အစိုးရအဖွဲ့ဝင်များနှင့်အတူ အမှတ် (၁) စစ်ဒေသမှူးလည်း ပါဝင်ခဲ့ပြီး အစိုးရ တာဝန် ရှိသူများ၏ လုံခြုံရေးကို အမှတ် (၁) စစ်ဒေသမှ အထူး တာဝန်ယူ ကြီးကြပ်ဆောင်ရွက်ခဲ့ကြောင်းထုတ်ပြန်ထားသည်။
“ပါမောက္ခဒေါက်တာဇော်ဝေစိုးနဲ့ပါမောက္ခ ဒေါက်တာခင်မောင်လွင် ၂ ယောက်ကို တူတူမြင်တွေ့ရတာအားရှိရတယ်မြေပြင်မှာ ဒီလို မြင်ရတာ”ဟုပြည်သူတဦးကမှတ်ချက်ပြုသည်။
အခြားပြည်သူတဦးကလည်း “For show တွေမကြိုက်ပါ။ဒီပုံတွေထက်ဘယ်စခန်း၊ဘယ်မြို့ကို ဘယ်လို အလုံးအရင်းနဲ့ ဝင်တိုက်ပုံတွေ သတင်းတွေပဲကြားချင်၊မြင်ချင်ပါတယ်”ဟု ယာယီသမ္မတ၏သတင်းထုတ်ပြန်ချက်အောက်တွင်မှတ်ချက်ရေးသားသည်။
အခြားပြည်သူတဦးက”ရဲရင့်ပြီးပြည်သူနဲ့တစ်သားထဲရှိတဲ့တို့သမ္မတကြီးကိုလေးစားလို့မဆုံးနိုင်ဘူး။နေပြည်တော်ထဲပုန်းနေတဲ့စစ်သားဆိုတဲ့ဟာတွေနဲ့ဘာမှကိုမဆိုင်တာ”ဟုရေးသားသည်။
တော်လှန်ရေးအောင်မြင်စေရန် NUG အစိုးရအားပြုပြင်ပြောင်းလဲမှုများပြုလုပ်ရန် ဝေဖန်တိုက်တွန်းမှုများစွာ ယခုလပိုင်းအတွင်းထွက်ပေါ်ခဲ့ပြီးနောက် NUG အစိုးရအဖွဲ့စွမ်းဆောင်ရည်မြှင့်တင်ရန် နှင့် ကိုယ်စားပြုပါဝင်မှုမြှင့်တင်ရန် အစိုးရအဖွဲ့ကိုပြုပြင်ပြောင်းလဲမှုပြုလုပ်မည်ဖြစ်ကြောင်းလည်း NUG ဝန်ကြီးချုပ်ရုံးပြောရေးဆိုခွင့်ရှိသူဦးနေဘုန်းလတ်ကလည်းဇူလိုင်၂၉ရက်၌ပြောသည်။
