ဇူလိုင်-၃၀၊ ၂၀၂၅။ထားမြတ်/People’s Spring
မွန်ပြည်နယ်တွင် တာဝန်ကျနေသည့် စစ်ကောင်စီတပ်သား ၂ ဦး အလင်းဝင်လာကြောင်း ရာမညမွန်တပ်တော်(RMA)က ယနေ့(ဇူလိုင် ၃၀ရက်)တွင် သတင်းထုတ်ပြန်သည်။
စစ်ကောင်စီ၏ ခမရ(၄၃၂)တပ်ရင်းမှ တပ်သား ၂ဦးသည် လက်နက် ၂လက်နှင့် အခြားစစ်သုံးပစ္စည်းများယူလာပြီး အလင်းဝင်လာခြင်းဖြစ်ဟု အသိပေးသည်။
အလင်းဝင်လာသူ စစ်ကောင်စီတပ်သား ၂ဦးကို လုံခြုံစွာလက်ခံထားပြီး တစ်ဦးလျင် ၂၅သိန်းကျပ်စီထောက်ပံ့ငွေပေးအပ်ခဲ့ဟုလည်း ဓာတ်ပုံမှတ်တမ်းနှင့်အတူ ဖော်ပြသည်။
Public Service Announcement
စစ်ကောင်စီတပ်သား နှစ်ဦး၏ အနာဂတ် ရှေ့ရေးနှင့်ပတ်သက်၍ ကာယ ကံရှင်များ၏ သဘောဆန္ဒနှင့်အညီ ဆက်လက်ဆောင်ရွက်ပေးသွားမည်ဟု ရာမညမွန်တပ်တော်က အသိပေးသည်။
အလင်းဝင်လာသည့် စစ်ကောင်စီတပ်သား ၂ဦးသည် စစ်ကောင်စီ၏ အဓမ္မစစ်သားစုဆောင်းမှုကြောင့် တပ်တွင်းရောက်ရှိလာသူများဖြစ်ပြီး ၎င်းတို့ဆန္ဒအလျောက် ရာမည မွန်တပ်တော်သို့ ပူးပေါင်းလာခြင်းဖြစ်ကြောင်းလည်း ထုတ်ပြန်သည်။
ရာမညမွန်တပ်တော်သည် မွန်၊ တနင်္သာရီ ဒေသများ၌ ကရင်အမျိုးသားလွတ်မြောက်ရေးတပ်မတော်(KNLA)၊ ပြည်သူ့ကာကွယ်ရေးတပ်မတော်(PDF)အပါအဝင် တော်လှန်ရေးအင်အားစုများနှင့် ပူးပေါင်းပြီး စစ်ကောင်စီကိုတိုက်ခိုက်နေခြင်းဖြစ်သည်။
