ဇွန်-၂၅၊၂၀၂၅။ကျော်ဇော/People’s Spring
ပဲခူးတိုင်း၊ မင်းလှမြို့နယ်၊ ငလှစမ်းကျေးရွာကို နှစ်ရက်ဆက်မီးရှို့ဖျက်ဆီးခဲ့သည့် စစ်ကောင်စီတပ်ကဒေသခံပြည်သူ ၁၆ ဦးကို ဖမ်းဆီးထားကြောင်း ဒေသတွင်းတော်လှန်ရေးတပ်ဖွဲ့များနှင့်ဒေသခံပြည်သူများကလူထုနွေဦးသို့ပြောသည်။
ငလှစမ်းကျေးရွာသည် ရန်ကုန်-ပြည်လမ်းအရှေ့ဘက်ခြမ်းခွက်မကျေးရွာအုပ်စုတွင်ပါဝင်ပြီးစစ်သားများက ဇွန်လ ၂၃ ရက်နှင့် ၂၄ ရက်နေ့များတွင်ဝင်ရောက်မီးရှို့ဖျက်ဆီးခဲ့ခြင်းဟုအထက်ပါသတင်းရင်းမြစ်များကပြောသည်။
“ဇွန်၂၄ ရက် နံနက် ၁၀ နာရီမှာ ၂၃ ရက်နေ့က မီးရှို့တာမလောင်ဘဲ ကျန်နေတဲ့နေအိမ်တွေကိုစခတွေ ထပ်မီးရှို့ပါတယ်။ ဖမ်းဆီးခံရတဲ့ပြည်သူက စုစုပေါင်း ၁၄ ဦးရှိပြီ”ဟု မင်းလှမြို့နယ်မှ ဒေသခံပြည်သူတစ်ဦးက လူထုနွေဦးသို့ ပြော သည်။
Public Service Announcement
မင်းလှမြို့နယ်ရှိဂန့်ဂေါ်ပင်၊ ဗိုလ်တထောင် နှင့် တိုကျွဲလေးစုကျေးရွာများကိုစစ်တပ်ကမီးရှို့ဖျက်ဆီးခဲ့စဥ်။ ဓါတ်ပုံ-ပေးပို့ 
မင်းလှမြို့နယ်ရှိဂန့်ဂေါ်ပင်၊ ဗိုလ်တထောင် နှင့် တိုကျွဲလေးစုကျေးရွာများကိုစစ်တပ်ကမီးရှို့ဖျက်ဆီးခဲ့စဥ်။ ဓါတ်ပုံ-ပေးပို့ 
မင်းလှမြို့နယ်ရှိဂန့်ဂေါ်ပင်၊ ဗိုလ်တထောင် နှင့် တိုကျွဲလေးစုကျေးရွာများကိုစစ်တပ်ကမီးရှို့ဖျက်ဆီးခဲ့စဥ်။ ဓါတ်ပုံ-ပေးပို့ 
မင်းလှမြို့နယ်ရှိဂန့်ဂေါ်ပင်၊ ဗိုလ်တထောင် နှင့် တိုကျွဲလေးစုကျေးရွာများကိုစစ်တပ်ကမီးရှို့ဖျက်ဆီးခဲ့စဥ်။ ဓါတ်ပုံ-ပေးပို့
စစ်ကောင်စီတပ်က ဖမ်းဆီး၍ ငလှစမ်းရွာဘုန်း ကြီးကျောင်း၌ ထိန်းသိမ်းခံရသူများတွင် ဦးမြအေး၊ ကိုစိန်မြင့်ထွန်း၊ မခိုင်မိုး၊ ကိုဇော်ဝင်း၊ ဒေါ်ခင်ခင် အပါအဝင် စုစုပေါင်း ၁၄ ဦးဖြစ် ကြောင်း ၎င်းက ဆက်ပြောသည်။
ထို့အပြင် ငလှစမ်းရွာမှ ကိုရဲမောင်နှင့်ညီမဖြစ်သူတို့ ထောက်ကြန့်အုပ်စု၊ ဘန့်ဘွေးပင်ရွာဘက်သို့ တိမ်းရှောင်လာစဥ် စစ်ကောင်စီတပ်စစ်ကြောင်းတစ်ခုနှင့်တိုးကာရိုက်နှက်ဖမ်းဆီးခံထားရကြောင်း စုံစမ်းသိရသည်။
အလားတူဇွန်လ ၂၂ ရက် နှင့် ၂၃ ရက်နေ့များတွင် မင်းလှမြို့နယ်အတွင်းရှိကျေးရွာများသို့ တစ်ရွာဝင်တစ်ရွာထွက်ဖြင့်မီးရှို့ဖျက်ဆီးနေသောစစ်တပ်ကပစ်ခတ်သည့် လက် နက်ကြီးဆများထိမှန်ကာ စမ်းဘုတ်ရွာမှ ကိုရေခဲဆိုသူ ပြင်းထန်ဒဏ်ရာရခဲ့သည့်အပြင် ဖားလေးကွင်း(မြောက်စု)ရွာမှ ဦးအောအာကြီး နှင့် သားဖြစ်သူ ကိုဖီဖိုးမင်းတို့ ထိခိုက်ဒဏ်ရာများရရှိခဲ့သေးသည်။
အဆိုပါစစ်ကြောင်းများသည်ဇွန်လ ၂၅ ရက်နံနက် ၇ နာရီ ၂၀ ခန့်တွင် ခွက်မကျေးရွာအုပ်စု၊ ခွက်မရွာကို ဝင်ရောက်မီးရှို့ဖျက်ဆီးနေပြီး ထိခိုက်ပျက်စီးမှုအခြေအနေအပြည့်အစုံကို မသိရသေးပေ။
မင်းလှမြို့အတွင်းရှိ ကျေးရွာများသို့ စစ်တပ်က စစ်ကြောင်းများခွဲကာကျေးရွာများသို့ စစ်ကြောင်းထိုး အကြမ်းဖက်လျှက်ရှိရာ ဇွန်လ ၂၀ ရက်နေ့မှ ဇွန်လ ၂၅ ရက်နံနက် ၇ နာရီကျော်အထိတောင်ပြတ်ရွာမ၊ ဦးတိုကျွဲလမ်းစုရွာ၊ သရော်ကုန်ရွာ၊ ဗိုလ်တထောင်ရွာ၊ ဂန့်ဂေါ်ပင်ရွာမ၊ စု ဆားချောင်းရွာ၊ ဆင်အိုင်ချောင်းပေါက်ရွာ၊ ငလှစမ်းရွာနှင့် ခွက်မရွာအပါအဝင် ကျေးရွာ ၉ ရွာ မီးရှို့ဖျက်ဆီးခံထားရသည်။
ထို့အပြင်း မီးရှို့ဖျက်ဆီးခံရသောရွာများအပါအဝင် အနီးဝန်းကျင်ကျေးရွာများမှ ဒေသခံပြည်သူ ၁၀,၀၀၀ ဝန်းကျင် ဘေးလွတ်ရာထွက်ပြေးတိမ်းရှောင်နေကြရပြီး ၎င်းစစ်ရှောင်ပြည်သူများအတွက် အမိုးအကာနှင့် အစားအသောက်များ အရေးပေါ်လိုအပ်နေကြောင်း စုံစမ်းသိရသည်။
