Hindistanın Azərbaycandakı Səfirliyi Bakıda rəsm sərgisi və ədəbi oxu tədbiri təşkil edib.
Gununesi.info xəbər verir ki, Hindistanın Azərbaycandakı Səfirliyi 1 noyabr 2026-cı il tarixində Bakıda yerləşən səfirliyin binasında “Bir dostluq, iki ölkə: Hindistan və Azərbaycan” adlı rəsm sərgisi və Hindistanın klassik əsəri “Pançatantra”dan hekayələrin oxu tədbirini təşkil edib.
Tədbirdə Hindistan və Azərbaycanın zəngin sənət ənənələri, eləcə də iki ölkə arasında uzun illərə söykənən mədəni əlaqələr diqqətə çatdırılıb.
Tədbirdə müxtəlif yaş qruplarından olan gənc azərbaycanlı tələbələr və rəssamlar iştirak edərək incəsənət, ədəbiyyat, musiqi və mədəni mübadilə ilə zəngin maraqlı bir gün keçiriblər.
Gənc azərbaycanlı tələbə və rəssamların tədbirdə həvəslə iştirak etməsindən məmnunluğunu ifadə edən Hindistanın Azərbaycandakı səfiri Abhay Kumar çıxışında qeyd edib ki, incəsənət insanları bəzən sözlərin ifadə edə bilmədiyi şəkildə bir araya gətirir. O vurğulayıb ki, həm Hindistan, həm də Azərbaycan zəngin tarixləri və müxtəlif mədəni ənənələri ilə formalaşmış bədii ifadə xəzinələridir. Azərbaycanlı tələbə və gənc rəssamların incəsənətə olan sevgisini yüksək qiymətləndirən səfir onların yaradıcılığının və həvəsinin mədəni irsin gələcək nəsillərə ilham verməyə davam etməsini təmin edəcəyini bildirib.
Sərginin “Bir dostluq, iki ölkə: Hindistan və Azərbaycan” mövzusuna toxunan səfir bu mövzunun xüsusilə aktual olduğunu qeyd edərək, onun əsrlər boyu davam edən mədəni qarşılıqlı əlaqələrə və qarşılıqlı hörmətə əsaslanan münasibətlərin ruhunu əks etdirdiyini bildirib.
