ဟန်နွေ/People’s Spring
ဖာပွန်မြို့နယ်အတွင်းရှိ စစ်ကောင်စီ၏ ခေါပုတ်တပ်စခန်းကို ကရင်အမျိုးသားလွတ်မြောက်ရေးတပ်မတော်(KNLA) တပ်မဟာ(၅)ပူးပေါင်းတပ်က ထိုးစစ်ဆင် တိုက်ခိုက်နေရာ စစ်ကောင်စီတပ်သားများ ယမန်နေ့ (အောက်တိုဘာ ၂၉ရက်)တွင် စခန်းစွန့်ထွက်ပြေးသွားသည်ဟု သတင်းရကြောင်း KNU/KNLA တပ်မဟာ(၅)ပြောရေးဆိုခွင့်ရှိသူ ဗိုလ်မှူးကြီးစောကလယ်ဒိုက ပြောသည်။
ဖာပွန်မြို့မြောက်ဘက် ကီလို ၂၀ခန့်အကွာ( KNU အုပ်ချုပ်နယ်မြေရှိ လယ်တိုးတပ်စခန်းကို ပြီးခဲ့သည့်ရက်ပိုင်းကတည်းက KNLAပူးပေါင်းတပ်က ထိုးစစ်ဆင်နေခြင်းဖြစ်သည်ဟု ဆိုသည်။
” စဖြစ်တာကတော့ သုံးလေးရက်လောက်ရှိပြီ။ မနေ့ကမှ ဒီစခန်းကနေပြီးတော့ ဟိုဘက်ကပေါ့ စစ်ကောင်စီဘက်က ထွက်ပြေးသွားတယ်လို့တော့ ကြားတယ်။ ဒါပေမဲ့ သူတို့ ကောင်းကောင်းမွန်မွန် မရှင်းလင်းရသေးဘူးလို့ ပြောပြတယ်။ ဒီညနေကျမှ သူတို့ သတင်းအတိအကျပေးမယ်ပြောတယ်”ဟု ဗိုလ်မှူးကြီးစောကလယ်ဒိုက ပြောသည်။
Public Service Announcement
စခန်းအတွင်း စစ်ကောင်စီတပ်သားများ လုံး၀မရှိတော့ဟု သိရသော်လည်း နယ်မြေရှင်းလင်းရေး မပြီးသေးဟု ဆိုသည်။
ယခု KNLA ပူးပေါင်းတပ်က စခန်းသိမ်းတိုက်ခိုက်ခဲ့သည့် ခေါပုတ်စခန်းသည် အင်အားများသည့် စစ်ကောင်စီတပ်စခန်းဖြစ်ကြောင်း ၎င်းကဆိုသည်။
” ဘာဖြစ်လို့လည်းဆိုတော့ စခန်းက တခြား လယ်တိုးတို့၊ကျောက်ညှပ်တို့၊ တာမူကျိုး စခန်းကနေ အဲဒီမှာ ပြန်စုတဲ့စခန်းကြီးတစ်ခုဖြစ်တယ်” ဟု ဗိုလ်မှူးကြီးစောကလယ်ဒိုက ပြောသည်။
ခေါပုတ်စခန်းသိမ်းတိုက်ပွဲအတွင်း သေဆုံးထိခိုက်၊ စစ်သုံ့ပန်းရရှိမှုနှင့် လက်နက်ခဲယမ်းရရှိမှု အခြေအနေများကို ဆက်လက်စုံစမ်းနေဆဲဖြစ်သည်။
ယခု ခေါပုတ်စခန်းကျပါက KNU ဖာပွန်ခရိုင် အတွင်း၌ စစ်ကောင်စီဗျူဟာအပါအဝင် တပ်စခန်း ၁၀ခု ခန့်သာ ကျန်တော့မည်ဟုလည်း ၎င်းက အသိပေးသည်။
KNU တပ်မဟာ(၅) ပူးပေါင်းတပ်ဖွဲ့သည် ယခုနှစ် မတ်လကစ၍ ဖာပွန်မြို့သိမ်းတိုက်ပွဲ ဆင်နွှဲလျက်ရှိရာ လက်ရှိတွင် မြို့နှင့် စစ်ကောင်စီတပ်ရင်းဌာနချုပ် အချို့ကိုသိမ်းပိုက် ထိန်းချုပ် ထားပြီး ဖာပွန်စစ်ကောင်စီ ဗျူဟာအပါအဝင် စခန်းအနည်းငယ်သာ ကျန်တော့သည်။
