ဇေအောင်/People’s Spring
အာဏာရှင်ဟောင်း ဗိုလ်ချုပ်မှူးကြီးသန်းရွှေရဲ့ သမက်ဖြစ်တဲ့ ဒေါက်တာနေစိုးမောင်ကို ဖမ်းဆီးလိုက်တယ်လို့ စစ်ကောင်စီက အောက်တိုဘာ ၂၅ ရက်မှာ တရားဝင်သတင်းထုတ်ပြန်ပါတယ်။ ဒါဟာ လက်ချင်းရိုက်ထားတဲ့ ဇာတ်ကွက်တွေမဟုတ်ဘူးဆိုရင်တော့ အာဏာရှင်ဟောင်းရဲ့မိသားစုဝင်ကို အာဏာရှင်လက်သစ်က အရေးယူလိုက်တာဖြစ်ပါတယ်။
ဒေါက်တာနေစိုးမောင်ဟာ သူ့ရဲ့ Dr Nay Soe Maung ဖေစ်ဘွခ်အကောင့်ကနေ နိုင်ငံတော် တည်ငြိမ်အေးချမ်းရေးကို ပျက်ပြားအောင် လှုံ့ဆော်ခြင်း၊ ဝါဒဖြန့်ခြင်းတွေ ပြုလုပ်ခဲ့တယ်ဆိုတဲ့ စွပ်စွဲချက်နဲ့ မနေ့က (အောက်တိုဘာ ၂၄ ရက်) ညနေ ၆ နာရီခွဲမှာ မန္တလေးက ပြည်ကြီးတံခွန်မြို့မရဲစခန်းမှာ ဖမ်းဆီးအရေးယူလိုက်တယ်လို့ စစ်ကောင်စီက ဆိုပါတယ်။
ဒေါက်တာနေစိုးမောင်ဟာ စစ်တပ်က အာဏာသိမ်းပြီးတစ်ပတ်ပြည့်တဲ့ ၂၀၂၁ ခုနှစ် ဖေဖော်ဝါရီ ၇ ရက်တုန်းကလည်း လမ်းပေါ်ထွက်ပြီး အာဏာသိမ်းတာကိုလက်မခံတဲ့အကြောင်း ဆန္ဒပြခဲ့ဖူးပါတယ်။ အာဏာသိမ်းကာလမှာသူ့ရဲ့Facebook အကောင့်ကနေ စစ်ကောင်စီကို မကြာခဏ ဝေဖန်ခဲ့ဖူးတယ်။
Public Service Announcement
ဒေါက်တာနေစိုးမောင်ဟာ အောက်တိုဘာ ၇ ရက်နေ့က မန္တလေးတိုင်းဝန်ကြီးချုပ် ဒေါက်တာဇော်မြင့်မောင် ကွယ်လွန်ချိန် သူ့ရဲ့ ဖေစ်ဘွခ်ကနေ Post တစ်ခု ရေးသားခဲ့ပါတယ်။
“ခံစားချက်တွေပြင်းထန်လွန်းလို့ မျက်ရည်ကျမိပါတယ်။ကိုယ့်ပြည်သူတွေအတွက်၊ ကိုယ့်တာဝန်ယူတဲ့ဒေသ တိုးတက်အောင် အားကြိုးမန်တက် ဆောင်ရွက်ပေးခဲ့ပေမဲ့ ဆရာ နေမကောင်းတဲ့ ကာလမှာ ကျန်းမာရေး စောင့်ရှောက်မှု မပေးနိုင်ခဲ့လို့ စိတ်မကောင်းဖြစ်ရပါတယ် ဆရာ။ မြင့်မြတ်တဲ့ဘုံမှာ အေးချမ်းစွာလဲလျောင်းလို့ အိပ်စက် အနားယူပါတော့ ဆရာ။ နောင်ဘဝမှာ လူဖြစ်ခဲ့လျှင် လွတ်လပ် တရားမျှတပြီး လူကို လူလို ဆက်ဆံတဲဲ့ နိုင်ငံမှာလူပြန်ဖြစ်ပြီး လူသားတွေရဲ့ အကျိုးကိုဆက်လက်သယ်ပိုးပေးနိုင်ပါစေဆရာ။”လို့ ရေးသားခဲ့တာပါ။
နောက်ထပ် ၂ ရက်အကြာ အောက်တိုဘာ ၉ ရက်နေ့မှာလည်း ဒေါက်တာနေစိုးမောင်ဟာ ကျူံးဘေးမှာ ရိုက်ကူးထားတဲ့သူ့ပုံတွေနဲ့အတူ Post တစ်ခု ထပ်တင်ပြန်ပါတယ်။
“လေးစားသမှုနဲ့ ဂါဝရပြုအပ်ပါတယ်။ ဆရာ့လက်ထက်မှာ ပြည်သူတွေကို ပျော်ရွှင်အောင်ထားနိုင်ခဲ့သလို မန္တလေးသူ မန္တလေးသားတွေကိုလည်းစိတ်အား တက်ကြွစေခဲ့တဲ့ မန္တလေးမြို့ကြီးကို Smart City ဖြစ်စေဖို့ ကြိုးစားခဲ့တဲ့ ဆရာ့ကို လေးစားပါတယ်။ မန္တလေးရောက်ရင် မနက်ပိုင်းနဲ့ ညနေပိုင်းတွေမှာ ကျုံးပတ်လမ်း မှာ လမ်းလျောက်စက်ဘီးစီးတိုင်း ဆရာနဲ့ မြို့တော်ဝန် တို့ရဲ့ လက်ရာတွေကို ရင်သတ်ရှုမောတွေ့ရပါတယ်ဆရာ။ ပြည်သူတွေအတွက် စွမ်းဆောင်ချက်တွေကို အမှတ်ရပြီး ဂါဝရပြုလိုက်ပါတယ်…. ဆရာ မြင့်မြတ်သောဘုံမှာ စံစားနိုင်ပါစေ။”လို့ ထပ်ရေးခဲ့တာပါ။
ဒေါက်တာနေစိုးမောင်ဟာ ဦးသန်းရွှေရဲ့ ခြောက်ယောက်မြောက် သမီး ကြည်ကြည်ရွှေ(ခ)မဩရဲ့ခင်ပွန်းဖြစ်ပါတယ်။ ဦးသန်းရွှေရဲ့အချစ်ဆုံး မြေးတစ်ယောက်ဖြစ်တဲ့ နေရွှေသွေးအောင် (ခ)ဖိုးလပြည့်ရဲ့ ဖခင်လည်းဖြစ်ပါတယ်။
ဒေါက်တာနေစိုးမောင်ဟာ၁၉၅၆ ခုနှစ်မှာ ရှမ်းပြည်နယ်တောင်ပိုင်းလွိုင်လင်မြို့မှာမွေးဖွားခဲ့ပါတယ်။
ဆေးတက္ကသိုလ်(၁) MBBS ဘွဲ့ရတယ်။
ပြည်သူ့ကျန်းမာရေးနဲ့ သြစတေးလျကနေ ဘွဲ့ယူခဲ့တယ်။ သူ့ဖခင်ကလည်း ဦးနေဝင်းရဲ့တစ်ပါတီအာဏာရှင်စနစ် မဆလ လက်ထက်မှာ တာဝန်ထမ်းဆောင်ဖူးတဲ့ ဗိုလ်ချုပ်တင်စိန် (ငြိမ်း) ပါ။ ဒေါက်တာနေစိုးမောင်ဟာ စစ်ဆေးတက္ကသိုလ်မှာ ဆရာအဖြစ်လုပ်ခဲ့တယ်။ ဌာနမှုး၊ ဒုတိယဗိုလ်မှူးကြီးဘဝကနေ အငြိမ်းစားယူခဲ့တယ်။ အဲဒီနောက် ပြည်သူ့ကျန်းမာရေးတက္ကသိုလ်မှာ ပါမောက္ခချုပ်လည်း ဝင်လုပ်ခဲ့ဖူးတယ်။
ဒေါက်တာနေစိုးမောင်ရဲ့ အလှူအတန်းတွေ၊ ပရိဟတခရီးစဥ်တွေ၊ ဆေးဝါးကုသမှုတွေကို သူ့ရဲ့ဖေစ်ဘွခ် အကောင့်မှာ မကြာခဏ မြင်တွေ့ရတတ်တယ်။
အာဏာမသိမ်းမီ ၂၀၂၁ ခုနှစ် ဇန်နဝါရီလက Mizzima မီဒီယာရဲ့ရုပ်သံအင်တာဗျူးမှာ သူ့မိသားစုနဲ့ သူ့ရပ်တည်မှုတွေအကြောင်း ပြောပြခဲ့တာတွေ့ရတယ်။
၂၀၁၅ ကော ၂၀၂၀ မှာ NLD ကို မဲပေးခဲ့တယ်လို့ ထုတ်ဖော်ပြောဆိုဖူးတယ်။ ဖေ့ဘွတ်ခ်လူမှုကွန်ရက်ပေါ်မှာ ရေးသားနေတာတွေနဲ့ပတ်သက်ပြီး နိုင်ငံကောင်းဖို့ရေးနေတာလို့သူက ခံယူထားတယ်လို့ ဆိုပါတယ်။
“ဆရာက မြင်လို့ရှိရင် မြင်တဲ့အတိုင်းပြောတတ်တယ်။ အထူးသဖြင့် အားနည်းသူဘက်က အနှိမ်ခံဘက်က လိုက်ပြောတတ်တယ်။”လို့ သူက ဆိုပါတယ်။
ဒါပေမယ့် စစ်တပ်နဲ့ အာဏာရှင် ဦးသန်းရွှေတို့နဲ့ပတ်သက်ရင် အကောင်းပြောတာများပါတယ်။
စစ်တပ်ဟာ နိုင်ငံတစ်ခုအတွက် မရှိမဖြစ်တဲ့အဖွဲ့အစည်းလို့ သူကဆိုပါတယ်။ ယောက္ခမဖြစ်တဲ့ ဗိုလ်ချုပ်မှူးကြီးသန်းရွှေအကြောင်းကိုလည်း အဲဒီ အင်တာဗျူးမှာ အကောင်းဘက်ကနေ ဖြေကြားသွားတာတွေ့ရပါတယ်။
ယောက္ခမဖြစ်သူ ဗိုလ်ချုပ်မှူးကြီးသန်းရွှေဟာ အနားယူပြီးနောက်ပိုင်း အုပ်ချုပ်ရေးကိစ္စတွေမှာ ဝင်ရောက်စွက်ဖက်လေ့မရှိဘူးလို့ သူကဆိုပါတယ်။
မြေသိမ်းယာသိမ်းကိစ္စတွေကအစ အမြင်မတော်တာတွေ ယောက္ခမဖြစ်သူကို ပြောပြလေ့ရှိတော့ အိမ်သားတွေကအစ ဒေါက်တာနေစိုးမောင်ကို ဦးသန်းရွှေကို ခေါင်းကိုက်အောင်လုပ်တဲ့သူအဖြစ် ပြောတတ်တယ်လို့ သူကဖြေခဲ့တယ်။
အဲဒီနောက် သူတို့လင်မယားချင်း အိမ်ထောင်ရေးပြဿနာတွေလည်း ရှိလာတော့ ဒေါက်တာနေစိုးမောင်ဟာ ဦးသန်းရွှေရဲ့ အိမ်တော်ပေါ်ကနေ ဆင်းသွားခဲ့ပါတယ်။
ဒါပေမယ့် ဦးသန်းရွှေ အနားယူပြီးနောက်မှာတော့ ဇနီးဖြစ်သူ ကျန်းမာရေးမကောင်းတာရယ်၊ ယောက္ခမကို စောင့်ရှောက်ဖို့လိုအပ်တာရယ်ကြောင့် ပြန်လည်ပေါင်းစည်းခဲ့တယ်လို့ ဒေါက်တာနေစိုးမောင်က ဆိုပါတယ်။
“ဆရာဘာအခွင့်အရေးမှလည်း မယူခဲ့ဘူး။ ဆရာခရိုနီမဟုတ်ဘူး။ ဆရာလက်မထောင်ရဲတယ်။”လို့ သူကဆိုပါတယ်။
သူ့ယောက္ခမက “သူ(ဦးသန်းရွှေ) အနားမယူခင် ဆယ်နှစ်လောက်ကတည်းက ပြောတယ်။ အာဏာဆိုတာ ယစ်မူးတတ်တယ်။ စွန့်ဖို့ခက်ခဲတယ်တဲ့။” လို့ ဒေါက်တာနေစိုးမောင်က ဆိုပါတယ်။
ဒေါက်တာနေစိုးမောင်ဟာ စွန့်စားတာဝါသနာပါတယ်။ တောင်တက်၊ ရေငုပ်၊ လေထီးခုန်တာတွေ သူသဘောကျတယ်။ စက်ဘီးလည်းစီးတယ်။ စာရေးတာလည်း သူဝါသနာပါတယ်။ စာရေးဆရာတွေ၊ အနုပညာရှင်တွေနဲ့လည်း ရင်းနှီးတယ်။
ပြီးခဲ့တဲ့ ၂၀၂၃ ခုနှစ် အောက်တိုဘာလက ပြန်ကြားရေးဝန်ကြီးဟောင်း ဦးရဲထွဋ်ကို စစ်တပ်က ဖမ်းဆီးစဥ်ကလည်း ဒေါက်တာနေစိုးမောင်ကိုပါ ဖမ်းဆီးဖို့ စစ်ကောင်စီလော်ဘီတွေက လှုံ့ဆော်ခဲ့ကြဖူးတယ်။
ဒါပေမယ့် အခုတော့ ဒေါက်တာနေစိုးမောင်ကို စစ်ကောင်စီက ပေါ်ပေါ်တင်တင်ပဲ ခဏလိုက်ခဲ့ပါဦးဆိုပြီး ကားပေါ်ခေါ်တင်သွားခဲ့တယ်လို့ဆိုပါတယ်။ဒါပေမယ့် စစ်အာဏာရှင်တွေဟာ ကောက်ကျစ်စဥ်းလဲ ဉာဏ်များလေ့ရှိတာကြောင့် ဒီဖြစ်ရပ်အပေါ် ပြည်သူတွေတချို့က ဇာတ်လမ်းဆင်တာလို့ယူဆပြီး သံသယနဲ့ ကြည့်နေကြပါတယ် ။
ဒါကြောင့် ပြန်ဝန်ဟောင်း ဦးရဲထွဋ် အဖမ်းခံရတာရော ၊အခု ဒေါက်တာနေစိုးမောင်အဖမ်းခံတာကိုရော တကယ်လား ၊စစ်အုပ်စုရဲ့ မာယာလားလို့သံသယဝင်နေသူအများအပြားရှိနေဆဲပါ။
အောက်တိုဘာလလယ်ပိုင်းမှာ ဒေါက်တာနေစိုးမောင်ကို ဖမ်းဆီးတယ်၊ ခံဝန်နဲ့ပြန်လွှတ်တယ်ဆိုတဲ့ သတင်းတွေ ထွက်ပေါ်လာခဲ့ပေမယ့် ဒီတကြိမ်မှာတော့ စစ်ကောင်စီကိုယ်တိုင်က ဖမ်းဆီးထားပြီဖြစ်တယ်လို့ တရားဝင်အသိပေးလာခဲ့တာပါ။
စစ်ကောင်စီဟာ ထုံးစံအတိုင်း ဒေါက်တာနေစိုးမောင်ကို သူတို့လက်ထဲရှိတဲ့ဥပဒေတွေနဲ့အရေးယူဖို့ပြင်ဆင်နေပြီး ပိုင်ဆိုင်မှုတွေပါ သိမ်းလို့ရတဲ့အကြောင်း ထုတ်ပြန်ချက်မှာ ခြိမ်းခြောက်ထားပါသေးတယ်။
တကယ်တော့ စစ်အာဏာရှင်တွေဟာ အရင်ကလည်း အာဏာရှင်ဟောင်းကို အာဏာရှင်လက်သစ်တွေကအရေးယူဖူးတဲ့အစဥ်အလာရှိပါတယ်။
ဦးသန်းရွှေကိုယ်တိုင် ၂၀၀၂ ခုနှစ် မတ်လတုန်းက အာဏာရှင်ဟောင်း ဦးနေဝင်းရဲ့ သားမက်၊ သားတွေကို အာဏာသိမ်းရန် ကြံစည်မှု၊ တပ်တွင်း သွေးခွဲ၍ ပဋိပက္ခဖြစ်စေရန် လှုပ်ရှားလုပ်ကိုင်မှုတွေကြောင့်ဆိုပြီး သေဒဏ်ချမှတ်ခဲ့ဖူးပါတယ်။ ဦးနေဝင်းရဲ့သမီး ဒေါ်စန္ဒာဝင်းကို နေအိမ်အကျယ်ချုပ်ချခဲ့တာပါ။
ဒါကြောင့် အခုတခါ အာဏာရှင်ဟောင်းဦးသန်းရွှေ သားမက်ကို အာဏာရှင်လက်သစ် ဗိုလ်ချုပ်မှူးကြီးမင်းအောင်လှိုင်က အရေးယူတာဟာ ဝဋ်လည်တာလို့ ပြည်သူအချို့ကပြောပါတယ်။
“ဒင်းတို့ဝဋ်လည်တာ ငါတို့နှင့်မဆိုင်။ ငါတို့အလုပ် ငါတို့ဆက်လုပ်မယ်”လို့ ပြည်သူတဦးက ပြောပါတယ်။
တကယ်တော့ အာဏာရှင်ဟောင်းဦးသန်းရွှေဟာ အာဏာရှင်လက်သစ်ကို လွန်ခဲ့တဲ့ ၂ လကျော်ကပဲကူညီပေးခဲ့သူပါ ။ နှစ်ပေါင်းများစွာလူမြင်ကွင်းကပျောက်နေတဲ့ အာဏာရှင်းဟောင်းဟာ ၂၀၂၄ သြဂုတ် ၁၅ ရက်မှာ လူမြင်ကွင်းမှာ ပြန်ပေါ်ထွက်လာပါတယ်။
တရုတ်နိုင်ငံခြားရေးဝန်ကြီး ဝန်ယိနေပြည်တော်ခရီးစဥ်မှာ အာဏာရှင်ဟောင်း ဗိုလ်ချုပ်မှူးကြီးသန်းရွှေက “မြန်မာနိုင်ငံ၏ ပြည်ပဝင်ရောက်စွက်ဖက်မှု ကာကွယ်ရေး နှင့် ပြည်တွင်းတည်ငြိမ်မှုကို ထိန်းသိမ်းကာကွယ်ရေးတွင် ကူညီပေးရန်အတွက် တရုတ်နိုင်ငံက တန်ဖိုးရှိသော ထောက်ခံအားပေးမှုများ ဆက်လက်ထောက်ပံ့သွားရန် မျှော်လင့်ကြောင်း”ဆိုပြီး စစ်အာဏာရှင်စနစ်ကို တရုတ်အစိုးရကဆက်ခံထောက်ဖို့ ပြောခဲ့ပါတယ် ။
အဲလိုပြောပြီး နှစ်လအကြာမှာပဲ အာဏာရှင်လက်သစ်ကကျေးဇူးဆပ်တာပါ ။ဒါအပြင် မင်းအောင်လှိုင်ဟာ ဦးသန်းရွှေအပါအဝင် ၊ဦးမောင်အေး ၊ဦးသိန်းစိန်တို့ကိုလည်း သူတို့နေအိမ်တွေကို အနီးကပ်စောင့်ကြည့်ခိုင်းထားတယ်လို့ ဒီနှစ်ထဲမှာသတင်းတွေထွက်ခဲ့ပါတယ်။
တကယ်တော့ ဗိုလ်ချုပ်မှူးကြီးသန်းရွှေဟာ ၂၀၁၁ အနားမယူခင်မှာ ဗိုလ်ချုပ်ကြီးရွှေမန်းကိုကျော်ပြီး မင်းအောင်လှိုင်ကို တပ်ချုပ်ရာထူးပေးခဲ့သူလည်းဖြစ်ပါတယ်။ ဒါကြောင့် မင်းအောင်လှိုင်ကို စစ်အာဏာရှင် ဖြစ်အောင်လုပ်ပေးလိုက်သူဟာ ဦးသန်းရွှေကိုယ်တိုင်ပါပဲ။
ဗိုလ်ချုပ်နေဝင်း ၊ ဗိုလ်ချုပ်မှူးကြီးသန်းရွှေ ၊ဗိုလ်ချုပ်မှူးကြီး မင်းအောင်လှိုင်တို့အားလုံးတူညီတာဟာ တိုင်းပြည်ကို ဖျက်ဆီးပြီး ၊ပြည်သူများစွာရဲ့အသက်တွေကိုသေစေခဲ့တဲ့စစ်ရာဇဝတ်သားတွေချည်းပဲဖြစ်ပါတယ် ။ဒါပေမယ့် အာဏာသိမ်းပြီး ၃ နှစ်ကျော်အတွင်းမှာပဲ တိုင်းပြည်ကို မီးဟုန်းဟုန်းတောက်စေပြီး ဆင်းရဲမွဲတေမှုထောင်ချောက် ၊အဆုံးမဲ့နေဆဲ စစ်ပွဲတွေကိုဖန်တီးခဲ့တဲ့ မင်းအောင်လှိုင်ကတော့ ရှေ့က သူ့ဆရာ နှစ်ယောက်ထက် အဖျက်စွမ်းအားပိုကြီးပါတယ်။
ဒါကြောင့် သူတို့အသိုင်းအဝိုင်းအတွင်းဖြစ်တာတွေဟာ အမှန်လား ၊အာရုံပြောင်းတဲ့ လှည့်ကွက်တွေလားဆိုပြီး ပြည်သူတွေကတော့သတိထားကြည့်နေကြပါတယ်။
ဒါအပြင် မင်းအောင်လှိုင်ဟာ အာဏာသိမ်းဖော် သိမ်းဖက် တွေ ၊သူ့ရဲ့လက်အောက် ငယ်သားတွေကိုလည်း သူ့အာဏာထိပါးလာနိုင်ရင် မညှာသလို ၊အပစ်ပုံချဖို့လည်း ဝန်မလေးသူဖြစ်ပါတယ် ။အာဏာအတူသိမ်းခဲ့ကြတဲ့အထဲက ပြည်ထဲရေးဝန်ကြီး ဒုတိယဗိုလ်ချုပ်ကြီးစိုးထွဋ် ၊ သူအားထားခဲ့တဲ့ ဒုတိယဗိုလ်ချုပ်ကြီး မိုးမြင့်ထွန်း တို့အပါအဝင် စစ်ဗိုလ်ချုပ်တွေကို ထောင်သွင်းအကျဥ်းချဖို့လည်း လက်မရွံ့သူပါ။
ဒါကြောင့် ပြည်သူ တစ်ဦးက “သူ့ရဲ့အကြပ်တည်းထွက်ပေါက်အသုံးချနိုင်ငံရေး လှည့်ကွက်အာရုံပြောင်းတာ” လို့ သုံးသပ်ပါတယ်။
အခြားပြည်သူတဦးကလည်း “အာဏာရှင်ဆိုတာ လုပ်ခြင်ရာလုပ်မှာပဲ အလှည့်ကျရင်တော့ မနွဲ့စတမ်းပေါ့” လို့ မှတ်ချက်ပြုပါတယ်။ ။
