ပူတင်ကို ရူးနေပြီလို့ ထရမ့်ဝေဖန်၊ ထရမ့်က စိတ်ခံစားမှု လွန်ကဲနေတယ်လို့ ရုရှားတုံ့ပြန်

ဗလာဒီမာ ပူတင်ဟာ ရူးနှမ်းနေပြီလို့ ဝေဖန် ပြောဆိုခဲ့တဲ့ ဒေါ်နယ်လ်ထရမ့်ဟာ စိတ်ခံစားမှု လွန်ကဲနေတယ်လို့ ရုရှားအစိုးရက တုံ့ပြန်ခဲ့ပါတယ်။

ပြီးခဲ့တဲ့ သီတင်းပတ်ကုန်က ရုရှားဟာ စစ်ပွဲကာလတလျှောက် အကြီးမားဆုံး လေကြောင်းတိုက်ခိုက်မှုအဖြစ် ယူကရိန်းနိုင်ငံ အနှံ့ကို ဒရုန်းတွေ၊ ဒုံးကျည်တွေ အုံလိုက်ကျင်းလိုက် ပစ်ခတ်ခဲ့ပါတယ်။ ဒရုန်းနဲ့ ဒုံးကျည် စုစုပေါင်း ၃၆၇ စင်းကို စုပြုံပစ်လွှတ်ခဲ့တဲ့ ရုရှားရဲ့ တိုက်ခိုက်မှုကြောင့် ယူကရိန်းမှာ လူ ၁၃ ဦးသေဆုံးခဲ့ပါတယ်။

သမ္မတထရမ့်ရဲ့ အမေရိကန် အစိုးရက ရုရှားနဲ့ ယူကရိန်းကြား စစ်ပွဲကို ရပ်ဆိုင်းဖို့ နှစ်ဖက်စလုံးကို ဖိအားပေးနေတဲ့ အချိန်မှာပဲ ရုရှားက အခုလို ရက်စက် ကြမ်းတမ်းတဲ့ တိုက်ခိုက်မှုမျိုးကို လုပ်ဆောင်ခဲ့တာ ဖြစ်ပါတယ်။

သူဟာ ရုရှားသမ္မတ ပူတင်နဲ့ ကောင်းမွန်တဲ့ ဆက်ဆံရေးမျိုး အမြဲတမ်း ထားရှိနိုင်ခဲ့ကြောင်း၊ ဒါပေမဲ့ အခုတော့ ပူတင်မှာ တစ်ခုခု ဖြစ်နေတယ်လို့ ထင်လာကြောင်း၊ ပူတင်ဟာ လုံးဝဥဿုံ ရူးသွားကြောင်း၊ မလိုအပ်ဘဲ လူတွေအများကြီးကို ပူတင်က သတ်ဖြတ်နေပြီး အဲဒါဟာ စစ်သားတွေတင် မကကြောင်း၊ ပူတင်ဟာ အကြောင်းပြချက် မယ်မယ်ရရ မရှိဘဲ ယူကရိန်းရဲ့ မြို့တွေကို ဒုံးကျည်တွေ ဒရုန်းတွေနဲ့ ပစ်ခတ်နေကြောင်း မေလ ၂၆ ရက်နေ့မှာတော့ ထရမ့်က သူတည်ထောင်ထားတဲ့ လူမှုကွန်ရက် မီဒီယာ Truthမှာ ရေးသားထားခဲ့ပါတယ်။

Public Service Announcement

အဲဒီ မတိုင်ခင်မှာလည်း ထရမ့်က ပူတင်လုပ်နေတဲ့ ကိစ္စတွေအတွက် သူမပျော်ကြောင်း၊ ပူတင်ဟာ လူတွေ အများကြီးကို သတ်ဖြတ်နေပြီး ပူတင်က ဘာတွေဖြစ်နေမှန်း သူမသိတော့ကြောင်း သတင်းထောက်တွေကို ပြောခဲ့ပါသေးတယ်။

ရုရှားသမ္မတ ရုံးစိုက်ရာ ကရင်မလင် နန်းတော်ရဲ့ ပြောရေးဆိုခွင့်ရ အရာရှိ ဒီမစ်ထရီ ပက်စ်ကော့ဗ်ကတော့ ထရမ့် ပြောဆိုခဲ့တဲ့ စကားတွေဟာ ဆက်စပ်ပါဝင်သူတွေ အားလုံးရဲ့ စိတ်ခံစားချက် လွန်ကဲမှုကနေ ထွက်ပေါ်လာတာမျိုး ဖြစ်တယ်လို့ တုံ့ပြန်ခဲ့ပါတယ်။

ရုရှားအနေနဲ့ကတော့ ယူကရိန်းနဲ့ စေ့စပ်ဆွေးနွေးမှုတွေ အထမြောက်စေဖို့ သမ္မတ ထရမ့်နဲ့ အမေရိကန်နိုင်ငံရဲ့ အားစိုက်ခွန်စိုက် ပါဝင်နေမှုကို အမြဲတမ်း ကျေးဇူးတင်နေမှာ ဖြစ်ကြောင်း၊ တစ်ချိန်တည်းမှာပဲ အခုလိုမျိုး အရမ်းအရေးကြီးတဲ့ ကာလမျိုးမှာ ဆက်နွှယ်ပတ်သက်သူတိုင်းက စိတ်ခံစားချက် လွန်ကဲနေပြီး ခံစားချက်ကို အလွန်အကျွံ ဖော်ပြတဲ့ တုံ့ပြန်မှုမျိုးတွေ ဖော်ပြလာတတ်ကြောင်းလည်း ပက်စ်ကော့ဗ်က ဆိုပါတယ်။

အစောပိုင်းတုန်းက ထရမ့်ဟာ ပူတင်တစ်ယောက်တည်းကိုပဲ ပစ်မှတ်ထား ထိုးနှက်ခဲ့တာ မဟုတ်ဘဲ ယူကရိန်း သမ္မတ ဗိုလိုဒီမာ ဇီလန်စကီးကိုလည်း ဝေဖန် တိုက်ခိုက်ခဲ့ပါတယ်။ ဇီလန်စကီးက အမေရိကန်ရဲ့ နှုတ်ဆိတ်နေမှုကြောင့်သာ ရုရှားက ပိုအတင့်ရဲပြီး ရက်စက်ကြမ်းကြုတ်တဲ့ လုပ်ရပ်တွေကို ပြောင်ပြောင်တင်းတင်း ကျူးလွန်နေတာလို့ ဝေဖန်ခဲ့ပါတယ်။ ဒီစကားနဲ့ ပတ်သက်ပြီး ထရမ့်က ဇီလန်စကီး ပြောဆိုနေတဲ့ ပုံစံတွေဟာ သူ့နိုင်ငံ ယူကရိန်းအတွက် ဘာကောင်းကျိုးမှ ဖြစ်စေမှာ မဟုတ်ကြောင်း၊ ဇီလန်စကီးရဲ့ ပါးစပ်က ထွက်ကျလာသမျှ စကားလုံးတွေဟာ ပြဿနာတွေဆီ ဦးတည်နေကြောင်း၊ ဒါကို သူလုံးဝ သဘောမကျကြောင်း၊ ဇီလန်စကီးအနေနဲ့ ပါးစပ်ပိတ်ထားတာ ပိုကောင်းကြောင်း ထရမ့်က ဆိုပါတယ်။

ထရမ့်ဟာ စစ်ရပ်ဆိုင်းရေး ကိစ္စအတွက် နှစ်ဖက်စလုံးကို အပြင်းအထန် ဖိအားပေး တောင်းဆိုနေပေမယ့်လည်း လက်တွေ့ အခြေအနေတွေအရ ထင်ရှားမြင်သာတဲ့ ဘာတိုးတက်မှု လက္ခဏာမှ မတွေ့သေးကြောင်း လေ့လာစောင့်ကြည့်သူတွေက မှတ်ချက်ပေးထားကြပါတယ်။

ကိုးကား: BBC