ဇူလိုင်-၂၃၊ ၂၀၂၅။ထားမြတ်/People’s Spring
တနိုင်းမြို့နယ်အတွင်း ကချင်လွတ်လပ်ရေးတပ်မတော်(KIA) ထိန်းချုပ်ထားသည့် နယ်မြေ၌ ဝင်ရောက်တပ်စွဲထားသည့် နာဂလက်နက်ကိုင်တပ် NSCN-K(Yung Aung) တပ်ဖွဲ့ဝင်များကို ဖမ်းဆီးထိန်းသိမ်းထားကြောင်း KIAက အတည်ပြုသည်။
ဇူလိုင် ၁၈ရက်တွင် တနိုင်းမြို့နယ် တလူးကျေးရွာအနီးဂိတ်ဖွင့်ထားသည့် နာဂါလက်နက်ကိုင်ရဲဘော်များအား လက်နက်များနှင့်အတူ KIAက ဖမ်းဆီးသွားသည်ဆိုသောသတင်းနှင့်ပတ်သက်၍ မေးမြန်းရာ KIA သတင်းပြန်ကြားရေးဌာန တာဝန်ခံ ဗိုလ်မှူးကြီးနော်ဘူက အထက်ပါအတိုင်းအတည်ပြုခြင်းဖြစ်သည်။
“သူတို့ကတော့ကျနော်တို့ရဲ့ ထိန်းချုပ်နယ်မြေဖြစ်နေတဲ့တနိုင်းဘက်ကရှင်ဗွေယန်ခရိုင်ပေါ့။အဲဒီအထဲမှာ သူတို့ကကျနော်တို့နယ်မြေထဲမှာတပ်စခန်းတွေချတယ်။နောက်ဂိတ်တွေဖွင့်ပြီးမှအခွန်အကောက်တွေ ကောက်လာကြတယ်။ အဲဒီလိုလုပ်တာကို ကျနော်တို့ဘက်က နယ်ကျော်ပြီးမလုပ်ကြဖို့ အကြိမ်ကြိမ်သူတို့ကိုပြောတာတွေရှိတယ် ဆွေးနွေးတာတွေရှိတယ်။ စာပိုပြီး သူတို့ကို ရှင်းပြတာတွေလည်းရှိခဲ့ပါတယ်”ဟု ဗိုလ်မှူးကြီးနော်ဘူက ပြောသည်။
Public Service Announcement
သို့သော် နာဂတပ်ဖွဲ့ဘက်ကဂိတ်ပြန်ရုတ်သိမ်းခြင်းမရှိဘဲ အခွန်ဆက်ကောက်နေခဲ့ဟု၎င်းက ဆိုသည်။
“ဒါကြောင့် ကျနော်တို့ အဖွဲ့တွေက ဇူလိုင်လ ၁၈ရက်နေ့မှာ သူတို့ရဲ့ စခန်းတွေကို အားလုံးထိန်းထိန်းသိမ်းသိမ်း လုပ်ထားတာဖြစ်ပါတယ်။ သူတို့ရဲဘော်တွေကိုလည်း ထိန်းထိန်းသိမ်းသိမ်းလုပ်ထားတာဖြစ်ပါတယ်။အခြား ပြဿနာတွေမရှိပါဘူး။ သူတို့လည်း ပစ်ခတ်တာတွေမရှိပါဘူး” ဟု ဗိုလ်မှူးကြီးနော်ဘူက ပြောသည်။
ထိုသို့ ဗိုလ်ချုပ်ယုံးအောင်ဦးစီးသည့် NSCN-K (Yung Aung) ရဲဘော်များဖမ်းဆီးခံရမှု နှင့်ပတ်သက်၍ နာဂကျောင်းသားအဖွဲ့အစည်း(NSO)က KIAသို့ လိပ်မူသည့် အိတ်ဖွင့် ပေးစာတစ်စောင်ကို ဇူလိုင် ၂၂ရက်တွင် ထုတ်ပြန်ခဲ့ရာ KIA၏ လုပ်ရပ်ကို ရှုတ်ချကြောင်း ဖော်ပြထားပြီး နာဂတပ်ဖွဲ့ဝင်များနှင့် သိမ်းဆည်းထားသော လက်နက်များနှင့်အတူပြန်လွှတ်ပေးရန်တောင်းဆိုခဲ့သည်။
