ဇူလိုင်-၂၀၊ ၂၀၂၅။ရဲခေါင်/People’s Spring
မွန်ပြည်နယ်၊ ရေးမြို့နယ်အခြေစိုက် အမှတ်(၁၉)စစ်ဆင်ရေးကွပ်ကဲမှုဌာနချုပ်(စကစ-၁၉)မှ ထွက်ပြေးလာသူ သုံးဦးကို ကယ်တင်နိုင်ခဲ့ကြောင်း ရေးဘီလူးအဖွဲ့ တာဝန်ရှိသူက လူထုနွေဦးသို့ ပြောသည်။
ထွက်ပြေးလာသူသုံးဦးသည် စစ်ကောင်စီ၏ စစ်မှုထမ်းဥပဒေဖြင့် အဓမ္မတပ်သားစုဆောင်းခံရသူများဖြစ်ကြောင်း အသိပေးသည်။
“သူတို့တွေက ဇူလိုင် ၆ ရက်ကစ ပြေးတယ်။ကျွန်တော်တို့ဆီကို ဇူလိုင် ၁၈ ရက်မှာ ရောက်တယ်။အချိန်က ကြားကြားထဲမှာ သူတို့ဒုက္ခရောက်ကာလ များခဲ့တယ်သူတို့က ကျွန်တော်တို့နဲ့ချိတ်ဆက်ပြီး ထွက်ပြေးလာခဲ့တာ မဟုတ်ဘူး။သူတို့ပြေးလာရင်း ကျွန်တော်တို့ ရပ်ဝန်းထဲရောက်မှ ကယ်ထုတ်ပေးရတာဖြစ်တယ်”ဟု ရေးဘီလူးအဖွဲ့ခေါင်းဆောင်က ဖြစ်စဥ်အပေါ် ရှင်းပြသည်။
Public Service Announcement
ကယ်တင်ခဲ့သူသုံးဦးသည် စစ်ကောင်စီ၏ စစ်မှုထမ်းအပတ်စဥ်(၆)မှ အောင်စိုးမင်း၊အပတ်စဥ်(၇)မှ ဝေယံအောင်နှင့် ပြည့်ဖုန်းစံ တို့ဖြစ်သည်။
၎င်းတို့အနက် နှစ်ဦးမှာ ထိုင်းနိုင်ငံတွင် ဖမ်းဆီးခံရပြီး မြန်မာနိုင်ငံသို့ ပြန်ပို့ခဲ့ရာတွင် စစ်ကောင်စီက စစ်မှုထမ်းတပ်သားအဖြစ် စုဆောင်းခံရသူဖြစ်သည်ဟု ဆိုသည်။
အခြေစိုက်တပ်များစွာရှိသည့် ရေးမြို့နယ်တွင် စစ်ကောင်စီက စစ်မှုထမ်းဥပဒေဖြင့် အဓမ္မစုဆောင်း ထားသည့် တပ်သားသစ်များဖြင့် အားဖြည့်နေကြောင်း ရေးမြို့တွင် စစ်ရေးဖော်ဆောင်နေသော ရေးဘီလူးက ပြောထားသည်။
ရေးမြို့နယ်တွင် စစ်ကောင်စီ၏ အမှတ်(၁၉) စစ်ဆင်ရေးကွပ်ကဲမှုဌာနချုပ်(စကခ ၁၉)နှင့် လက် အောက်ခံ တပ်ရင်းများဖြစ်သည့် ခလရ-၆၁၊ ခလရ -၂၉၉၊ ခမရ -၃၄၃ ၊ ခမရ -၅၈၆၊ ခမရ -၂၈၇တပ်ရင်းနှင့် အမှတ်(၃၁၆)အမြောက်တပ်ရင်း (အမတ-၃၁၆)တို့ ရှိသည်။
