ဇူလိုင် – ၁၉ ၊၂၀၂၅/People’s Spring
ဒီနေ့မှာ ကျရောက်တဲ့ အာဇာနည်နေ့ အခမ်းအနားကို စစ်ကောင်စီ ဟာ ဗိုလ်ချုပ်အောင်ဆန်းရဲ့ သမီးဖြစ်သူ ဒေါ်အောင်ဆန်းစုကြည်ကို ယခင်နှစ်တွေနည်းတူ တက်ရောက်ခွင့် မပေးခဲ့တာကို စစ်ကောင်စီက ထုတ်လွင့်တဲ့ အာဇာနည်နေ့ အခမ်းအနား မြင်ကွင်းအရ သိရပါတယ်။
ဒါဟာ ဒီနှစ်နဲ့ ဆိုရင် စစ်တပ်အာဏာသိမ်းပြီးနောက် အာဇာနည်နေ့ အခမ်းအနားကို ဒေါ်အောင်ဆန်းစုကြည် တက်ခွင့်မရတာဟာ ၅ နှစ်ရှိလာတာပါ။
စစ်တပ်ရဲ့ တကျော့ပြန်အာဏာသိမ်းထားချိန်အတွင်း အာဇာနည်နေ့ အခမ်းအနား တွေမှာ ဒေါ်အောင်ဆန်းစုကြည်ကို တက်ခွင့် မပေးသလို ကိုယ်စား လွမ်းသူပန်းခွေချခွင့်လည်းမပေးပါဘူး။
Public Service Announcement
ဒီနှစ် အာဇာနည်နေ့ကို အာဏာသိမ်းစစ်ခေါင်းဆောင် လည်း တက်ရောက်လာပါတယ်။ ဒါဟာ အာဏာသိမ်းပြီးနောက် ပထမဆုံးအကြိမ် အဖြစ် အာဇာနည်နေ့ အခမ်းအနားမှာလူလုံးထွက်ပြတာလည်းဖြစ်ပါတယ်။
အရင်နှစ်တွေကတော့ စစ်တပ်ရဲ့ နံပါတ်သုံး အဆင့်ရှိသူ ကြည်း၊ ရေ ၊ လေ ကွပ်ကဲရေးမှူး ဗိုလ်ချုပ်ကြီးအဆင့်သာ တက်ရောက်စေခဲ့တာပါ။ ရွေးကောက်ခံ NLD အရပ်သားအစိုးရ လက်ထက်က အာဇာနည်နေ့ အခမ်းအနားကို သမ္မတ ကိုယ်တိုင် တက်ရောက်ပြီး အာဇာနည်ခေါင်းဆောင်ကြီးတွေကို ဂါရဝပြုတာပါ။
အာဏာသိမ်းစစ်ခေါင်းဆောင်က အာဇာနည်နေ့ကို သူကိုယ်တိုင်တက်ရောက်ပေမယ့် ဗိုလ်ချုပ်အောင်ဆန်းရဲ့ သမီးဖြစ်သူကို တက်ရောက်ခွင့်မပေးဘဲ ဖမ်းဆီးအကျဉ်းချ ချုပ်နှောင်ထားပါတယ်။ အခုနှစ်နဲ့ဆိုရင် စစ်တပ် တကျော့ပြန်အာဏာသိမ်းပြီးနောက် အာဇာနည်နေ့ အခမ်းအနားမှာ ဒေါ်အောင်ဆန်းစုကြည်ကို လူထုက တွေ့မြင်ခွင့်မရတာ ၅ နှစ်မြောက်လည်းဖြစ်ပါတယ်။
ယခင် စစ်အစိုးရ လက်ထက်က နေအိမ်အကျယ်ချုပ်ချထားတဲ့ ဒေါ်အောင်ဆန်းစုကြည်ကို အာဇာနည်နေ့ အခမ်းအနား တက်ခွင့် ပေးခဲ့ပြီး လူထုက ဇူလိုင် ၁၉ ရက် ရောက်တိုင်း ဒေါ်အောင်ဆန်းစုကြည်ကို မြင်တွေ့ရဖို့ စစ်တပ်ရဲ့ ညပိုင်း ရုပ်မြင်သံကြားသတင်းကို စောင့်ကြည်ခဲ့ရတာပါ။
တကျော့ပြန် စစ်တပ်အာဏာသိမ်းချိန်မှာတော့ စစ်ကောင်စီ က ဒေါ်အောင်ဆန်းစုကြည်ကို နေအိမ်အကျယ်ချုပ်မထားတဲ့အပြင် ပုဒ်မမျိုးစုံနဲ့ ထောင်ဒဏ် နှစ် ၃၀ ကျော် ချပြီး ထောင်တွင်းအကျဉ်းချထားတာပါ။
ဒေါ်အောင်ဆန်းစုကြည်ကို ဘယ်နေရာမှာ အကျဉ်းချထားဆိုတာကိုလည်း စစ်ကောင်စီက အများပြည်သူသိရှိအောင် ထုတ်ပြောတာမရှိပါဘူး။
