ဇေအောင်/People’s Spring
စစ်ကိုင်းတိုင်း၊ ရွှေဘိုမြို့နယ်၊ မြင်းချင်းပျူစောထီးကျေးရွာရှိ စစ်ကောင်စီအထိုင်စခန်းအား တော်လှန်ရေးတပ်ဖွဲ့များက ဝင်ရောက်တိုက်ခိုက်ရာ နှစ်ဘက်ထိခိုက်မှုရှိကြောင်း သတင်းရရှိသည်။
အောက်တိုဘာ ၁၅ ရက် ညနေ ၆ နာရီခန့်မှစ၍ မြင်းချင်းပျူစောထီးရွာစခန်းအား တော်လှန်ရေးတပ်ဖွဲ့များက စတင် တိုက်ခိုက်ခဲ့ခြင်းဖြစ်သည်။
Public Service Announcement
ထို့နောက် ကျေးရွာအတွင်းရှိ စစ်ကောင်စီတပ်ကလည်း ပြန်လည်ပစ်ခတ်ရာ ၁နာရီကျော်ကြာ တိုက်ပွဲဖြစ်ပွားခဲ့ကြောင်း အဖြူရောင်ပြည်သူ့ကာကွယ်ရေးအဖွဲ့၏ တာဝန်ရှိသူက ပြောသည်။
တိုက်ပွဲအတွင်း စစ်ကောင်စီတပ်သား ၅ ဦး သေဆုံးကာ ၁၀ ဦးကျော်ဒဏ်ရာရရှိခဲ့ကြောင်း၊ တော်လှန်ရေးတပ်ဖွဲ့များဘက်ကလည်း ရဲဘော် ၅ဦး ဒဏ်ရာရရှိခဲ့ကြောင်း အထက်ပါတာဝန်ရှိသူက ဆိုသည်။
“လက်နက်ကမရပါဘူး။ အပြီးသက်သိမ်းနိုင်တဲ့အခြေအနေထိမရောက်ခဲ့ပါဘူး။ပွဲချိန်ကြာတာရောရဲဘော်တွေထိခိုက်တာရောကြောင့်ပြန်ဆုတ်ခွာခဲ့တာပါ။”ဟု အဖြူရောင်ပြည်သူ့ကာကွယ်ရေးအဖွဲ့၏ တာဝန်ရှိသူက ပြောသည်။
မြင်းချင်းပျူစောထီးရွာသို့ စစ်ကူသွားမည့် ပန်းရံပျူစောထီးရွာမှ စစ်အုပ်စုကိုလည်း ဒရုန်းဖြင့် ဗုံးသီးများ ကြဲချတိုက်ခိုက်ခဲ့ရာ စစ်ကူမဝင်နိုင်တော့ဘဲ လက်နက်ကြီးများဖြင့်သာ ပစ်ခက်တိုက်ခိုက်ခဲ့ကြောင်း တော်လှန်ရေးတပ်ဖွဲ့များက ပြောသည်။
အဆိုပါ စစ်ဆင်ရေးကို ဒီပဲယင်းမြို့နယ်ပကဖ (G1/3) ရွှေဘိုမြို့နယ် ပကဖ PDO တိုက်ခိုက်ရေးအဖွဲ့၊ မြို့နယ် PDO Drone အဖွဲ့၊ တိုက်နယ်-၂ပကဖ ၊တိုက်နယ်-၃ပကဖ၊ တိုက်နယ်-၅ ပကဖ၊ ညောင်ဦး ပကဖ၊ ဂဠုန်ကြီး Fixed Wings Drone အဖွဲ့ ၊ အားမာန် Fixed Wings Drone အဖွဲ့ ၊ IC Fixed Wings Drone အဖွဲ့ ၊ ဘီလူးညီနောင် Fixed Wings Drone အဖွဲ့၊ နှင့် နယ်မြေခံ ပကဖ က များပူးပေါင်းတိုက်ခိုက်ခဲ့ကြောင်း သိရသည်။
စစ်ကောင်စီတပ်နှင့်ပျူစောထီးများတပ်စွဲထားသည့် မြင်းချင်းပျူောထီးရွာကို ၂၀၂၃ ခုနှစ် ဒီဇင်ဘာကလည်းတိုက်ခိုက်ခဲ့ရာ ပျူစောထီးမိသားစုဝင် ၆၀ ဝန်းကျင် ဖမ်းဆီးရမိခဲ့ဖူးသည်။
သို့သော် ယခုနှစ်ဆန်းပိုင်းတွင် စစ်ကောင်စီတပ်က မြင်းချင်းပျူရွာ၌ ပြန်လည်တပ်စွဲခဲ့၍ တော်လှန်ရေးတပ်ဖွဲ့များက သုံးကြိမ်ထက်မနည်း ထပ်မံတိုက်ခိုက်ခဲ့သေးသည်။
