ကမ္ဘောဒီးယား နိုင်ငံမှာ တည်ရှိပြီး ကမ္ဘာ့အံ့ဖွယ် အထင်ကရ အဆောက်အအုံ တစ်ခုအဖြစ် သတ်မှတ်ခံရတဲ့ အန်ကောဝတ် ဘုရားကျောင်းဝင်းထဲမှာ မိုးကြိုးပစ်ခဲ့ရာက ထိခိုက်သေဆုံးမှုတွေ ရှိခဲ့ကြောင်း သိရပါတယ်။
မေလ ၁၆ ရက်နေ့ နေ့လယ်ပိုင်းက ရင်ပြင်ပေါ်မှာ ကမ္ဘောဒီးယား နိုင်ငံသားတွေက ရိုးရာ ဘာသာရေး ပွဲတစ်ခု ပြုလုပ်နေချိန် မိုးကြိုးပစ်ချခဲ့တာလို့ ဆိုပါတယ်။ ယူနက်စကိုရဲ့ ကမ္ဘာ့ယဉ်ကျေးမှု အမွေအနှစ် စာရင်းမှာ ပါဝင်တဲ့ ရှေးဘုရားကျောင်းကြီးဟာ နိုင်ငံခြား ခရီးသွား ဧည့်သည်တွေနဲ့လည်း စည်ကားနေလေ့ရှိတဲ့ နေရာတစ်ခုပါ။
ကနဦး စစ်ဆေး တွေ့ရှိချက်တွေအရ ထိခိုက် သေဆုံးသူတွေဟာ ဖနွမ်ပင်နဲ့ ကမ်ပေါ့ ဒေသတွေကနေ လာရောက်တဲ့ ကမ္ဘောဒီးယား နိုင်ငံသားတွေဖြစ်ကြောင်း စုံစမ်း သိရှိထားပါတယ်။ ထိုင်းနိုင်ငံ အခြေစိုက် Khaosod သတင်းဌာနက စုစုပေါင်း ၃ ဦးသေဆုံးခဲ့ပြီး ၁၀ ဦး ဒဏ်ရာရခဲ့ကြောင်း ဖော်ပြထားခဲ့ပါတယ်။
မိုးကြိုးပစ်ချတဲ့ သတင်းကို ကြားကြားချင်း အရေးပေါ် ကယ်ဆယ်ရေး အဖွဲ့တွေဟာ ဘုရားကျောင်းဝင်းထဲ အဆောတလျင် သွားရောက်ခဲ့ပြီး ဒဏ်ရာရထားသူတွေကို ဆေးရုံပို့ဆောင်ပေးခဲ့ပါတယ်။
Public Service Announcement
ကမ္ဘောဒီးယား လူမှုကွန်ရက် သုံးစွဲသူတွေထဲက တချို့က ဒီသတင်းကြောင့် အန်ကောဝပ်ကို လာရောက်တဲ့ ခရီးသွားဧည့်သည်တွေ လျော့နည်းသွားနိုင်တဲ့အတွက် ထိမ်ချန်ထားသင့်တယ်လို့ ရေးသားနေကြောင်းလည်း Khaosodက ဖော်ပြခဲ့ပါတယ်။
အန်ကောဝပ်ဟာ ဟိန္ဒူနဲ့ ဗုဒ္ဓ ဘာသာရေး သမိုင်းကြောင်းတွေ ရောယှက်နေတဲ့ ဘုရားကျောင်းကြီးပါ။ စတင်တည်ဆောက်ချိန် ခရစ်သက္ကရာဇ် ၁၁၅၀ တုန်းက ဟိန္ဒူဘာသာရေးရဲ့ လောကကို ထိန်းသိမ်းရာ နတ်ဘုရား ဗိဿနိုးကို ဝတ်ပြုဖို့ ရည်ရွယ်တဲ့ ဘုရားကျောင်း ဖြစ်ခဲ့ပေမယ့် နောက်ပိုင်းမှာ ဗုဒ္ဓဘာသာ ဘုရားကျောင်း တစ်ခုအဖြစ် တဖြည်းဖြည်းချင်း ပြောင်းလဲလာခဲ့ပါတယ်။ ၄၀၂ ဧကနီးပါး ကျယ်ဝန်းတဲ့ ပရဝုဏ်မှာ တည်ရှိတဲ့ အန်ကောဝပ်ဟာ ကမ္ဘာပေါ်မှာ အကြီးမားဆုံး ဘာသာရေး အဆောက်အအုံ တစ်ခုလို့လည်း သတ်မှတ်နိုင်ပါတယ်။ အန်ကောဝပ်ဟာ ခမာယဉ်ကျေးမှုရဲ့ ဗိသုကာ အတတ်နဲ့ ယဉ်ကျေးမှုတွေကို ထင်ဟပ်စေပြီး ကမ္ဘောဒီးယား နိုင်ငံရဲ့ အလံမှာပါ ထည့်သွင်း ဖော်ပြခံရတဲ့ အထိမ်းအမှတ် သင်္ကေတလည်း ဖြစ်လာခဲ့ပါတယ်။
ကိုးကား: Khaosod
