အမေရိကန် သမ္မတ ဒေါ်နယ်လ်ထရမ့်ရဲ့ အလည်အပတ် ခရီးစဉ်ကြောင့် အာရပ်စော်ဘွားများ ပြည်ထောင်စု (ယူအေအီး) နိုင်ငံဟာ အထင်ကရ ရှိတ်ခ်ဇာယက်ဒ် မဟာဗလီကြီးကို ယာယီ ပိတ်ပေးခဲ့ပါတယ်။
အရှေ့အလယ်ပိုင်း ဒေသကို တရားဝင် အလည်အပတ် ခရီးစဉ် ရောက်ရှိနေတဲ့ ထရမ့်ဟာ မေလ ၁၅ ရက်နေ့က အဲဒီ ခမ်းနားထည်ဝါတဲ့ ဘာသာရေး အဆောက်အအုံကြီးထဲကို ရောက်ရှိခဲ့တာပါ။ ပုံမှန်အားဖြင့် ဗလီကြီးကို ပိတ်လေ့မရှိပေမယ့် လုံခြုံရေး အစီအမံတွေအရ ထရမ့်ရောက်နေတဲ့ အတောအတွင်းမှာတော့ အာဏာပိုင်တွေက မွတ်ဆလင် ဝတ်ပြုသူတွေ ဝင်ရောက်ခွင့်ကို ပထမဆုံးအကြိမ်အဖြစ် ယာယီ ကန့်သတ် တားဆီးထားခဲ့တာ ဖြစ်ပါတယ်။
ဒါဟာ ထရမ့်အတွက်လည်း ဗလီတစ်ခုထဲကို ပထမဆုံးအကြိမ် ရောက်ရှိဖူးတာ ဖြစ်နိုင်တယ်လို့ မီဒီယာတွေက ဖော်ပြထားပါတယ်။
အိမ်ဖြူတော် ပြောရေးဆိုခွင့်ရ အမျိုးသမီး ကာရိုလင်း လီယာဗတ်က သမ္မတ ထရမ့်ဟာ အဘူဒါဘီ မြို့တော်မှာရှိတဲ့ ရှိတ်ခ်ဇာယက်ဒ် ဗလီကြီးထဲကို အလည်အပတ် ရောက်ရှိခဲ့ပြီး အဲဒီ အထူးခရီးစဉ်အတွက် ယူအေအီး အစိုးရ အရာရှိတွေက ဗလီတစ်ခုလုံးကို ပိတ်ထားပေးခဲ့ကြောင်း လူမှုကွန်ရက် မီဒီယာ Xမှာ ရေးသားထားခဲ့ပါတယ်။ လူပုဂ္ဂိုလ် တစ်ဦးအတွက် ဗလီကို အခုလို ပိတ်ပေးတယ် ဆိုတာဟာ သမိုင်းတလျှောက် ပထမဆုံးဖြစ်ပြီး သမိုင်းဝင် အခိုက်အတန့် တစ်ခုလို့ သတ်မှတ်နိုင်ကြောင်း လီယာဗတ်က ဆိုပါတယ်။
Public Service Announcement
ထရမ့်ရဲ့ ဗလီ အလည်အပတ် ခရီးစဉ်ကို ယူအေအီး အိမ်ရှေ့မင်းသား ရှိတ်ခါလက်ဒ် ဘင်မိုဟာမက် ဘင်ဇာယက်ဒ် အယ်လ်နာယန်က အတူလိုက်ပါပေးခဲ့ပါတယ်။ ထရမ့်နဲ့ အမေရိကန် ကိုယ်စားလှယ် အဖွဲ့ဝင်တွေဟာ ဗလီကြီးရဲ့ ခန်းမဆောင်ထဲကိုရော၊ ကျယ်ဝန်းတဲ့ ပရဝုဏ်ထဲမှာပါ လှည့်လည် ကြည့်ရှုခဲ့တယ်လို့ ဒေသခံ မီဒီယာတွေက ဖော်ပြခဲ့ကြပါတယ်။
ထရမ့်ဟာ ချမ်းသာကြွယ်ဝတဲ့ အရှေ့အလယ်ပိုင်း ဒေသတွင်း နိုင်ငံတွေဆီကနေ အမေရိကန်မှာ ရင်းနှီးမြှုပ်နှံမှုတွေ ချဲ့ထွင်လာစေရေး ဆွဲဆောင် စည်းရုံးနိုင်ဖို့အတွက် သူ့ရဲ့ ဒုတိယ သမ္မတ သက်တမ်းအတွင်း ပထမဆုံး သံတမန်ရေး ခရီးစဉ်အနေနဲ့ အရှေ့အလယ်ပိုင်းကို ရောက်ရှိနေတာပါ။ သူဟာ ယူအေအီးနိုင်ငံ မတိုင်ခင်တုန်းက ဆော်ဒီအာရေးဘီးယားနဲ့ ကာတာတို့ကိုလည်း သွားရောက်ခဲ့ပြီး ဖြစ်ပါတယ်။
ကိုးကား: Times of India
