ဇူလိုင် – ၁၀၊၂၀၂၅/People’s Spring
ရဲဘော်အချို့ မူးယစ်ဆေးဝါးသယ်ယူတဲ့ဖြစ်စဉ်နဲ့ ပတ်သက်ပြီးဆောင်ရွက်သင့်တာ အားလုံးကို အမြန်ဆောင်ရွက်နေတယ်လို့ အမျိုးသားညီညွတ်ရေးအစိုးရ(NUG)၊ကာကွယ်ရေးဝန်ကြီးဌာန(MOD) ပြောရေးဆိုခွင့်ရှိသူ ဒုအတွင်းဝန်ဦးမောင်မောင်ဆွေက လူထုနွေဦးကို ပြောပါတယ်။
” ဒီအမှုကိစ္စနဲ့ပတ်သက်ပြီးတော့လေ ဆောင်ရွက်သင့်၊ ဆောင်ရွက်ထိုက်တဲ့ကိစ္စတွေ အားလုံးကို အမြန်ဆောင်ရွက်နေတာရှိပါတယ်နော်။ အဲဒီအပြင်ကို အသေးစိတ်ကတော့ ဒီအချိန်မှာပြောလို့ အဆင်မပြေသေးလို့ပါ”လို့ ဒုအတွင်းဝန်ဦးမောင်မောင်ဆွေက ဒီကနေ့(ဇူလိုင် ၁၀ရက်) ညပိုင်းမှာ ပြောပါတယ်။
ယင်းမာပင်ခရိုင်တပ်ရင်း(၁၄ ၊ ၁၅)ကိစ္စကို စစ်ဆေးဆောင်ရွက်နေတယ်လို့လည်း ဒုအတွင်းဝန်ဦးမောင်မောင်ဆွေက ဒီနေ့(ဇူလိုင် ၁၀ရက်) နေ့လယ်ပိုင်းမှာ ပြောထားပါတယ်။
Public Service Announcement
ချင်းပြည်နယ်မှာ မူးယစ်ဆေးဝါးတွေသယ်လာတဲ့ကား ၂ စီး နဲ့ ရဲဘော်တွေ ဖမ်းဆီးရမိတဲ့ဖြစ်စဥ်မှာ မူးယစ်ဆေးဝါးတွေသယ်တာဟာ ရဲဘော်တွေရဲ့လုပ်ရပ်သာဖြစ်ပြီး တပ်ရင်းနဲ့ မဆိုင်ဘူးလို့ ယင်းမာပင်ခရိုင်တပ်ရင်း ၁၅က ထုတ်ပြန်ငြင်းဆိုထားပါတယ်။
မူးယစ်ဆေးတွေသယ်လာတဲ့ ကားနှစ်စီးကို ယင်းမာပင်ခရိုင်တပ်ရင်း ၁၄ က ကိုဇော်နောင်၊ရွှေကြက်သွန်ရွာက ကျေးရွာပကဖ အဖွဲ့ဝင်၊CBE29 (YSO)ရဲ့ ကျောင်းအုပ် ကိုအာကာဖြိုး ၊ယာဥ်မောင်းကိုကျော်ဟိန်း၊ယာဥ်နောက်လိုက်ကိုဝေ မိုးအောင်တို့ကို ဟားခါးမြို့နယ်အတွင်း ဇူလိုင် ၉ ရက်မှာ ဖမ်းဆီးမိခဲ့တယ်လို့ Chinland Defense Force-Hakha(CDF-ဟားခါး)က ဇူလိုင် ၁၀ ရက်မှာ ထုတ်ပြန်ထားပါတယ်။
ဒီကိစ္စနဲ့ ပတ်သက်ပြီး ယင်းမာပင်ခရိုင်တပ်ရင်း(၁၅)က တပ်ရင်းမှူး လက်မှတ်နဲ့ ရဲဘော်၄ ယောက်၊သေနတ် ၂ လက်၊ကား၂စီးနဲ့ ဖောက်ခွဲရေး ယမ်းပစ္စည်းတွေသယ်ယူဖို့ ထောက်ခံစာ ပေးအပ်ခဲ့တာ မှန်ကန်ပြီး မူးယစ်ဆေး သယ်ဆောင်ခဲ့တာဟာ ရဲဘော်တွေရဲ့ ပုဂ္ဂလိကလုပ်ရပ်သာဖြစ်ပြီး တပ်ရင်းနဲ့ မပတ်သက်ကြောင်း ဒီနေ့(ဇူလိုင် ၁၀ ) ညနေပိုင်းမှာ တပ်ရင်း(၁၅)က ထုတ်ပြန်ထားပါတယ်။
တပ်ရင်း (၁၅)က ရဲဘော်မောင်ဇော်လတ်ကို ဖောက်ခွဲရေးပစ္စည်းတွေသွားသယ်ဖို့အတွက် ရေးပေးထားတယ်ဆိုတဲ့ ထောက်ခံစာဆိုတဲ့ စာရွက် ကို လည်း ဖော်ပြထားပါသေးတယ်။
ယခုဖြစ်စဉ်ကိုလည်း တပ်ရင်းက စုံစမ်းနေပြီး လွတ်မြောက်နေတဲ့ ရဲဘော်ကို ဇော်လတ်၊ကိုပုတီး တို့ကိုလည်းဖမ်းဆီးအရေးယူသွားမယ်လို့ ဆိုပါတယ်။ အခုကိစ္စနဲ့ပတ်သက်ပြီးတော့ အမျိုးသားညီညွတ်ရေးအစိုးရ၊ ကာကွယ်ရေးဝန်ကြီးဌာနရဲ့ စစ်ဆေးမှုကိုလည်းခံယူသွားမယ်လို့ ဆိုပါတယ်။
ဇူလိုင် ၈ ရက်မှာ ယင်းမာပင်ခရိုင် အမှတ်(၁၅) တပ်ရင်းမှူး ထောက်ခံစာနဲ့ ဖလမ်းမြိုနယ် ဗားရ်တံတားကို ကားနှစ်စီးနဲ့ သယ်ယူလာတဲ့ စိတ်ကြွဆေးပြား ၃သန်းခန့်၊ No.4 ခေါ် ဘိန်းဖြူ ၁၁၀ကီလိုဂရမ်ခန့်ကို ဟားခါးမြို့နယ်အတွင်း ဖမ်းမိခဲ့တယ်လို့ ချင်းဒေသကာကွယ်ရေးတပ်ဖွဲ့(CDF)-ဟားခါးက ထုတ်ပြန်ထားပါတယ်။
အဲဒီကားနှစ်စီးပေါ်မှာ တော်လှန်ရေးရဲဘော် သုံးဦးလိုက်ပါလာတယ်လို့ ဆိုပါတယ်။
