ဇူလိုင်-၆၊ ၂၀၂၅။ People’s Spring
ရှေးဟောင်းယဉ်ကျေးမှုနယ်မြေပုဂံမြို့တောင်ဘက်က ကျေးရွာတွေကို စစ်ကောင်စီတပ်က စစ်ကြောင်းထိုးနေတယ်လို့ ဒေသတွင်းတော်လှန်ရေးတပ်ဖွဲ့တစ်ခုဖြစ်တဲ့ ပုဂံဗိုလ်ချိုတပ်ဖွဲ့က ပြောပါတယ်။
ဒီကနေ့ (ဇူလိုင်၆ရက်)မှာ ညောင်ဦးမြို့ကထွက်လာတဲ့ စစ်ကောင်စီတပ်သားတွေဟာ ပုဂံမြို့တောင်ဘက် ဟိုတယ်ဇုန်တွေရဲ့ တောင်ဘက်က ကျေးရွာတွေကို စစ်ကြောင်းထိုးနေတာလို့ ပုဂံဗိုလ်ချိုတပ်ဖွဲ့က ပြောပါတယ်။
“အင်အား ၆၀လောက်ပါတယ်။ ညောင်ဦးကနေ ကားနဲ့လာပြီး ဂန့်ဂါရွာမှာ ကားတွေထားခဲ့ပြီး ကန်နီပေါက်ရွာကို စစ်ကြောင်းထိုးတယ်”လို့ ပုဂံဗိုလ်ချိုတပ်ဖွဲ့က ပြောပါတယ်။ လက်တလောမှာတော့ ကန်နီပေါက်ရွာဘေးနားက ကျောက်ကန်ကျေးရွာကို စစ်ကောင်စီတပ်စစ်ကြောင်း ရောက်နေပြီလို့လည်း ၎င်းကဆက်ပြောပါတယ်။အဆိုပါစစ်ကြောင်းကို တိုက်ခိုက်ဖို့စောင့်ကြည့်နေတယ်လို့လည်း ပုဂံဗိုလ်ချိုတပ်ဖွဲ့ကပြောပါတယ်။
Public Service Announcement
“သူတို့က မိန်းလမ်းကျနေတော့ PDFစိုးမိုးမှာ ကြောက်လို့ ခဏခဏစစ်ကြောင်းထိုးနေတာ”လို့လည်း ပုဂံဗိုလ်ချိုတပ်ဖွဲ့ကသုံးသပ်ပါတယ်။
ပုဂံမြို့ခံတစ်ဦးကလည်း “စစ်ကားတွေ မြို့တောင်ဘက်ကိုတက်သွားတယ်။ ဂန့်ဂါနားက ရွာတွေကို တအားဖိနေတာ။ အဲနားက ရွာတွေလည်း အကုန်ရှောင်နေရပြီ။ အခု ကန်နီပေါက်နားက ရွာတွေပြေးကုန်ပြီ”လို့ ပြောပါတယ်။
ပြီးခဲ့တဲ့ ဇွန်လတတိယအပတ်ကလည်း စစ်တပ်ဟာ ပုဂံမြို့ရဲ့တောင်ဘက်ကကျေးရွာတွေကို တင့်ကားနှစ်စီးအသုံးပြုပြီး အင်အား ၅၀၀လောက်နဲ့ စတင်စစ်ကြောင်းထိုးခဲ့တယ်လို့ ပုဂံဗိုလ်ချိုတပ်က ပြောပါတယ်။ ပုဂံ – ချောက်လမ်းပိုင်းကြားမှာရှိတဲ့ ကျေးရွာတွေ ၃၀ လောက်ကို စစ်ကြောင်း ထိုးခဲ့တာလို့ ဆိုပါတယ်။ စစ်ကြောင်းထိုးတဲ့ တလျှောက်မှာလည်း ကျေးရွာတွေ မီးရှို့ဖျက်ဆီး၊ ဒေသခံတွေ သတ်ဖြတ်၊ဖမ်းဆီးခေါ်ဆောင်နေလို့ ဒေသခံတွေဟာ ဘေးလွတ်ရာတိမ်းရှောင်နေရတာဖြစ်ပါတယ်။
ဇူလိုင် ၂ရက်ကလည်း ညောင်ဦးမြို့ အရှေ့ဘက်၊ ငါ့သရောက်မြို့တောင်ဘက်က (၅)မိုင်ခန့်အကွာမှာရှိတဲ့ တောင်တောရွာ၊ ရွာပုလဲရွာ နဲ့ဖလန်ကန် ကျေးရွာကြားတွေမှာ တော်လှန်ရေးပူးပေါင်းတပ် တွေနဲ့ စစ်ကောင်စီတပ် ပြင်းထန်စွာ တိုက်ပွဲဖြစ်ပွားခဲ့ပြီး တော်လှန်ရေးရဲဘော် ၁၀ဦးခန့် ကျဆုံးခဲ့ရပါတယ်။
၂၀၂၅ခုနှစ်အတွင်း ရှေးဟောင်းယဉ်ကျေးမှုနယ်မြေမှာ တိုက်ပွဲ ၁၀ကြိမ်ထက်မနည်းဖြစ်ပွားခဲ့တယ်လို့လည်း ညောင်ဦး ပကဖက ပြောပါတယ်။
ညောင်ဦးမြို့နယ်အတွင်းက ဒေသခံလူငယ်တွေကို စစ်မှုထမ်းဖို့ ဖမ်းဆီးတာတွေအပြင် ရွာတွေမှာ ပျူစောထီးတပ်ဖွဲ့ဝင်တွေကို လုံခြုံရေး သင်တန်းတွေ ပေးနေတာကြောင့် ဒီအခြေအနေတွေကို လက်မခံနိုင်တဲ့အတွက် ၂၀၂၅ ခုနှစ်ထဲမှာ ပုဂံဒေသမှာ စစ်ဆင်ရေးဖော်ဆောင်တာလို့ ညောင်ဦးပကဖက ပြောပါတယ်။
