ဇူလိုင်-၃၊ ၂၀၂၅။ မေရီ/People’s Spring
မန္တလေးတိုင်း၊ မတ္တရာမြို့နယ် ဝေါရွာသစ်ကျေးရွာကို စစ်တပ်က လေကြောင်းနဲ့ကော လက်နက်ကြီးနဲ့ပါ တိုက်ခိုက်လို့ ကလေးတစ်ဦး အပါအဝင် ပြည်သူ ၂ ဦး သေဆုံးခဲ့ပြီး နို့စို့ကလေး အပါအဝင် ၁၇ဦး ထက်မနည်း ထိခိုက်ဒဏ်ရာရခဲ့တယ်လို့ ပြည်သူ့ကာကွယ်ရေးတပ်မတော် (မန္တလေး)က သတင်းထုတ်ပြန်ပါတယ်။
ဒီကနေ့ ဇူလိုင် (၃)ရက် ညနေ (၃) နာရီခန့်က စစ်ကောင်စီဟာ မတ္တရာမြို့နယ်၊ ဝေါရွာသစ်ကျေးရွာကို တိုက်ပွဲဖြစ်ပွါးခြင်းမရှိဘဲ အကြောင်းမဲ့လေကြောင်းတိုက်ခိုက်လို့ (၆)နှစ်အရွယ် ကလေးငယ်တစ်ဦး အသက်ဆုံးရှုံးခဲ့ရပြီး နို့စို့အရွယ်ကလေးငယ်တစ်ဦးအပါအဝင် ၇ဦး ထိခိုက်ဒဏ်ရာရရှိခဲ့ကြောင်း မန္တလေး PDFနဲ့ ဒေသတွင်းသတင်းရင်းမြစ်တွေက အသိပေးပါတယ်။
စစ်ကောင်စီရဲ့လေကြောင်းနဲ့လက်နက်ကြီးပစ်ခတ်မှုကြောင့် လူနေအိမ်ထိခိုက်ပျက်စီးမှုများကို တွေ့ရစဥ်။ ဓာတ်ပုံ-MDY PDF 
စစ်ကောင်စီရဲ့လေကြောင်းနဲ့လက်နက်ကြီးပစ်ခတ်မှုကြောင့် လူနေအိမ်ထိခိုက်ပျက်စီးမှုများကို တွေ့ရစဥ်။ ဓာတ်ပုံ-MDY PDF 
စစ်ကောင်စီရဲ့လေကြောင်းနဲ့လက်နက်ကြီးပစ်ခတ်မှုကြောင့် လူနေအိမ်ထိခိုက်ပျက်စီးမှုများကို တွေ့ရစဥ်။ ဓာတ်ပုံ-MDY PDF
ဒါ့အပြင် လေကြောင်းတိုက်ပြီးမကြာခင် ဝေါရွာသစ်ကိုပဲ မတ္တရာမြို့ပေါ်ကနေ လက်နက်ကြီးတွေနဲ့ ထပ်မံ ပစ်ခတ်တိုက်ခိုက်ခဲ့လို့ အသက်(၇၅)နှစ်အရွယ် အမျိုးသားတစ်ဦး သေဆုံးပြီး ၁၀ဦးဝန်းကျင် ထိခိုက်ဒဏ်ရာရရှိခဲ့ကြောင်း မန္တလေး PDFက ထပ်မံ အသိပေးပါတယ်။
Public Service Announcement
စစ်ကောင်စီဟာ မတ္တရာမြို့နယ် မြောက်ခြမ်းမှာ ရှိတဲ့ ဝေါရွာ အနီးတစ်ဝိုက်ကို Jet Fighterနဲ့ လေကြောင်းတိုက်ခိုက်အပြီး မိနစ်၂၀အကြာမှာ လက်နက်ကြီးတွေနဲ့ ထပ်မံပစ်ခတ်ခဲ့တာဖြစ်ကြောင်း Voice Of Mandalay ကလည်း အသိပေးပါတယ်။
စစ်ကောင်စီဟာ မတ္တရာမြို့နယ်အတွင်းမှာ တိုက်ပွဲဖြစ်ပွါးခြင်းမရှိတဲ့ ကျေးရွာတွေကို အကြောင်းမဲ့ လေကြောင်းတိုက်ခိုက်မှုတွေနဲ့ လက်နက်ကြီးပစ်ခတ်မှုတွေ ပေါ်ပေါ်ထင်ထင် ကျူးလွန်နေကြောင်း၊ စစ်ကောင်စီဟာ အရပ်သားတွေအပေါ် အဆင်အခြင်မဲ့ ဦးတည်တိုက်ခိုက်မှုတွေ မကြာခဏကျူးလွန်နေလို့ မတ္တရာမြို့နယ်က ဒေသခံအများစုဟာ စစ်ဘေးလွတ်ရာဒေသတွေကို ပြောင်းရွှေ့နေထိုင်နေရတယ်လို့ ပြည်သူ့ကာကွယ်ရေးတပ်မတော်(မန္တလေး)က ထုတ်ပြန်ထားပါတယ်။
