ဟာနာဆန်/People’s Spring
အဓမ္မစစ်မှုထမ်းခံရသော စစ်ကောင်စီတပ်သား နှစ်ဦး လက်နက်ခဲယမ်းများနှင့်အတူ အလင်းဝင်လာကြောင်း မကွေးအရှေ့ခြမ်း ဗိဿနိုးနယ်မြေ ပြည်သူ့ကာကွယ်ရေးတပ်တော်၊ တပ်ရင်း(၇) ကြိုးကြာနီတပ်ရင်းက ထုတ်ပြန်သည်။
မတရားစစ်မှုထမ်းဥပဒေဖြင့် အတင်းအဓမ္မစစ်မှုထမ်းခဲ့ရသော စစ်ကောင်စီ တပ်သား နှစ်ဦးသည် ကြိုးကြာနီတပ်ရင်း တပ်ရင်း (၇) ထံ MA-11 သေနတ် ၂ လက်နှင့် ကျည်ခဲယမ်းများယူဆောင်ကာ အလင်းဝင်ခဲ့ကြောင်း အဆိုပါ တပ်ရင်းက နိုဝင်ဘာ ၁၁ရက်တွင် အသိပေးသည်။
အဆိုပါ စစ်သားနှစ်ဦး အဓမ္မစစ်မှုထမ်းခံခဲ့ရသည့်ဖြစ်စဥ်နှင့်ပတ်သက်၍ “သူတို့ကို ခဏဆိုပြီးတော့ ခေါ်သွားတယ်။ ခေါ်သွားပြီး လေ့ကျင့်ရေးစစ်တပ်ထဲ ရောက်သွားတယ်။ နောက်တစ်ယောက်ကတော့ မနက်ဖြန်လိုနေ့ သူလိုက်ရတော့မယ်ဆိုရင် ဒီနေ့လိုနေ့မှဖွင့်ပြောလို့ ရှောင်ချိန်တိမ်းချိန်မရှိအောင် တန်းပြီးဆွဲခေါ်ထုတ်သွားတဲ့သဘောမျိုး။”ဟု တပ်ရင်း(၇) ကြိုးကြာနီတပ်ရင်း၏တပ်ရင်းမှူး ဗိုလ်ကျီးဇိုးက ပြောသည်။
Public Service Announcement
၎င်းတို့ နှစ်ဦးအား လုံခြုံသောနေရာသို့ ပို့ဆောင်ထားပြီး ဂုဏ်ပြုဆုငွေပေးအပ်သွားမည်ဟု ကြိုးကြာနီတပ်ရင်းက အသိပေးသည်။
အဆိုပါ စစ်ကောင်စီတပ်သား ၂ ဦး၏ တပ်ရင်းအပါအဝင် အခြားအသေးစိတ်အချက်အလက်များအား ထပ်မံထုတ်ပြန်ပေးမည်ဟု သိရသည်။
