ဟန်နွေ/People’s Spring
၁၀၂၇ စစ်ဆင်ရေး ၁နှစ်ပြည့်နေ့ ဖြစ်သည့် ယနေ့ အောက်တိုဘာ ၂၇ရက်တွင် စစ်ကောင်စီက ကိုးကန့်တပ်မတော်(MNDAA) သိမ်းပိုက်ထားသည့် လောက်ကိုင်နင့် တအာင်းတပ်မတော်(TNLA) သိမ်းပိုက်ထားသည့် နမ့်ခမ်းကို လေကြောင်း ဗုံးကြဲတိုက်ခိုက်ခဲ့ရာ လောက်ကိုင်တွင် အရပ်သား ထိခိုက်မှုရှိခဲ့သည်။
နမ့်ခမ်းမြို့ကို စစ်ကောင်စီကယနေ့ (အောက်တိုဘာ ၂၇) မနက်တွင် လေကြောင်းမှ ၃ကြိမ် ဗုံးကြဲတိုက်ခိုက်ခဲ့ကြောင်းTNLA က ထုတ်ပြန်ထားသည်။
၁၀၂၇ စစ်ဆင်ရေး၏ တစ်နှစ်ပြည့် နှစ်ပတ်လည်နေ့ ဖြစ်သည့် အောက်တိုဘာ ၂၇ မနက် ၇နာရီ ၃၅မိနစ်၊ ၇နာရီ ၄၅ နှင့် ၈နာရီ ၁၄ တို့တွင် တိုက်လေယာဉ်ဖြင့် ဗုံးကြဲလာခြင်းဖြစ်ကြောင်း ဖော်ပြထားပြီး ထိခိုက်သေဆုံး ရှိမရှိ ကို ဖော်ပြမထားပေ။
Public Service Announcement
လောက်ကိုင် နှင့် နမ့်ခမ်း ကို စစ်ကောင်စီက အောက်တိုဘာ ၂၇ ရက်တွင် ဗုံးကြဲပြီးနောက်အပျက်အစီးများကိုတွေ့ရစဥ်။ ဓါတ်ပုံ-MNDAA ၊ TNLA 
လောက်ကိုင် နှင့် နမ့်ခမ်း ကို စစ်ကောင်စီက အောက်တိုဘာ ၂၇ ရက်တွင် ဗုံးကြဲပြီးနောက်အပျက်အစီးများကိုတွေ့ရစဥ်။ ဓါတ်ပုံ-MNDAA ၊ TNLA 
လောက်ကိုင် နှင့် နမ့်ခမ်း ကို စစ်ကောင်စီက အောက်တိုဘာ ၂၇ ရက်တွင် ဗုံးကြဲပြီးနောက်အပျက်အစီးများကိုတွေ့ရစဥ်။ ဓါတ်ပုံ-MNDAA ၊ TNLA
ကိုးကန့်တပ်မတော်(MNDAA) ကလည်း လောက်ကိုင် လေကြောင်း ဗုံးကြဲခံရမှု ကို အသိပေးထားရာ လူသေဆုံးမှု မရှိသော်လည်း ပြည်သူ ၄ဦး ဒဏ်ရာရခဲ့သည်ဟု ထုတ်ပြန်သည်။
ယနေ့မနက်အစောတွင် အာဏာသိမ်း တပ်သည် အထူးဒေသ(၁)၏ မြို့တော် လောက်ကိုင်မြို့ရှိ လူနေရပ်ကွက်များကို လေကြောင်းမှ ဗုံးကြဲတိုက်ခိုက်ခဲ့ရာ ဗုံး ၃လုံးထက်မနည်း ကြဲချခဲ့၍ ဟိုတယ်အဆောက်အအုံအများအပြား ဗုံးကြဲခံရကာ နေအိမ်အများအပြား ထိခိုက်ပျက်စီးခဲ့သည်ဟု အသိပေးသည်။
စစ်ကောင်စီအနေဖြင့် ၁၀၂၇ စစ်ဆင်ရေး တစ်နှစ်ပြည့်နေ့တွင် ကိုးကန့်နှင့် TNLA ထိန်းချုပ်န်မြေများကို လေကြောင်းမှဗုံးကြဲတိုက်ခိုက်မှု ပိုလုပ်မည်ဟု သတင်းရရှိထားကြောင်းဒေသခံ သတင်းရင်းမြစ်အချို့က အောက်တိုဘာ ၂၆ ရက်နေ့တွင် ပြောကြားထားသည်။
၁၀၂၇ စစ်ဆင်ရေးတွင် MNDAA နှင့် TNLA တို့က မြို့ပေါင်း ၂၀ ကျော်ကို ထိုးစစ်ဆင် သိမ်းပိုက်ခဲ့သည်။
