လူအေး/People’s Spring
ပန်ဝါတိုက်ပွဲတွင် စစ်ရှုံးနေပြီး အင်အားနည်းနေသည့် စစ်ကောင်စီလက်အောက်ခံနယ်ခြားစောင့်တပ်(BGF)က ကန်ပိုက်တီနယ်စပ်ကုန်သွယ်ရေးဇုန်မှ ယာဉ်မောင်းများ နှင့် ယာဉ်နောက်လိုက် ၁၀၀ ကျော်ကို အတင်းအဓမ္မစစ်သားသစ်စုဆောင်းသွားကြောင်း ဒေသခံအချို့ကပြောသည်။
“ကန်ပိုက်တီက ကားသမားတွေကို ပေါ်တာဆွဲသွားတာ။ ဘယ်ကိုမှလိုက်လို့မရဘူးဖြစ်နေတယ်” ဟု ကန်ပိုက်တည်မြို့ခံတစ်ဦးကပြောသည်။
Public Service Announcement
စစ်တပ်လက်အောက်ခံနယ်ခြားစောင့်တပ်(BGF)က အတင်းအဓမ္မစစ်သားစုဆောင်းသွားသည့် ယာဉ်မောင်းများနှင့် ယာဉ်နောက်လိုက် အခြေ
အနေကို အသေးစိတ်မသိရှိရသေးပေ။ မိသားစုဝင်များသည် KIAကိုရော စစ်ကောင်စီ နှင့် နယ်ခြားစောင့်တပ်(BGF)ထံပါ ဆက်သွယ်၍ အကူအညီတောင်းထားကြောင်း သတင်းရရှိသည်။
မြစ်ကြီးနားမြို့မှနေ၍ ချီဖွေ၊ ဆော့လော်၊ ဖီမော်၊ ပန်ဝါမြို့ဘက်သို့လာသည့် ကချင်အထူးဒေသ(၁)
ဘက်သို့ သွားလာခွင့်ပိတ်လိုက်ကြောင်းဦးဇခုန်တိန့်ယိန်း ဦးဆောင်သည့် ကချင်နယ်ခြားစောင့်တပ်က အောက်တိုဘာ၄ရက်နေ့တွင် ကြေညာခဲ့သည်။ထိုသို့ကြေညာ ပြီးနောက် ဒေသတွင်း၌ ပေါ်တာဆွဲမှုများ ဆက်တိုက်လုပ်နေခြင်းဖြစ်ကြောင်း ဒေသခံများကပြောသည်။
ကချင်နယ်ခြားစောင့်တပ်က ယင်းကဲ့သို့ ကြေညာထားသော်လည်း ဆဒုံး ၊ချီဖွေ၊ ဆော့လော်မြို့တို့ကို ကချင်လွတ်လပ်ရေးတပ်မတော်(KIA)ကဆက်တိုက်သိမ်းယူထားသည်။ ပန်ဝါမြို့ကို ဆက်လက်ထိုးစစ်ဆင်နေပြီး ပန်ဝါမြို့အနီး၊ လုပြည်ကျေးရွာရှိအမှတ် ၁၀၀၂ နယ်ခြားစောင့်တပ် (BGF) နှင့်ကာကင်းများကိုဆက်တိုက် သိမ်းယူနေသည်။
KIAသည် ပြီးခဲ့သည့် သြဂုတ်လကတိုက်ပွဲများအတွင်း ကန်ပိုက်တီမြို့ နှင့် ဆယ်မိုင်ကျော်အကွာ လဖိုင်ကျေးရွာအထိ သိမ်းပိုက်ခဲ့သော်လည်း ကန်ပိုက်တီမြို့အား ဆက်လက် ထိုးစစ်ဆင်ခြင်း မရှိသေးပေ။ ကန်ပိုက်တီမြို့နှင့် နယ်စပ်ကုန်သွယ်ရေးဇုန်သည် စစ်ကောင်စီနှင့် နယ်ခြားစောင့်တပ်ထိန်းချုပ်မှုအောက်၌ရှိနေသည်။
“နယ်စပ်ဂိတ်ကို တရုတ်ဘက်က ပိတ်ပစ်မှာစိုးလို့ KIAက ဆက်မသိမ်းတာ။ အဲ့အချိန်မှာ BGFက အရပ်သားတွေကိုပေါ်တာဆွဲနေတာပါ။ နောက်ပြီး ရက်တိုစစ်သင်တန်းတွေပေးပြီး တိုက်ပွဲတွေဘက်ကိုလွှတ်နေတယ်လို့ကြားပါတယ်”ဟုဒေသခံတဦးကပြောသည်။
စစ်တပ်လက်အောက်ခံ ကချင်နယ်ခြားစောင့်တပ်(NDAK) ဥက္ကဌ ဦးဇခုန်တိန့်ယိန်းက ချီဖွေမြို့အရှေ့ဘက် ဂမ်ခွန်းကျေးရွာ၊ ဖီမော်ကျေးရွာအနီး၌ BGF တပ်ရင်း ၁၀၀၁၊ ပန်ဝါဒေသ လုပြည်ကျေးရွာအနီး၌ တပ်ရင်း၁၀၀၂၊ ကန်ပိုက်တီမြို့အနီး ဝေါ်ချုံးဒေသ၌တပ်ရင်း ၁၀၀၃ ဟူ၍ ဖွဲ့စည်းပြီး ကချင်အထူးဒေသ(၁) အဖြစ် သတ်မှတ်အုပ်ချုပ်နေသည်။
KIA သည် ကချင်အထူးဒေသ(၁)နယ်မြေရှိ ဆဒုံး၊ ဆော့လော်၊ ချီဖွေမြို့များကို အပြီးသတ် သိမ်းပိုက်ထားပြီး မြန်မာ-တရုတ်နယ်စပ်မြို့ ပန်ဝါကို ထိုးစစ်ဆင်နေခြင်းဖြစ်သည်။
ပန်ဝါ နှင့် ၅မိုင်ခန့်အကွာရှိ BGF ၁၀၀၂ ဌာနချုပ် ပင်မ စခန်းများအပါအဝင် စခန်းအားလုံးကို KIA ကအောက်တိုဘာ ၁၄ ရက်နှင့် ၁၅ ရက်တွင်သိမ်းပိုက်နိုင်ခဲ့သည်။ ထိုကြောင့် ပန်ဝါအခြေစိုက် စစ်ကောင်စီ ဗျူဟာ၊ ခလရ(၂၉)၊ BGF ၁၀၀၁ နှင့် ၁၀၀၃ ၊ ပြည်သူ့စစ်အင်အားများသာ ကျန်တော့သည်ဟုစစ်ရေးသတင်းရင်းမြစ်အချို့ကပြောသည်။
