Amerika vergi ödəyiciləri Prezident Trampın 83 milyon dollarlıq böhtan işi üzrə davam edən apellyasiya prosesinin xərclərini ödəməyəcəklər – bu barədə federal apellyasiya məhkəməsi çərşənbə günü qərar verib.
Gununsesi.info xəbər verir ki, ABŞ-nin 2-ci Dairə Apellyasiya Məhkəməsinin hakimlər kollegiyası Trampın, jurnalist E. Jean Carroll-un ona qarşı böhtan iddiası üzrə apellyasiya prosesində Ədliyyə Nazirliyinin vəkillərinin çıxış etməsi ilə bağlı müraciətini rədd edib.
Keçən il Nyu-York münsiflər heyəti keçmiş Elle jurnalının köşə yazarı E. Jean Carroll-a 83.3 milyon dollar təzminat ödənilməsinə qərar verib.
Buna səbəb Trampın 2019-cu ildə onu cinsi təcavüzdə ittiham edən Carroll-un iddiasını inkar etməsi və bu zaman verdiyi bəyanatlarla ona böhtan atması olub. İddiaya görə, hadisə 1990-cı illərin ortalarında Bergdorf Goodman mağazasında baş verib.
Tramp bütün ittihamları rədd edir.
