အစ္စရေးရဲ့ စစ်ဆင်ရေး အထူးအောင်မြင်တယ်လို့ ထရမ့်ပြော၊ အချိန်မနှောင်းခင် ညှိနှိုင်းဖို့ အီရန်ကို သတိပေး

အီရန်ကို အစ္စရေးရဲ့ လေကြောင်းတိုက်ခိုက်မှုတွေဟာ အကြီးအကျယ် အောင်မြင်ခဲ့တဲ့ စစ်ဆင်ရေးလို့ အမေရိကန် သမ္မတ ဒေါ်နယ်လ်ထရမ့်က ချီးကျူးလိုက်ပြီး အီရန် အနေနဲ့ ဘာတစ်ခုမှ အဖတ်ဆယ်စရာ မကျန်တော့တဲ့ အဆင့်ထိ မရောက်ခင် ညှိနှိုင်းမှုတွေ လုပ်သင့်ပြီလို့ ပြောကြားသွားပါတယ်။

အီရန်ရဲ့ နျူကလီးယား နည်းပညာ မြှင့်တင်မှုတွေကို ထိန်းချုပ်ဖို့ အမေရိကန်က ထိတွေ့ ဆွေးနွေးမှုတွေ လုပ်ဆောင်ခဲ့ပေမယ့် မအောင်မြင်ခဲ့တဲ့နောက် ဇွန်လ ၁၃ ရက်နေ့မှာ အစ္စရေးက အီရန် ပိုင်နက်ထဲက နျူကလီးယား နည်းပညာဆိုင်ရာ အဆောက်အအုံတွေ၊ စစ်စခန်းတွေနဲ့ လက်နက်စနစ်တွေကို လေကြောင်းကနေ အပြင်းအထန် တိုက်ခိုက် ဖျက်ဆီးခဲ့ပါတယ်။

အစ္စရေးက အီရန်သာ နျူကလီးယား လက်နက်တွေ ပိုင်ဆိုင်လာမယ်ဆိုရင် အစ္စရေးရဲ့ ရှင်သန်ရပ်တည်မှုကို ခြိမ်းခြောက်လာမှာ ဖြစ်တဲ့အတွက် အဲဒီ ခြိမ်းခြောက်မှုကို ဖျက်ဆီးဖို့ စစ်ဆင်ရေး လုပ်ဆောင်ခဲ့တာလို့ ကြေညာထားပါတယ်။

ညပိုင်းမှာ အီရန်က အစ္စရေးကို ဒုံးကျည်တွေနဲ့ လက်တုံ့ပြန် ပစ်ခတ်ခဲ့တာကြောင့် ဂျေရုဆလင်နဲ့ တဲလ်အဗစ်ဗ် မြို့တွေမှာ ထိခိုက်ပျက်စီးမှုတွေ၊ ဒဏ်ရာရမှုတွေ ရှိလာခဲ့ပါတယ်။

Public Service Announcement

CNN သတင်းဌာနက အီရန်-အစ္စရေး အရေးနဲ့ ပတ်သက်လို့ အစ္စရေးရဲ့ အမာခံ မဟာမိတ် အမေရိကန် သမ္မတ ထရမ့်ကို ဖုန်းဆက်ပြီး အင်တာဗျူးတဲ့အခါ ထရမ့်က သူ့အနေနဲ့ သေချာပေါက် အစ္စရေးဖက်က ထောက်ခံ ရပ်တည်ရမှာ ဖြစ်တယ်လို့ ဖြေကြားခဲ့ပါတယ်။

နောက်ပြီး အစ္စရေးရဲ့ တိုက်ခိုက်မှုဟာ ရလဒ်ပိုင်းအရ အရမ်းအောင်မြင်တဲ့ စစ်ဆင်ရေးမျိုး ဖြစ်ခဲ့တယ်လို့ ထရမ့်က ဆိုပါတယ်။ အစ္စရေး စစ်တပ်က အဲဒီ တိုက်ခိုက်မှုမှာ တိုက်လေယာဉ် အစီး ၂၀၀ လောက်ကို အသုံးပြုခဲ့တယ်လို့ ထုတ်ပြန်ထားပါတယ်။

ထရမ့်က အီရန် အနေနဲ့ သူပြောတဲ့ စကားတွေကို သေချာ နားထောင်ခဲ့သင့်ကြောင်း၊ သဘောတူညီမှု တစ်ခုခု ရနိုင်ဖို့ အီရန်ကို သူက အချိန် ရက် ၆၀ သတ်မှတ်ပြီး စောင့်ပေးခဲ့ကြောင်း၊ အခုတော့ ၆၁ ရက်မြောက်နေ့ ဖြစ်သွားပြီဖြစ်ကြောင်း ပြောပါတယ်။ တစ်နည်းအားဖြင့် သူအချိန်ပေးခဲ့တဲ့ သတ်မှတ်ကာလ အကုန်မှာ အစ္စရေးက အီရန်ကို စတင် တိုက်ခိုက်ခဲ့တာလို့ ထရမ့်က ဆိုလိုဟန် ရှိပါတယ်။

အခုတော့ အီရန်ဟာ အရာရာ အရမ်း နောက်ကျမသွားခင် အခြေအနေကို နားလည်ပြီး ဆွေးနွေးပွဲ စားပွဲဝိုင်းဆီ ပြန်လာသင့်ပြီ ဖြစ်ကြောင်း၊ အီရန်မှာ သူသိထားတဲ့ အရမ်းသဘောထား တင်းမာတဲ့ သူတွေကတော့ သေကုန်ပြီဖြစ်ကြောင်းလည်း ထရမ့်က ပြောပါတယ်။

ထရမ့်ဟာ အီရန် အနေနဲ့ ဘာမှ မကျန်တော့တဲ့ အဆင့်ထိ ဖြစ်မသွားခင် နျူကလီးယားအရေး ဆွေးနွေး သဘောတူညီမှု တစ်ခုကို ရှာဖွေသင့်နေပြီ ဖြစ်ကြောင်း၊ မဟုတ်ရင် အစ္စရေးဆီက တိုက်ခိုက်မှုတွေဟာ ပိုပြီး ကြမ်းတမ်း ပြင်းထန်လာနိုင်ကြောင်းလည်း လူမှုကွန်ရက်ပေါ်မှာ သတိပေး ရေးသားထားခဲ့ပါသေးတယ်။

တစ်ဖက်မှာတော့ ထရမ့်ရဲ့ နိုင်ငံခြားရေး ဝန်ကြီးဖြစ်သူ မာကို ရူဘီရိုကတော့ သမ္မတနဲ့ယှဉ်ရင် ပိုပျော့ပျောင်းတဲ့ အသုံးအနှုန်းမျိုးကို ရွေးချယ်ခဲ့ပြီး အစ္စရေးက အီရန်ကို တိုက်ခိုက်တဲ့ ကိစ္စမှာ အမေရိကန်ရဲ့ တိုက်ရိုက် ပတ်သက်မှု လုံးဝ မရှိကြောင်း ငြင်းဆိုခဲ့ပါတယ်။

အစ္စရေးဟာ အီရန်အပေါ် တစ်ဖက်သတ် အရေးယူ ဆုံးဖြတ်မှုတစ်ခု လုပ်ဆောင်ခဲ့ကြောင်း၊ အီရန်အပေါ် တိုက်ခိုက်မှုမှာ အမေရိကန်က လုံးဝ ပါဝင်ပတ်သက်မှု မရှိခဲ့သလို အမေရိကန်ရဲ့ လက်ရှိ ဦးစားပေး ရည်မှန်းချက်ဟာ ဒေသတွင်းမှာ ဖြန့်ကျက်ထားတဲ့ အမေရိကန် တပ်တွေရဲ့ လုံခြုံရေးသာဖြစ်ကြောင်း ရူဘီရိုက ပြောကြားထားခဲ့ပါတယ်။

ကိုးကား: CNN