စက်တင်ဘာ-၂၂၊ ၂၀၂၅။ ထားမြတ်/People’s Spring
ကရင်အမျိုးသားအစည်းအရုံး(KNU/KNLA) မြိတ်-ထားဝယ်ခရိုင်/တပ်မဟာ(၄)ဆီကို စစ်ကောင်စီတပ်သားသစ် ၇ ဦး အလင်းဝင်လာတယ်လို့ KNU မြိတ်-ထားဝယ်ခရိုင်က ယနေ့ သတင်းထုတ်ပြန်ပါတယ်။
KNU အုပ်ချုပ်နယ်မြေ လယ်မူလား(ပုလော)မြို့နယ် ပလောက်မြို့အခြေစိုက် စစ်ကောင်စီတပ်သားသစ် ၇ဦးဟာ စက်တင်ဘာ ၁၇ရက်မှာ KNLA တပ်မဟာ(၄) လက်အောက်ခံ KNDO တပ်ရင်း(၇) တပ်ခွဲ(၅)ဆီကို အလင်းဝင် ဘက်ပြောင်းခိုလှုံလာတာလို့ ဖော်ပြထားပါတယ်။
အဲဒီ တပ်သားတွေဟာ စစ်ကောင်စီရဲ့ တိုင်းဗိုလ် အမှတ်(၁၂)လေ့ကျင့်ရေးသင်တန်းကျောင်းက ဖြစ်ပြီး လက်နက်မပါလာဘဲ အလင်းဝင်လာတာလို့ ဆိုပါတယ်။
Public Service Announcement
အခုအလင်းဝင်လာတဲ့ စစ်ကောင်စီတပ်သား ၇ဦး အပါအဝင် အခုနှစ် ဇန်နဝါရီကနေ စက်တင်ဘာတတိယပတ်အထိ ၉လနီးပါးအတွင်း စစ်ကောင်စီတပ်သား ၃၃ဦး အလင်းဝင်ရောက်ခဲ့တယ်လို့ KNLA သတင်းရင်းမြစ်က ပြောပါတယ်။
ဘက်ပြောင်းခိုလှုံလာသူတွေထဲမှာ ဗိုလ်ကြီးအဆင့်လည်းပါဝင်ပြီး မြန်မာ-ထိုင်းနယ်စပ် သုခစခန်းက စခန်းတာဝန်ခံ ဖြစ်တယ်လို့ ပြောပါတယ်။ အဲဒီ ဗိုလ်ကြီးဟာ KNLAတပ်မဟာ(၄)နဲ့အတူ လက်တွဲ ပြီး စစ်ကောင်စီကို ပြန်လည်တိုက်ခိုက်နေတယ်လို့လည်း ပြောပါတယ်။
အကြောင်းအမျိုးမျိုးကြောင့် မတရားစစ်မှုထမ်း ခိုင်းစေခံရတဲ့ စစ်ကောင်စီတပ်သားတွေအနေနဲ့ နီးစပ်ရာ တော်လှန်ရေးတပ်တွေဆီကို ရရာနည်းနဲ့ လက်နက်ချ အလင်းဝင် ပူးပေါင်းကြဖို့လည်း KNU မြိတ်ထားဝယ်ခရိုင်က ထပ်မံတိုက်တွန်းထားပါတယ်။
(အလင်းဝင်လာတဲ့ စစ်ကောင်စီတပ်သား ၇ဦးကို တွေ့ရစဉ်။ ဓာတ်ပုံ – KNU)
