စက်တင်ဘာ-၂၂၊၂၀၂၅။ဇော်ဝင်း/People’s Spring
မကွေးတိုင်း၊ပခုက္ကူမြို့က ဘူတာအနီးမှာတပ်စွဲထားတဲ့ စစ်ကောင်စီတပ်ဖွဲ့ဝင်တွေကို တိုက်ခိုက်ရာ ရဲလေးဦး သေဆုံးပြီး လက်နက်သုံးလက်ရရှိတယ်လို့ Pakokku Special Task Forceက ထုတ်ပြန်ပါတယ်။
ဒီကနေ့( စက်တင်ဘာ၂၂ရက်)မနက် ၁နာရီ ၄၀ မိနစ် ဝန်းကျင်မှာ ပခုက္ကူမြို့ ဘူတာအနီး ကွန်ကရစ်ဇလီဗာတုံးစက်ရုံတွင်းက စစ်ကောင်စီတပ်ဖွဲ့ကို ပခုက္ကူမြို့နယ် တပ်ရင်း (၁)ပကဖ ရဲဘော်ဒီး ဦးဆောင်တဲ့ ရဲဘော်ခုနစ်ဦးက လျှပ်တပြတ် ဝင်ရောက်တိုက်ခိုက်ခဲ့တာလို့ ဆိုပါတယ်။
ပခုက္ကူမြို့နယ်မှာ စစ်ကောင်စီက ဦးစီးပြုလုပ်မယ့် ရွေးကောက်ပွဲကို ဆန့်ကျင်ကြောင်းပြသမှုအနေနဲ့ မြို့တွင်းမစ်ရှင်ကို ကြိုးစားဖော်ဆောင်ခဲ့တာလို့ Pakokku Special Task Force တာဝန်ရှိသူက ပြောပါတယ်။
Public Service Announcement
တိုက်ခိုက်မှုမှာ ရဲလေးဦးသေပြီး G3တလက်၊7.62mm ကျည်သုံးကာဘိုင် တလက်၊AK တလက်နဲ့ ကျည်၅၀ ဝန်းကျင်သိမ်း ရခဲ့တယ်လို့ အသိပေးပါတယ်။
ဒါ့အပြင် ရဲဘော်တွေ အထိအခိုက်မရှိ ပြန်ဆုတ်နိုင်ခဲ့ပြီး ပြည်သူတွေ အနေနဲ့လည်း စစ်ကောင်စီစိတ်တိုင်းကျ ပြုလုပ်မယ့် ရွေးကောက်ပွဲမှာ ပူးပေါင်းပါဝင်တာမလုပ်ဖို့ Pakokku Special Task Force ကအထူးမေတ္တာရပ်ခံထားပါတယ်။
ပခုက္ကူမြို့နယ်မှာ စစ်ကောင်စီရဲ့ အမှတ်(၁၀၁) ခြေမြန် တပ်မဌာနချုပ်အခြေစိုက်ထားပြီး မြို့တွင်း ကင်းစခန်းနဲ့ မြို့နယ်ထဲက ပျူစောထီးရွာတွေမှာ စစ်ကောင်စီတပ်သား အင်အား သုံးရာဝန်းကျင်နဲ့ တပ်ဖြန့်ထားတယ်လို့ သိရပါတယ်။
ဒါ့အပြင် တပ်မ(၁၀၁)ဌာနချုပ်မှာ စက်တပ်လေထီး တွေအသုံးပြုနိုင်အောင် စစ်ကောင်စီက ကြိုးပမ်းထားပြီး မကြာသေးမီလပိုင်းတွေကစလို့ ပခုက္ကူ၊ပေါက် နဲ့ မြိုင်မြို့နယ်တွေကို စက်တပ် လေထီးတွေနဲ့ လေကြောင်းကနေ တိုက်ခိုက်နေပါတယ်။
