မကွေးတိုင်း၊ ပခုက္ကူမြို့နယ်၊ လယ်ယာကျေးရွာက စစ်ကောင်စီခန့်အုပ်ချုပ်ရေးမှူးတဦးကြိုးဆွဲချသေဆုံးသွားတယ်လို့ဒေသခံတွေကပြောပါတယ်။
ဇွန်လ (၂၃)ရက် မနက်ပိုင်းက မကွေးတိုင်း၊ပခုက္ကူမြို့နယ်၊ လယ်ယာကျေးရွာက စစ်ကောင်စီခန့်အုပ်ချုပ်ရေးမှူး အသက် လေးဆယ်ဝန်းကျင်ရှိ မိုးဝင်းဆိုသူဟာ နေအိမ်မှာတင် ကိုယ့်ကိုယ်ကို ကြိုးဆွဲချသေဆုံးသွားတယ်လို့ ဒေသခံတွေက ပြောပါတယ်။
သေဆုံးသူဟာ ကျေးရွာပြည်သူလူထုဆီကနေ စစ်မှုထမ်းကြေးတစ်အိမ် တစ်သောင်းခွဲကျပ်ကို စစ်ကောင်စီအတွက် ကောက်ခံပေးနေရတယ်လို့လည်း ဒေသခံတွေက ပြောပါတယ်။
Public Service Announcement
“သူကမြေယာတွေကိုလည်းအလွဲသုံးစားရောင်းစားတာလည်းမနည်းဘူးလို့သိရတယ်။ မဖြစ်ခင် ရက်ပိုင်းမှာလည်းစကစကအချုပ် ၂ ရက်ချလိုက်သေးတယ်လို့သိရပါတယ်။ နောက်သူ့လုပ်ရပ်တွေကိုသူသိလို့ ဒီလိုလုပ်သွားတာပါ။”လို့ ပခုက္ကူအခြေစိုက် တော်လှန်းရေးတပ်ဖွဲ့တဖွဲ့ဖြစ်တဲ့ Cobra One အဖွဲ့က တာဝန်ရှိသူက ပြောပါတယ်။
စစ်ကောင်စီခန့်အုပ်ကြီး သေဆုံးတာနဲ့ပတ်သက်လို့ လူထုနွေဦးက သီးခြားအတည်ပြုနိုင်ခြင်းမရှိသေးပါဘူး။
စစ်ကောင်စီခန့်အုပ်ချုပ်ရေးမှူးတွေဟာစစ်တပ်ရဲ့ခိုင်းစေမှုတွေအပြင် ကာကွယ်ရေးအဖွဲ့တွေရဲ့ တိုက်ခိုက်မှုတွေပါ ခံနေရတဲ့အတွက် ဖိအားအင်မတန်များနေကြောင်း၊ ဒါ့အပြင် စစ်မှုထမ်းအတွက်လည်း လူပြည့်အောင် စုပေးနေရတဲ့အတွက်နှုတ်ထွက်သူတွေ ရှိလာကြောင်း ဒေသခံတချို့က ဆိုပါတယ်။
ယခုဇွန်လထဲမှာပဲမန္တလေးတိုင်း၊တံတားဦးမြို့နယ်မှာ စစ်ကောင်စီရဲ့ စစ်မှုထမ်း တပ်သားသစ် အဓမ္မစုဆောင်းခိုင်းမှုတွေကြောင့် အုပ်ကြီး ၁၆ ဦးထက်မနည်း နှုတ်ထွက်ခဲ့ကြပါသေးတယ်။
