အိမ်သွင်/People’s Spring
ရခိုင်ပြည်နယ်တိုက်ပွဲ တစ်နှစ်တာအတွင်း စစ်ကောင်စီတပ်သတ်ဖြတ်မှုကြောင့် အရပ်သားပြည်သူ ၇၀၀ကျော်သေဆုံးခဲ့ကြောင်း အာရက္ခတပ်တော်(AA)၏ လူသားချင်းစာနာထောက်ထားရေးနှင့် ဖွံ့ဖြိုးရေးဆိုင်ရာပူးပေါင်းဆောင်ရွက်ရေးရုံး(HDCO)က ယနေ့သတင်း ထုတ်ပြန်သည်။
၂၀၂၃ နိုဝင်ဘာ ၁၃ရက်မှ နိုဝင်ဘာ ၁၃ရက်အထိ အမျိုးသား ၅၁၇ဦးနှင့် အမျိုးသမီး ၂၁၈ဦးစုစုပေါင်း ၇၃၅ဦး စစ်ကောင်စီ၏ လက်ချက် ကြောင့် သေဆုံးခဲ့ရကြောင်းHDCOက အသိပေးထုတ်ပြန်သည်။
စစ်ကောင်စီ၏လေကြောင်းတိုက်ခိုက်မှု၊ လက်နက်ကြီးပစ်ခတ်မှု၊ စစ်ကြောင်းထိုးသတ်ဖြတ်မှု၊ စစ်ကျန်လက်နက်နှင့် မြေမြှုပ်မိုင်းများကြောင့် သေဆုံးရခြင်းဖြစ်ပြီး လေကြောင်းတိုက်ခိုက်ခံရမှုကြောင့် အများဆုံးသေဆုံးခဲ့သည်ဟု ဆိုသည်။
Public Service Announcement
သေဆုံးသူများတွင် (၁၈)နှစ်အောက် ကလေးသူငယ် ၁၃၂ ဦးပါဝင်သည်ဟု ထပ်မံအသိပေးသည်။ စစ်တွေမြို့နယ်မှ အရပ်သား ၁၀၈ ဦးဖြင့် အများဆုံးသေဆုံးခဲ့ပြီး ချင်းပြည်နယ် ပလက်ဝမြို့နယ်မှ ၃၁ဦးလည်းပါဝင်သည်။
ထို့အပြင် ထိခိုက်ဒဏ်ရာရရှိသူ ၁,၅၆၃ ဦးကြောင်း HDCOက ထုတ်ပြန်ထားသည်။
စစ်ကောင်စီ၏ လက်ချက်အပြင် တိုက်ပွဲတစ်နှစ်တာအတွင်း ARSA၊ RSO၊ ARA မွတ်ဆလင်လက်နက်ကိုင်အဖွဲ့များ၏ ဖမ်းဆီးသတ်ဖြတ်မှုနှင့် ပစ်ခတ်တိုက်ခိုက်မှုကြောင့် အရပ်သား ၂၂ ဦးသေဆုံးပြီး ဒဏ်ရာရရှိသူ ၅ဦးရှိကြောင်း HDCO က ထုတ်ပြန်ထားသည်။
အထက်ပါစာရင်းသည် နိုဝင်ဘာ ၁၃ရက်အထိစာရင်းဖြစ်ပြီး စစ်ကောင်စီက လေကြောင်းတိုက်ခိုက်မှုများ ဆက်လက်ပြုလုပ်နေကာ အရပ်သားသေဆုံးမှုများလည်း ဆက်ရှိနေသည်။
တောင်ကုတ်မြို့နယ်၊ ရန်ခိုကျေးရွာကို နိုဝင်ဘာ ၁၄ ရက် နံနက် ၃ နာရီခန့်တွင် စစ်ကောင်စီက လေကြောင်းမှတိုက်ခိုက်ပြီး လက်နက်ကြီးဖြင့်ပစ်ရာ အရပ်သား ၄ ဦးသေဆုံးခဲ့သည်။
လူသေဆုံးမှုများအပြင် ရခိုင်ပြည်နယ် တစ်နှစ်တာတိုက်ပွဲများအတွင်း စစ်ကောင်စီက တံတား၂၈စင်းနှင့် ဘာသာရေးဆိုင်ရာအဆောက်အအုံများအပါအဝင် အဆောက်အအုံ ၁၅၀ကျော် ဖျက်ဆီးခဲ့ကြောင်း AAက ထုတ်ပြန်ထားသည်။
လက်ရှိတွင် AAက မြို့ ၁၂မြို့များကို ထိန်းချုပ် ထားပြီး အမ်း၊ မောင်တော၊ ဂွ၊ တောင်ကုတ်မြို့နယ်တို့မှ စစ်ကောင်စီစခန်းများကို ထိုးစစ် ဆင်တိုက်ခိုက်နေသည်ဟု AAက ထုတ်ပြန် ထားသည်။
