အီယိုရီ/People’s Spring
ဗြိတိန်သည် မြန်မာစစ်တပ်အား လေကြောင်းလောင်စာဆီနှင့် စက်ကိရိယာများ ပံ့ပိုးပေးနေသည့် အဖွဲ့အစည်းများကို ပစ်မှတ်ထားပိတ်ဆို့အရေးယူကြောင်း ယနေ့(အောက်တိုဘာ ၂၉ရက်) ကြေညာလိုက်သည်။
ဗြိတိန်အစိုးရသည် Asia Sun Group Company Limited၊ Swan Energy Company Limited၊ Myan-Oil Company Limited၊ Rich Ray Trading Company Limited၊ Progress Technology Support Company Limited (a.k.a Royal Shune Lei) စသည့် ကုမ္ပဏီငါးခုကို ပိတ်ဆို့အရေးယူခဲ့ခြင်းဖြစ်သည်။
“နိုင်ငံတဝှမ်းမှာ ဖြစ်ပွားနေတဲ့ မြန်မာစစ်တပ်ရဲ့ အရပ်ဘက်ဆိုင်ရာအခြေခံအဆောက်အအုံများကိုလေကြောင်းတိုက်ခိုက်မှုတွေအပါအဝင် လူ့အခွင့်အရေး ချိုးဖောက်မှုတွေဟာ လက်ခံနိုင်ဖွယ် မရှိပါ။ အပြစ်မဲ့ အရပ်သားတွေအပေါ် ထိခိုက်ခြင်းဟာလည်း သည်းခံနိုင်ဖွယ်မဟုတ်ပါ” ဟု အင်ဒို-ပစိဖိတ်ရေးရာဝန်ကြီး Catherine West က ပြောသည်။
Public Service Announcement
၂၀၂၄ ခုနှစ် ဩဂုတ်လအတွင်း မြန်မာစစ်တပ်၏ လေကြောင်းတိုက်ခိုက်မှုများဟာ အကြိမ်အရေအတွက် အများဆုံးမှတ်တမ်းတင်ခဲ့ပြီး အရပ်သားစုစုပေါင်း ဒါဇင်နှင့်ချီ သေဆုံးခဲ့ရသည်။
“ဒါကြောင့် ဒီနေ့ ယူကေဟာ မြန်မာစစ်တပ်ဆီသို့ ပစ္စည်းကိရိယာများနဲ့ လေကြောင်းလောင်စာများ ဖြန့်ဖြူးရောင်းချနေသူတွေကို ပစ်မှတ်ထားတဲ့ ပိတ်ဆို့အရေးယူမှုအသစ်တွေ ထုတ်ပြန်လိုက်ခြင်း ဖြစ်ပါတယ်။ ကျွန်မတို့ရဲ့ မိတ်ဖက်များဖြစ်တဲ့ အီးယူနဲ့ ကနေဒါနိုင်ငံနဲ့အတူ စစ်တပ်ရဲ့ ရန်ပုံငွေ၊ ပစ္စည်းကိရိယာများနဲ့ အရင်းအမြစ်များ ရယူသုံးစွဲခွင့်ကို ပိုမိုကန့်သတ်လိုက်ခြင်းဖြစ်ပါတယ်” ဟု အင်ဒို-ပစိဖိတ်ရေးရာဝန်ကြီးက ဆိုသည်။
ယခုချမှတ်လိုက်သော ပိတ်ဆို့မှုများသည် မြန်မာစစ်တပ်အပေါ် ဖိအားတိုးများစေမည်ဖြစ်ပြီး မြန်မာပြည်သူပြည်သားများနှင့် ၎င်းတို့ မျှော်မှန်းထားသည့် ငြိမ်းချမ်းသောဒီမိုကရေစီ အနာဂါတ်အတွက် ဗြိတိန်က ကူညီထောက်ပံ့မှုများနှင့်အတူ အခိုင်အမာ ရပ်တည်ဆဲဖြစ်ကြောင်း အထက်ပါဝန်ကြီးက အသိပေးသည်။
ထို့အပြင် တာဝန်ခံမှု၊ တရားမျှတမှုရှိရန်နှင့် အကြမ်းဖက်မှုများ အဆုံးသတ်ရန် ဗြိတိန်သည် အီးယူနှင့် ကနေဒါနိုင်ငံနှင့်အတူ ပူးတွဲတောင်းဆိုလိုက်ကြောင်း ဖော်ပြသည်။
