ထန်တလန်တိုက်ပွဲ ဆက်လက်ပြင်းထန်၊ စစ်ကောင်စီ လေကြောင်းမှရိက္ခာပို့ပေး
ဟန်နွေ/People’s Spring
ချင်းပြည်နယ် ဟားခါး-ထန်တလန်မြို့နယ်ကြား ကမ်တလန်း(Kiamtlang)ဒေသရှိ စစ်ကောင်စီတပ်စခန်းအပါအဝင် စခန်းအချို့ကို ချင်းပြည်ကောင်စီ ချင်းပြည်အစိုးရကာကွယ်ရေးတပ်ဖွဲ့များက တိုက်ခိုက်သိမ်းပိုက်ခဲ့ကြောင်း ချင်းသတင်းရင်းမြစ်က ပြောသည်။
အောက်တိုဘာ ၂၈ရက် စစ်ရေးအခြေအနေကို မေးမြန်းရာ ဟားခါးမြို့၌ တိုက်ပွဲပြင်းထန်ခဲ့သည်ဟု ၎င်းက ပြောသည်။
” ကမ်တောင်းပေါ့။ ဒေသဘာသာစကားနဲ့ဆိုရင် ကမ်တလန်းလို့ခေါ်တယ်။ အဲဒီမှာရှိတဲ့ စကစ ယာယီစခန်း ချင်းပြည်အစိုးရတပ်ဘက်က သိမ်းပိုက်နိုင်ခဲ့တယ်။ ပြီးရင် စကစ နေရာယူထားတဲ့ ရယ်အူးထန်းလို့ခေါ်တယ်။ အဲဒါလည်း သိမ်းပိုက်နိုင်ခဲ့တယ်။ နှစ်နေရာပေါ့။ ဟားခါးနဲ့ နီးစပ်တယ်။ဟားခါး – ထန်တလန်ကြားတော့ဖြစ်တယ်။ အဲဒီဘက်က နှစ်နေရာကို ကျနော်တို့ချင်းပြည်တပ်တွေက သိမ်းပိုက်နိုင်ခဲ့တာပါ”ဟု ချင်းသတင်းရင်းမြစ်က ပြောသည်။
Public Service Announcement
ထို့အပြင် ထန်တလန်မြို့တွင်လည်း တိုက်ပွဲပြင်းထန်နေပြီး စစ်ကောင်စီက လေကြောင်းမှ ရိက္ခာခဲယမ်း ဖြည့်တင်းမှုရှိသည်ဟု ဆိုသည်။
အောက်တိုဘာ ၂၈ရက်တွင် ထန်တလန်မြို့ရှိ စစ်ကောင်စီ လက်ကျန် တပ်ဖွဲ့များထံ ရိက္ခာခဲယမ်းများ Y12 လေယာဉ်ဖြင့် ဖြည့်တင်းမှု ရှိသည်ဟု သတင်းရင်းမြစ်က ပြောသည်။
” ထန်တလန်ကတော့တိုက်ပွဲ အကြီး၊အငယ်ရှိပါတယ်။ စကစကလည်း သူတို့ တပ်ကုန်း ပြန်လည်ရရှိဖို့ ထိုးစစ်ဆင်တာရှိပါတယ်။ ကျနော်တို့ဘက်က ခုခံတာ အဲဒါမျိုးနဲ့ တိုက်ပွဲရှိပါတယ်”ဟု ချင်းသတင်းရင်းမြစ်က ပြောသည်။
ချင်းအမျိုးသားတပ်မတော်(CNA)၊ ချင်းဒေသကာကွယ်ရေးတပ်(CDF) တပ်များစုဖွဲ့ထားသည့် ချင်းပြည်ကောင်စီ တပ်ပေါင်းစုသည် ထန်တလန်မြို့သိမ်းပိုက်နိုင်ရေး ဇူလိုင်ကတည်းက ထိုးစစ်ဆင်နေခြင်းဖြစ်ပြီး စစ်ကောင်စီဘက်ကလည်း ဆုံးရှုံးထားသည့် တပ်စခန်းများ ပြန်လည် ရရှိရေး အင်အားဖြည့်ထိုးစစ်ဆင်လျက်ရှိသည်။
