Hazırda həbsdə olan, Gürcüstanın sabiq Prezidenti, ana müxalifət lideri Mixeil Saakaşvili “AzadlıqRadiosu”na müsahibə verib. O, müsahibəsində qarşıdan gələn 26 oktyabr Parlament seçkilərindən danışınıb və bildirib ki, “Hakim partiya seçkini udarsa, müstəqil Gürcüstan “daha mövcud olmayacaq”…”
Gununsesi.info xəbər verir ki, Mixeil Saakaşvili müsahibəsində başqa maraqlı məqamlara da toxunub.
Belə ki, Saakaşvili müsahibəsində “Rusiya Gürcüstana qarşı “hibrid müharibə” aparır, “Gürcü arzusu” hakimiyyətdə qalarsa, ölkənin gələcəyi heç də yaxşı olmayacaq”,- deyə bildirib.
O, o cümlədən bu sözləri də deyib:
“Onlar seçkini saxtalaşdıraraq hakimiyyətdə qalarlarsa, Gürcüstan daha müstəqil ölkə olmayacaq”
Saakaşvili onu da vurğulayıb ki, “Amma biz 12 ildir müqavimət bayrağı ətrafında birləşmişik, yeni nəsil gəlir, Gürcüstanda doğulan, Rusiyaya deyil, Avropaya yönələn nəsil“.
Qeyd edək ki, hələ də zəhərlənmənin təsirini hiss etdiyini deyən Saakaşvili, 2021-ci ilin oktyabrında Ukraynadan Gürcüstanda qayıdarkən saxlanılıb. O, ikinci prezidentlik dönəmi bitəndən sonra Ukraynada yaşayıb, siyasi vəzifələrdə olub. Hazırda isə hakimiyyətdən sui-istifadə ittihamı ilə altı illik həbs cəzası çəkir. Özü və tərəfdarları isə ittihamı qurama sayırlar. Saakaşvili və tərəfdarları onun həbsdə zəhərləndiyini deyirlər. Xarici rəsmilər, təşkilatlar onun azadlığa buraxılmasına çağırırlar, Avropa Parlamenti bu yaxınlarda qətnamə də çıxarıb.
“Onlar mənim sağlıq durumumdan asılı olmadan dərhal və qeyd-şərtsiz buraxılmağımı tələb edirlər, çünki yaxşı bilirlər ki, qondarma ittihamlarla əsir götürülmüşəm”, – Saakaşvili bununla bağlı söyləyib.
Saakaşvili sözlərinə bunu da əlavə edib:
“Ötən il bir neçə ay ölümlə həyat arasında qalmışdım. Hələ də zəhərlənmənin təsirini hiss edirəm”,
Saakaşvili o cümlədən həbsxana şəraitindən gileylənib, üç ildir ki, gün üzünə, təmiz havaya həsrət qaldığını deyib. O, telefon zənglərinin də yasaqlandığını sözlərinə əlavə edib.
Keçmiş prezidentdən Rusiyanın Ukraynada apardığı işğalçı müharibə barədə də soruşuanda, o, Ukraynada qaldığı müddətdə vətəndaşlıq aldığını, 2015-16-cı illərdə Odessa vilayətinin qubernatoru olduğunu bildirib.
“Avropa məğlubiyyətçiliyə, ABŞ isə izolyasionizmə qapılmayınca, Rusiyanın müharibədə məğlubiyyəti qaçılmazdır. Bu baş verməyincə, Rusiyanın şansı yoxdur”, – Gürcüstanın keçmiş prezidenti deyib.
