ထိုင်းနိုင်ငံ၊ ဘန်ကောက်မြို့တော်ရဲ့ ဆေးရုံတစ်ခုရှေ့က လမ်းမှာ ရုတ်တရက် ဆိုးဆိုးရွားရွား မြေကျွံပြိုကျမှုကြီး ဖြစ်ပွားခဲ့ကြောင်း သိရပါတယ်။
စက်တင်ဘာ ၂၄ ရက် မနက်ပိုင်းက ဗီဂျီရာ ဆေးရုံရှေ့က လမ်းမပေါ်မှာ ဧရာမ ကျင်းချိုင့်ကြီးအဖြစ် ကျွံကျသွားပြီး ဓာတ်တိုင်တွေပါ ချိုင့်ကြီးထဲကို ကျကုန်ပါတယ်။ စတုရန်းဆန်ဆန် ကျင်းချိုင့်ကြီးဟာ အလျားနဲ့ အနံ မီတာ ၃၀ စီလောက် ရှည်လျားသလို မီတာ ၅၀ လောက် နက်ရှိုင်းပြီး ကားတစ်စီးလည်း ပြုတ်ကျသွားခဲ့တယ်လို့ ထိုင်းသတင်းဌာနတွေက ဖော်ပြခဲ့ပါတယ်။
ကျင်းချိုင့်ကြီးရဲ့ ဘောင်နှုတ်ခမ်းတွေက ဆက်ပြီး ပဲ့ကျနေတဲ့နောက် ဗီဂျီရာ ဆေးရုံမှာရှိတဲ့ လူနာတွေကို အရေးပေါ် ရွှေ့ပြောင်းပေးထားရပါတယ်။ ကနဦး စုံစမ်း သိရှိမှုတွေအရ အခုလို သည်းထိတ်ရင်ဖို ကိစ္စကြီး ကြုံခဲ့တဲ့တိုင် လူထိခိုက် သေဆုံးမှုတော့ မရှိခဲ့ဘူးလို့ သိရပါတယ်။ လူမှုကွန်ရက်ပေါ် ပျံ့နှံ့လာတဲ့ ဗီဒီယို တစ်ခုမှာတော့ လမ်းပခုံးသားတွေ ဆက်ပြီး ပဲ့ကျနေရာကနေ ဓာတ်တိုင်တွေ ရှော့ရိုက်ပြီး ပေါက်ကွဲမှုတချို့ ဖြစ်ပေါ်နေတာကိုပါ မြင်ခဲ့ရပါတယ်။
အာဏာပိုင်တွေက ဆေးရုံရဲ့ လူနာတွေကိုသာ မကဘဲ အနီးတဝိုက် နေအိမ်တွေက ဒေသခံတွေကိုပါ ကူညီ ရွှေ့ပြောင်းပေးနေတယ်လို့ ပြောပါတယ်။
Public Service Announcement
ဘန်ကောက်မြို့ထဲမှာ အခုလိုမျိုး ကြီးမားလှတဲ့ မြေကျွံချိုင့်ခွက်ကြီး ဘာကြောင့် ဖြစ်လာသလဲ ဆိုတာကိုတော့ တိတိကျကျ မသိရသေးပါဘူး။ ဒေသခံတွေကတော့ အဲဒီ ကျင်းချိုင့်ကြီးဟာ လက်ရှိထက် ပိုမို ကျယ်ပြန့်လာမှာကို စိုးရိမ် စိတ်ပူနေကြပါတယ်။
ကိုးကား: Khaosod
