အပစ်အခတ် ရပ်စဲရေးအတွက် ကြားဝင် ညှိပေးကြဖို့ ပင်လယ်ကွေ့ဒေသ အာရပ်နိုင်ငံတွေကို အီရန်က မေတ္တာရပ်ခံခဲ့ကြောင်း သတင်းတွေ ထွက်ပေါ်လာပါတယ်။
အီရန်နဲ့ အစ္စရေးကြားက စစ်ရေး ပဋိပက္ခတွေဟာ ၅ ရက်ကြာမြင့်လာတဲ့ထိ ဆက်လက် ပြင်းထန်နေပြီးတဲ့နောက် အီရန်ဖက်က အပစ်ရပ်ဖို့ စတင် အရိပ်အကဲ ပြလာတာလို့ အရှေ့အလယ်ပိုင်း ဒေသထဲက ယုံကြည်ရတဲ့ သတင်းရင်းမြစ်တချို့က Reuters သတင်းဌာနဆီ ပြောကြားခဲ့ပါတယ်။
တဟီရန်မြို့တော်မှာ ရှိနေတဲ့ အီရန်အစိုးရဟာ လက်ရှိ ပဋိပက္ခကို ရပ်စဲဖို့ ဖြစ်နိုင်ခြေတွေအတွက် ကာတာ၊ ဆော်ဒီအာရေးဘီးယား၊ အိုမန် အစိုးရတွေကို ဆက်သွယ်ခဲ့တယ်လို့ သိရပါတယ်။
အီရန်က အမေရိကန် သမ္မတ ဒေါ်နယ်လ်ထရမ့်နဲ့ ရင်းနှီးတဲ့ အဲဒီ နိုင်ငံတွေရဲ့ အစိုးရတွေဟာ အစ္စရေးအပေါ် ထရမ့်ရဲ့ ဩဇာကို အသုံးချပြီး အပစ်အခတ် ရပ်စဲရေးကိစ္စ ဖိအားပေးစေဖို့ မေတ္တာရပ်ခံခဲ့တာလို့ ဆိုပါတယ်။
Public Service Announcement
အပြန်အလှန် အနေနဲ့ အီရန်ဟာ နိုင်ရဲ့ နျူကလီးယား နည်းပညာ ထိန်းချုပ်ရေး ကိစ္စနဲ့ ပတ်သက်လို့ အမေရိကန် အစိုးရနဲ့ ညှိနှိုင်းရာမှာ ကိစ္စအများစုကို အလျှော့ပေး လိုက်လျောသွားမယ်လို့ ကမ်းလှမ်းထားကြောင်း အီရန် အစိုးရနဲ့ နီးစပ်တဲ့ သတင်းရင်းမြစ် ၂ ခု၊ အရှေ့အလယ်ပိုင်း သံတမန် ရပ်ဝန်းထဲက သတင်းရင်းမြစ် ၃ ခုတို့က Reutersကို သီးခြားစီ မှတ်ချက်ပေးထားခဲ့ကြပါတယ်။
အီရန်နဲ့ အစ္စရေးကြားမှာ ဝင်ညှိပေးနိုင်ဖို့အတွက် ပင်လယ်ကွေ့နိုင်ငံ ခေါင်းဆောင်တွေနဲ့ ထိပ်တန်း သံတမန် အရာရှိတွေဟာ ပြီးခဲ့တဲ့ ရက်ပိုင်းအတွင်း အတော်ကြီး အလုပ်များနေခဲ့ကြပါတယ်။ အီရန်က အပစ်ရပ်ဖို့ လိုလားမှု ရှိလာတယ်ဆိုတဲ့ သတင်းကြောင့် အရှေ့အလယ်ပိုင်းမှာ ရေနံစျေးဟာ တစ်စည်ကို တစ်ဒေါ်လာလောက် ကျရိပ်ပြန်ပြလာခဲ့ပါတယ်။
ပင်လယ်ကွေ့ ဒေသတွင်း နိုင်ငံတွေက အစ္စရေးနဲ့ အီရန်ကြားက ပဋိပက္ခဟာ လက်ရှိထက် ပိုကျယ်ပြန့်ပြီး အလုံးစုံ စစ်ပွဲကြီး အဆင့်ထိ ရောက်သွားမှာကို အထူးတလည် စိုးရိမ်နေပြီး အပစ်အခတ် ရပ်စဲမှု အထမြောက်စေရေး အင်တိုက်အားတိုက် ကြိုးစားနေကြောင်း ဒေသခံ သံတမန်ရေး အသိုက်အဝန်းက ဆိုပါတယ်။
အီရန်ရဲ့ ဆက်သွယ်မှု မတိုင်ခင် ကတည်းက ကာတာ၊ အိုမန်နဲ့ ဆော်ဒီအာရေးဘီးယားတို့ဟာ အစ္စရေးရဲ့ တိုက်ခိုက်မှုတွေ ရပ်တန့်ရေး ဖိအားပေးဖို့ ထရမ့်ကို တောင်းဆိုနေခဲ့ပြီး ဖြစ်တယ်လို့လည်း သံတမန် အသိုက်အဝန်းက ပြောပါတယ်။
အပစ်အခတ် ရပ်စဲရေး ကိစ္စအတွက် ပါဝင်ကူညီပေးဖို့ ပင်လယ်ကွေ့ ဒေသတွင်း နိုင်ငံတွေကို အီရန်က တောင်းဆိုထားတယ်ဆိုတဲ့ သတင်းတွေအပေါ် အိမ်ဖြူတော်ကတော့ ဘာမှတ်ချက်မှ မပေးသေးဘဲ နှုတ်ဆိတ်နေဆဲပါ။
၅ ရက်ကြာမြင့်လာပြီဖြစ်တဲ့ စစ်ရေးပဋိပက္ခတွေအတွင်း အီရန်ဖက်မှာ စုစုပေါင်း ၂၂၄ ဦး အသေအပျောက် ရှိခဲ့ပြီး အစ္စရေးမှာတော့ ၂၄ ဦး သေဆုံးခဲ့ကြောင်းလည်း သိရပါတယ်။
ကိုးကား: Reuters
