ဇွန်-၁၆၊၂၀၂၅။ဇော်ရမ်း/People’s Spring
ဖားကန့်မြို့နယ်၊ မှော်ဝမ်းလေး နှင့် မှော်ဝမ်းကြီးရွာ၌ ယနေ့ညနေပိုင်းမှစ၍တိုက်ပွဲပြင်းထန်နေပြီး ညပိုင်းတိုက်ပွဲတွင်ပိတ်မိနေသည့်အရပ်သားအချို့ ထိခိုက်မှုများရှိနေကြောင်းကနဦးသတင်းရရှိသည်။
စစ်ကောင်တပ်စီစစ်ကြောင်းသည်၊ မှော်ဝမ်းလေးနှင့် မှော်ဝမ်းကြီးရွာကိုဇွန် ၁၆ ရက်နံနက်ပိုင်း၌ ရောက်ရှိလာပြီး မှော်ဝမ်းကြီးရွာမှ ဒေသခံများ အချိန်မှီတိမ်းရှောင်နိုင်ခဲ့သော်လည်း မှော်ဝမ်းလေးရွာမှဒေသခံအချို့သည်ပိတ်မိသွားခဲ့သည်ဟု ဖားကန့်ဒေသခံတဦးကပြောသည်။
Public Service Announcement
၎င်းက “စစ်တပ်ကသူတို့ကိုတိုက်ရင်ရွာကိုမီးရှို့မယ်လို့ ခြိမ်းခြောက်ပြီးဝင်လာတာ။နေ့ခင်းအထိကသေနတ်ကျည်မပေါက်သေးဘူး။ညနေကျတော့ အခြေအနေ တင်းမာပြီးတိုက်ပွဲစဖြစ်တာ။ အခုညပိုင်း အရပ်သားသုံးယောက်ထိထားတယ်။ဆေးရုံကားသံတွေလည်းကြားတယ်”ဟုပြောသည်။
အခြားဒေသခံတဦးကလည်း “တတ်နိုင်တဲ့ဘက်က ကြိုးစားပီးညှိနှိုင်းပေးသော်ငြားလည်း ပြေလည်မှုမရသည့်အဆုံးညနေ ၅ ပတ်ဝန်းကျင်မှာတော့ အသေး၊အကြီးပေါင်းစုံနဲ့ အားစမ်းနေကြပါပြီ။ပြည်သူတွေ ဘေးကင်းကြပါစေ။ရွာနှစ်ရွာလည်းထိခိုက်ပျက်စီးမှု အနည်းဆုံးဖြစ်ပါစေ”ဟုလူမှုကွန်ရက်တွင်ရေးတင်ထားသည်။
တိုက်ပွဲအခြေအနေအသေးစိပ်ကိုမူမသိရသေးပေ။
စစ်တပ်စစ်ကြောင်းသည် မေလ ၂၇ရက်က လုံးခင်းကျေးရွာအုပ်စုကို စတင်ဝင်ရောက်စဉ် KIA၊KPDF က တိုက်ခိုက်ပြီးနောက်ပိုင်းဆက်လက်တိုက်ခိုက်ပါကနေအိမ်များကိုမီးရှို့မည်ဟုဒေသခံများကို ခြိမ်ခြောက်ကာ ဖားကန့်သို့ စစ်ကြောင်းထိုးလာခဲ့ခြင်းဟုသိရသည်။
ဖားကန့်ရောက်စစ်ကောင်စီစစ်ကြောင်းကို KIAနှင့် KPDF ပူးပေါင်းတပ်က ဇွန်လ ၅ရက်၊ဇွန်လ ၉ရက်နှင့်ဇွန်လ ၁၀ရက်၌ တိုက်ခိုက်ခဲ့ပြီး ဇွန်လ ၁၀ရက်မှစ၍ ယနေ့အထိ စစ်ရေးဆက်လက်တင်းမာနေသည်။စစ်တပ်ကလက်နက်ကြီးဖြင့်ပစ်ခတ်ခြင်း၊ စစ်ကြောင်းထိုးစဥ် ဒေသခံပြည်သူများကိုသတ်ဖြတ်ခြင်းများကြောင့်မေလ ၂၈ရက်မှ ဇွန်၁၆ ရက်နေ့အထိ အရပ်သား သေဆုံးသူ၃၀ဦးနီးပါးရှိလာသည်။
(ဖားကန့် မှော်ဝမ်းလေး နှင့် မှော်ဝမ်းကြီးရွာတွင်ဇွန် ၁၆ ရက်ညနေပိုင်း၌ တိုက်ပွဲဖြစ်ပွားစဥ်။ ရုပ်သံ-Laisin Shingran)
