ဇန်နဝါရီ-၂၃၊ ၂၀၂၆။ဇေအောင်/People’s Spring
မကွေးတိုင်း၊ စလင်းမြို့နယ်မှာ စစ်ကောင်စီတပ်က စစ်ရှောင်တွေနေတဲ့ ဘုရားတန်ဆောင်းပေါ် ဒရုန်းနဲ့ဗုံးချတိုက်ခိုက်လို့ (၁)နှစ်သားကလေးငယ် အပါအဝင် ၂ဦး သေဆုံးခဲ့ပြီး ကလေးမိခင် အသက်အန္တရာယ် စိုးရိမ်နေရပါတယ်။
ပြီးခဲ့တဲ့ ဇန်နဝါရီ ၁၈ ရက်က စလင်းမြို့နယ်၊ မကျီးဖျားအုပ်စု၊ ကျောက်ခဲကုန်းရွာက စစ်ဘေးရှောင်တွေ လာရောက်နေထိုင်နေတဲ့ ဘုရားတန်ဆောင်းပေါ်ကို စစ်တပ်က ဒရုန်းနဲ့ ဗုံးလာကြဲလို့ အသက်(၇၀)အရွယ် အမျိုးသားတစ်ဦး နေရာတင်သေဆုံးပြီး မိခင်နဲ့ (၁)နှစ်အရွယ်ကလေး ငယ် ဒဏ်ရာရခဲ့ကြောင်း၊ နှစ်ရက်အကြာမှာတော့ ကလေးပါသေဆုံးခဲ့ကြောင်း ဒေသခံတွေနဲ့ စလင်း ပအဖက ပြောပါတယ်။
“ ကလေးကတော့၂၀ ရက်နေ့မှ ဆုံးပါတယ်မိခင်လဲ စိုးရိမ်ရတဲ့အခြေအနေပါ” လို့ စလင်းပကအဖွဲ့က တာဝန်ရှိသူက ပြောပါတယ်။
Public Service Announcement
ပြီးခဲ့တဲ့ ဇန်နဝါရီ ၁၉ ရက်ကလည်း ဝမ်းပြည့်ကျေးရွာကို ဒရုန်းနဲ့ဗုံးချလို့ ပြည်သူ ၄ဦး ထိခိုက်ဒဏ်ရာရခဲ့ကြောင်း ဒေသခံတွေက ပြောပါတယ်။
စစ်ကောင်စီတပ်ဟာ စလင်းမြို့နယ်ထဲက ကျေးရွာတွေကို ဒရုန်းတွေ လက်နက်ကြီးတွေနဲ့ တိုက်ခိုက်နေပြီး ပြည်သူ ၃၀ထက်မနည်း ထိခိုက်ဒဏ်ရာများရှိကာ သေဆုံးသူတွေလည်း ရှိနေပါတယ်။ စလင်းမြို့နယ်မှာ ကျေးရွာပေါင်း ၁၅ရွာလောက်ဟာ စစ်ဘေးရှောင်နေရပြီး ပြီး စစ်ဘေးရှောင်ဦးရေဟာ ၅,၀၀၀ အထက်မှာရှိနေကြောင်း၊ စစ်ရှောင်တွေဟာစားနပ်ရိက္ခာတွေ ဆေးဝါးတွေနဲ့ အခြားသော လူသုံးကုန်ပစ္စည်းတွေလည်း လိုအပ်နေကြောင်း ပြည်သူ့ညီနောင်စလင်းအဖွဲ့ထံက သိရပါတယ်။
