ဇန်နဝါရီ ၂၂၊ ၂၀၂၆။ ထားမြတ်/People’s Spring
စစ်ကိုင်းတိုင်း၊ ကလေးမြို့ကနေ မော်တော်ယာဉ် တန်းနဲ့ လာတဲ့ စစ်ကောင်စီတပ် တွေဟာ ကလေး-တီးတိန်လမ်းပိုင်း သိုင်းငင်းကတဆင့် ဖလမ်းမြို့နယ်ကို ဝင်ရောက်လာကြောင်း ချင်းညီနောင် အဖွဲ့ဝင် ချင်းအမျိုးသားကာကွယ်ရေးတပ်(CNO/CNDF) ပြောရေးဆိုခွင့်ရှိသူ ဆလိုင်းတင်မီက ဒီကနေ့ ဇန်နဝါရီ ၂၂ရက်ညမှာ အတည်ပြုပါတယ်။
အာဏာသိမ်းစစ်တပ်ဟာ ဖလမ်းမြို့ ပြန်ရဖို့ ၂၀၂၅ နိုဝင်ဘာလဆန်းကတည်းက ထိုးစစ်ဆင်လာလို့ ဖလမ်းမြို့နယ်အတွင်း တိုက်ပွဲတွေ မကြာခဏ ဖြစ်ပွားနေတာပါ။
အခု ဇန်နဝါရီ ၂၀ရက်မှာတော့ စစ်ကောင်စီတပ်ဟာ စစ်ကိုင်းတိုင်း ကလေးဘက်ကနေ အခုလို စစ်ဆင်အားဖြည့်လာတာဖြစ်ပါတယ်။အဲဒီ စစ်ယာဉ်တန်းမှာ အင်အား ၂၀၀ ကျော် ၃၀၀ ဝန်းကျင်ရှိတယ်လို့ ချင်းညီနောင်အဖွဲ့ဝင် PDF ဇိုလဲန်း စစ်ဦးစီးချုပ် ကိုဂိဒွန်က ပြောပြထားပါတယ်။
Public Service Announcement
လတ်တလော ဖလမ်းမြို့နယ်အတွင်း စစ်ရေး အခြေအနေကို ဆက်လက်စုံစမ်းနေဆဲဖြစ်ပါတယ်။ The Voice of Chinland ရဲ့ ဒီကနေ့ သတင်းဖော်ပြချက်မှာတော့ ကလေးမြို့ကနေ တက်လာပြီး သိုင်းငင်းရောက်နေတဲ့ စစ်ကောင်စီတပ်ဟာ ဖလမ်းမြို့နယ်ကို ဆက်လက်ထွက်ခွာရာ ချင်းတော်လှန်ရေးတပ်ဖွဲ့တွေက မိုင်းဆွဲတိုက်ခိုက်ခဲ့တယ်လို့ အသိပေးထားပါတယ်။
စစ်ကောင်စီတပ်ဟာ သိုင်းငင်းဘက်ကနေ ဖလမ်းမြို့ကို ထိုးစစ်ဆင်နေသလို ဖလမ်းမြို့နယ် ဝေဘူလမြို့နေ ဖလမ်းဘက်ကို စစ်ကြောင်းထိုးနေတာရှိပြီး ဇန်နဝါရီ တတိယပတ်အတွင်း ဖလမ်းမြို့နယ်မှာ တိုက်ပွဲတွေ ဆက်ရှိခဲ့ပါတယ်။
ဇန်နဝါရီ ၁၈ရက် ဖလမ်းမြို့နယ်တိုက်ပွဲမှာ စစ်ကောင်စီတပ်ဘက်က သေဆုံးထိခိုက်ရှိခဲ့သလို့ ချင်းတော်လှန်ရေးတပ်ဖွဲ့ဘက်ကလည်း ကျဆုံးမှု အချို့ရှိခဲ့ကြောင်း ချင်းပြည်ကောင်စီ ချင်းပြည်အစိုးရကာကွယ်ရေးဌာန ပြောရေးဆိုခွင့်ရှိသူ နိုင်ဂျွန်ကိန်းက ပြောထားပါတယ်။
