အဖမ်းခံလို့ ထိုင်းရဲတပ်ဖွဲ့အပ်နှံ
ဇန်နဝါရီ-၂၂၊၂၀၂၆။DEE/People’s Spring
နယ်စပ်မြို့ဖြစ်တဲ့ ထိုင်းနိုင်ငံ၊ မဲဆောက်မြို့မှာ ထိုင်းရဲကို သေနတ်နဲ့ပစ်ခတ်ပြီး ထွက်ပြေးတဲ့ မြန်မာလူငယ်ကို ကော်ဘရာစစ်ဆင်ရေးမှူး ဗိုလ်မှူးစောဒါဘောက ဖမ်းဆီးပြီး ထိုင်းရဲတပ်ဖွဲ့ထံ အပ်နှံပေးခဲ့ပါတယ်။
အသက်(၂၁)နှစ်အရွယ် နဂါးကြီး (ခ)နိုင်လင်းအောင်ဟာ ဇန်နဝါရီ ၂၀ရက်က မဲဆောက်မြို့ မယ်ကုရပ်ကွက် 7/11 စတိုးဆိုင် အနီးမှာ ထိုင်းရဲကို သေနတ်နဲ့ပစ်ခတ် ထွက်ပြေးသွားတာ ဖြစ်ပါတယ်။
Public Service Announcement
အဲဒီနောက် ကော်ဘရာစစ်ဆင်ရေးမှူး ဗိုလ်မှူးဒါဘောထံ သွားရောက်အဖမ်းခံခဲ့ရာ ဗိုလ်မှူးဒါဘောက ဒီကနေ့(ဇန်နဝါရီ၂၂ရက်)မှာ ထိုင်းရဲတပ်ဖွဲ့ထံ အပ်နှံခဲ့တာ ဖြစ်ပါတယ်။
ထိုင်းရဲ သေနတ်နဲ့ ပစ်ခတ်သူ နဂါးကြီးဟာ ယခင်က ကော်ဘရာစစ်ကြောင်းက PDF ရဲဘော်တစ်ဦးဖြစ်ပြီး PDFရဲဘော်အဖြစ်က နှုတ်ထွက်သွားတာဟာ ကြာပြီဖြစ်ကြောင်း ကော်ဘရာစစ်ကြောင်းနဲ့ နီးစပ်သူက ပြောပါတယ်။
“ သူကထိုင်းရဲသေနတ်နဲ့ပစ်ပြီးတော့ပြေးစရာနေရာ မရှိဘူး ဖြစ်နေတယ် ထင်ပါတယ်။ အဲဒီမှာ ဗိုလ်ဒါဘောဆီ သွားအဖမ်းခံတာ။ ဗိုလ်ဒါဘောကလည်း KNUနဲ့ ထိုင်းနဲ့ဆက်ဆံပတ်သက်မှုတွေဆိုတော့ သွားအပ်ပေးတာ။ သူက အရင်က ဗိုလ်ဒါဘောဆီမှာ ထွက်သွားတာ ကြာပြီ။ တော်လှန်ရေးနဲ့ ဘာမှ
မပတ်သက်တော့ဘူး။ တချို့တွေက တော်လှန်ရေး ပုံဖျက်သလို ရေးနေတာ” လို့ ကော်ဘရာစစ်ကြောင်းနဲ့နီးစပ်သူကပြောပါတယ်။
ထိုင်းရဲ သေနတ်နဲ့ ပစ်ခတ်သူ နဂါးကြီးကို ထိုင်းရဲတပ်ဖွဲ့က ဒီကနေ့မှာ ဖြစ်စဉ်သရုပ်ပြမှုတွေ လုပ်ခဲ့ပါတယ်။
ဇန်နဝါရီ ၂၀ရက်က နဂါးကြီးနဲ့ အဖော်ဖြစ်သူဟာ မဲဆောက်မြို့ မယ်ကုရပ်ကွက် 7/11စတိုးဆိုင် အနီးမှာ သေနတ်အရောင်းအဝယ်လုပ်နေစဉ် ကင်းလှည့်နေတဲ့ ထိုင်းရဲက မသင်္ကာလို့ စစ်မေးရန်ကြိုးပမ်းစဉ် နဂါးကြီးက ထိုင်းရဲကို သေနတ်နဲ့ ပစ် ထွက်ပြေးသွားတာပါ။
နဂါးကြီးနဲ့ ဆိုင်ကယ်မောင်းသူကို ထိုင်းရဲတပ်ဖွဲ့က အခင်းဖြစ်နေရာမှာဘဲ ဖမ်းမိထားတာပါ။
