စက်တင်ဘာ-၂၃၊၂၀၂၅။လူအေး/People’s Spring
စစ်ကောင်စီစစ်ကြောင်းပျက်ပြီး ဆုတ်ခွာထွက်ပြေးသွားတဲ့ ကနီမြို့နယ်၊ ချောင်းမရွာတိုက်ပွဲမှာ ဆေးကြောင်နေတဲ့ ပြည်သူ့စစ်မှုထမ်းသင်တန်းဆင်းစစ်သားသစ်တွေကို ကာကွယ်ရေးတပ်တွေဖမ်းမိခဲ့ပါတယ်။
ဆေးကြောင်ပြီး စကားတွေ ဗလုံးဗထွေးပြောနေတဲ့ စစ်မှုထမ်းသင်တန်းအဆင့်တစ်ယောက်ရဲ့ ရုပ်သံမှတ်တမ်းကိုဗမာလွတ်မြောက်ရေးဒီမိုကရက်တစ်တပ်ဦး (BLDF) ရဲဘော်တွေကထုတ်ပြန်ခဲ့ပါတယ်။
“ ဆေးကြောင်နေတဲ့ ပစ(ပြည်သူ့စစ်မှုထမ်းသင်တန်းဆင်း) တွေ တော်တော်သေဆုံးတယ်။ ဖမ်းမိတာတွေလည်းရှိတယ်။ ဆေးပြားတွေနဲ့အတူ ဖမ်းမိထားတာတွေ” လို့ ချောင်းမတိုက်ပွဲမှာပါဝင်တိုက်ခိုက်ခဲ့တဲ့ကာကွယ်ရေးရဲ ဘော်တစ်ဦးကပြောပါတယ်။
Public Service Announcement
ရုပ်သံမှတ်တမ်းမှာ ဆေးကြောင်နေပြီး ဒဏ်ရာရထားတဲ့စစ်သားသစ် ၁ဦးကို PDF တစ်ယောက်ကကူညီဖို့ ဆေးအဖွဲ့ခေါ်နေတာကိုတွေ့ရပါတယ်။စစ်သားသစ်နဲ့ စကားပြောဖို့ကြိုးစားနေပေမယ့်စစ်သားသစ်ဟာဆေးကြောင်ပြီး အဆီအပေါ်မတည့် ပြောချင်ရာပြောနေတာကိုတွေ့ရပါတယ် ။
စစ်ကောင်စီတပ်ဖွဲ့ဝင်တွေနဲ့ စစ်မှုထမ်းသင်တန်းဆင်းတွေဟာ စစ်ကိုင်းတိုင်းအပြင် နိုင်ငံအနှံ့ကတိုက်ပွဲတွေမှာ စိတ်ကြွဆေးပြားတွေသုံးပြီးတိုက်ပွဲဝင်နေတယ်လို့ တော်လှန်ရေးအင်အားစုတွေကထုတ်ပြန်ထားပါတယ်။ တိုက်ပွဲတွေထဲမှာ သေဆုံးမှုအများဆုံးက စစ်မှုထမ်းသင်တန်းဆင်းတွေဖြစ်ပြီး ပုံထပ်နေတဲ့ ရုပ်အလောင်းတွေပေါ်ကိုနင်းဖြတ်ပြီး တိုက်ပွဲဝင်ခဲ့ရတယ်လို့ စစ်ကိုင်းတိုင်းကကာကွယ်ရေးရဲ ဘော်တစ်ဦးကပြောပါတယ်။
” ပစတွေ (ပြည်သူ့စစ်သင်တန်းဆင်းစစ်သားသစ်)က ဓားစာခံတွေ။သူတို့ကို သေနတ်နဲ့ ကျည်ထုတ်ပေးပြီး PDFတွေ ကျည်ကုန်အောင် ရှေ့တန်းကိုတွန်းလွှတ်တာ” လို့ PDFရဲဘော်တစ်ဦးကဆိုပါတယ်။
ကနီမြို့နယ် ချောင်းမရွာမှာ စက်တင်ဘာလဆန်းတုန်းက တိုက်ပွဲဖြစ်ပွားခဲ့ပြီး စက်တင်ဘာလ၁၁ရက်နေ့တိုက်ပွဲမှာ စစ်ကောင်စီဆုတ်ခွာ ထွက်ပြေးသွားပတာပါ။ အဲဒီတိုက်ပွဲမှာ စစ်ကောင်စီဘက်ကထိခိုက်သေဆုံးမှုတွေများပြားခဲ့ပြီး အမှတ်(၁)စစ်ဒေသ၊ ယင်းမာပင်ခရိုင်၊ ယင်းမာပင်မြို့နယ် ပကဖ ULF စစ်ကြောင်းက စစ်ကြောင်းမှူး ရဲဘော်နိုင်မင်းနဲ့ ရဲဘော်အချို့ ထိခိုက်ကျဆုံးခဲ့ပါတယ်။
ဆုတ်ခွာထွက်ပြေးနေတဲ့ စစ်ကောင်စီစစ်ကြောင်းကို ကာကွယ်ရေးတပ်ဖွဲ့တွေက ကြားဖြတ်တိုက်ခိုက်ခဲ့စဉ် စက်တင်ဘာလ၁၆ရက်နေ့က ၃ဦးထပ်ဖမ်းမိပါတယ်။ စစ်ကောင်စီက ကနီမြို့ကိုပြန်ပြီးစစ်ကြောင်းထိုးဖို့ကြိုးစားနေပြီး ပါရာမော်တာနဲ့ မကြာခဏလာပြီး ဗုံးကြဲနေပါတယ်။အခုအခါမှာ စစ်ကောင်စီက ကနီမြို့နဲ့နယ်ခြင်းဆက်နေတဲ့ ယင်းမာပင်မြို့နယ်စပ်မှာ တပ်ပြန်စုစည်းနေတယ်လို့ သတင်းရရှိပါတယ်။
စစ်ကောင်စီကအတင်းအဓမ္မစစ်သားစုဆောင်းထားတဲ့ စစ်မှုထမ်းသင်တန်းဆင်းတွေအနေနဲ့ လက်နက်ချအလင်းဝင်ဖို့ ကာကွယ်ရေးတပ်ဖွဲ့တွေက တိုက်တွန်းထားပါတယ်။ ရှေ့တန်း၌ မည်သည့်နေရာတွင်မဆို လက်နက်ချ၊အညံ့ခံလိုပါက အချိန်မရွေး လာရောက်နိုင်ကြောင်းနဲ့ အလံဖြူထောင်သူတိုင်းကို ကောင်းမွန်စွာ ပြုစုစောင့်ရှောက်ပြီး မိသားစုဆီပို့ဆောင်ပေးမယ်လို့လည်း အသိပေးထားပါတယ်။ ဒါ့အပြင်လက်နက်နဲ့ အလင်းဝင်ပါက ဆုငွေ ချီးမြှင့်ပေးသွားမယ်လို့ အသိပေးထားပါတယ်။
လူငယ်၊ လူရွယ် တွေအနေနဲ့ စစ်မှုထမ်းဖို့အဖမ်းမခံရခင်လွတ်အောင်ရှောင်ကြဖို့နဲ့ ပေါ်တာပါပြီး သင်တန်းပြီးသွားရင် မူးယစ်သားကောင်တွေအဖြစ်နဲ့ အသိဉာဏ်ပျောက်ဆုံးပြီး တိုက်ပွဲထဲမှာ သေဆုံးကြရလိမ့်မယ်လို့ ကာကွယ်ရေးရဲဘော်တွေက သတိပေးထားပါတယ်။
သင်တန်းဆင်းစစ်သားသစ်တဦးကလည်း စစ်တပ်က ရက်ရှည်တိုက်ပွဲတွေဆိုရင် စစ်သားတွေကိုမူးယစ်စိတ်ကြွဆေးတွေကြွေးတာဟာ ပုံမှန်လိုဖြစ်နေပြီလို့ သူ့ရဲ့ တစ်တော့မှာပြောထားပါတယ် ။
