စက်တင်ဘာ−၁၀၊ ၂၀၂၅။ ရဲခေါင်/People’s Spring
ကရင်နီပြည်နယ်၊ ဒီးမော့ဆို-ဖရူဆို ပြည်ထောင်စုလမ်းပိုင်း တိုက်ပွဲအတွင်း ရဲဘော်နှစ်ဦးကျဆုံးခဲ့ကြောင်း ကရင်နီတိုင်းစစ်ဌာန၊ အမှတ် (၁၁၀၇)တပ်ရင်းက ယနေ့ ထုတ်ပြန်သည်။
ရဲဘော်သက်အောင်(ခ)အောင်ပုနှင့် ရဲဘော်ဒိုးအီတို့သည် စက်တင်ဘာ ၇ရက် နှင့် ၈ ရက်က ဖြစ်ပွားခဲ့သည့် ငွေတောင်ရွာသစ်တိုက်ပွဲအတွင်း အသက်ပေးခဲ့ရသည်ဟု ဆိုသည်။
ရဲဘော်သက်အောင်နှင့် ရဲဘော်ဒိုးအီတို့သည် တော်လှန်ရေးတာဝန်များကို ကျေပွန်စွာထမ်းဆောင်ခဲ့သူများဖြစ်ကြောင်း အသိပေးသည်။ မြင့်မြတ်စွာ အသက်ပေးခဲ့ရသော ရဲဘော်တို့နှင့်အတူ နွေဦးတော်လှန်ရေးအာဇာနည်တို့အား တိုင်တည်၍ စစ်ကောင်စီကို အမြစ်ပြတ်ချေမှုန်းသွားမည်ဟု ထုတ်ပြန်ထားသည်။
Public Service Announcement
“ငွေတောင်ရွာသစ်ကို စခ တွေ ရသွားတယ်။ ဒါပေမယ့် လမ်းမကြီးရဲ့ ဒီးမော့ဆိုဘက်ခြမ်း ပတိုငံရွာဘက်က စကစစစ်ကြောင်း မြို့ထဲဘက်ကို ပြန်ဆုတ်သွားရတယ်”ဟု ကရင်နီစစ်ဘက်သတင်းရင်းမြစ်က လူထုနွေဦးသို့ ပြောသည်။
ငွေတောင်ရွာသစ်သည် ဖရူဆိုမြို့နယ်အတွင်းရှိကာ ထိုမှတဆင့် ထီးပေါ်ဆို၊ ထီးသော်ကူးကျေးရွာများဘက်သို့ စစ်ကောင်စီတပ်က စစ်ကြောင်း ဆက်ထိုးနိုင်ကြောင်း ၎င်းက ခန့်မှန်းသည်။
“ဒီးမော့ဆိုနဲ့ ဖရူဆိုအစပ်က လမ်းကြောတစ်ခုကို စကစဘက်က ရထားတယ်။ တိုက်ပွဲတွေကတော့ ဆက်ဖြစ်နေတုန်းပါပဲ”ဟု ဒီးမော့ဆိုအခြေစိုက်ကာကွယ်ရေးရဲဘော်တစ်ဦးက ပြောသည်။
သြဂုတ်လနောက်ဆုံးပတ်နှင့် ယခုစက်တင်ဘာလဆန်းပိုင်းအတွင်း ငွေတောင်ရွာသစ်နှင့် ပတိုငံ တိုက်ပွဲ၌ စစ်ကောင်စီတပ်မှ ထိခိုက်သေဆုံးသူ ၂၀ ထက်မနည်းရှိခဲ့ပြီး တော်လှန်ရေးအင်အားစုများက လက်နက်တချို့ရရှိထားသည်။
ကရင်နီဒေသတွင်း စစ်ရေးအရ အရေးပါသည့် လွိုင်ကော်-ဒီးမော့ဆို-ဖရူဆို လမ်းပိုင်းစိုးမိုးရေးနှင့် ပိတ်မိနေသည့် ဖရူဆို မြို့စောင့်တပ်များ စစ်ရေးလှုပ်ရှားနိုင်ရန် စစ်ကောင်စီတပ်က ဒီးမော့ဆိုမြို့မှတဆင့် စစ်ကြောင်းထိုးနေခြင်းဖြစ်သည်။
ဖရူဆိုမြို့နယ်တွင် အမှတ်(၁၄)တန်းမြင့်စစ်ရေးလေ့ကျင့်ရေးကျောင်း၊ ခမရ (၅၃၁)နှင့် ခမရ(၄၂၈)တပ်ရင်းများအခြေစိုက်ထားပြီး လွန်ခဲ့သည့်သုံးလကစ၍ လေကြောင်းမှတဆင့် စစ်ကောင်စီက ခဲယမ်း၊ရိက္ခာ များဖြည့်တင်းထားကြောင်း ကရင်နီအမျိုးသားများကာကွယ်ရေးတပ် (KNDF)က ထုတ်ပြန်ထားသည်။
