အမေရိကန်ဆီက တိုက်လေယာဉ်တွေ ဝယ်ယူမယ့် အစီအစဉ်ဟာ ဘဏ္ဍာရေး အကျပ်အတည်းကြောင့် ဆိုင်းငံ့ထားရဖွယ် ရှိတယ်လို့ ဖိလစ်ပိုင်က အတည်ပြု ဝန်ခံခဲ့ပါတယ်။
ဒေသတွင်း စူပါပါဝါ အင်အားကြီးနိုင်ငံဖြစ်တဲ့ တရုတ်နဲ့ ရေပိုင်နက် အငြင်းပွားမှုတွေကြောင့် စစ်အင်အား ဖြည့်တင်း တည်ဆောက်ဖို့ ကြိုးစားနေတဲ့ ဖိလစ်ပိုင် အတွက်တော့ အခုကိစ္စက ထိုးနှက်ချက် တစ်ခုလို့ ဆိုနိုင်ပါတယ်။ ပြီးခဲ့တဲ့ နှစ်ပိုင်းတွေအတွင်း တောင်တရုတ်ပင်လယ် ရေပြင်မှာ တရုတ်နဲ့ ဖိလစ်ပိုင် ရေတပ်တွေကြား ပွတ်တိုက်မှု ပဋိပက္ခတွေက သိသိသာသာ မြင့်တက်လာနေခဲ့ပါတယ်။
စက်တင်ဘာ ၉ ရက်နေ့မှာတော့ အမေရိကန် နိုင်င့ဆိုင်ရာ ဖိလစ်ပိုင် သံအမတ်ကြီး ဟိုဆေး မန်နျူရယ်လ် ရာမီရက်ဇ်က အဆင့်မြှင့်တင်ထားတဲ့ F-16 အပေါ့စား တိုက်လေယာဉ်တွေကို အမေရိကန်ဆီက ဝယ်ယူမယ့် ကိစ္စဟာ လောလောဆယ် မရေမရာ ဖြစ်လာနေတယ်လို့ ပြောကြားခဲ့ပါတယ်။
လက်ရှိ အခြေအနေမှာတော့ အဲဒီ သဘောတူညီမှုကို ယာယီ ဆိုင်းငံ့ထားရမယ့်ပုံ ပေါ်ကြောင်း၊ အဓိက ပြဿနာက ဘဏ္ဍာရေး ကိစ္စဖြစ်ကြောင်း သူက ဆိုပါတယ်။
Public Service Announcement
အမေရိကန် ကာကွယ်ရေး ဝန်ကြီးဌာနဟာ ဖိလစ်ပိုင်ဆီ ဒေါ်လာ ၅.၆ ဘီလီယံဖိုးလောက် တိုက်လေယာဉ်တွေနဲ့ အပိုပစ္စည်းတွေ ရောင်းချရေး ကိစ္စကို သဘောတူထားပြီးပါပြီ။ ဒါပေမဲ့ လက်ရှိ အခြေအနေအရ ဖိလစ်ပိုင်က အဲဒီ ဝယ်ယူမှုကို ရှေ့မဆက်နိုင်ဘဲ ဖြစ်နေတဲ့ သဘောပါ။
စစ်ရေး အဆင့်မြှင့်တင် မွမ်းမံမှုတွေအတွက် လိုအပ်တဲ့ အသုံးစရိတ်ကို ဘယ်လို နည်းတွေနဲ့ ရှာဖွေ ဖြည့်တင်းနိုင်မလဲ ဆိုတာကို ဆက်ပြီး စောင့်ကြည့်ရမယ်လို့ ရာမီရက်ဇ်က မှတ်ချက်ပေးသွားပါတယ်။
ဖိလစ်ပိုင်ဟာ တောင်ကိုရီးယားလုပ် FA-50 တိုက်လေယာဉ် ၁၂ စီးကို ဒေါ်လာ ၇၀၃ သန်းနဲ့ မှာယူမယ့် သဘောတူ စာချုပ်တစ်ရပ်ကိုလည်း ဇွန်လတုန်းက လက်မှတ်ရေးထိုးခဲ့ပြီး ဖြစ်ပါတယ်။
ကိုးကား: Reuters
