ဩဂုတ်-၃၀၊ ၂၀၂၅/People’s Spring
ရှမ်းပြည်နယ်မြောက်ပိုင်း၊ကျောက်မဲမြို့နယ်ရှိ မိုင်းလုံမြို့ကို စစ်ကောင်စီက လေကြောင်းမှ ဗုံးများကြဲတိုက်ခိုက်ရာ သီလရှင် တပါးနဲ့ အမျိုးသမီး တဦး သေဆုံးခဲ့ပြီး သံဃာတော် (၂)ပါး၊ ကိုရင်(၃)ပါးနဲ့ အမျိုးသား တဦးတို့ ထိမှန်ဒဏ်ရာရခဲ့တယ်လို့ တအာင်းတပ်မတော်(TNLA)က ထုတ်ပြန်ပါတယ်။
စစ်ကောင်စီဟာ မနေ့ ည ၁၀နာရီခွဲအချိန်မှာ တိုက်ပွဲဖြစ်ပွားခြင်းမရှိဘဲ မိုင်းလုံမြို့၊ ပန်သပြေကျေးရွာအတွင်း ပေါင် (၂၅၀)ဗုံး လေးလုံး လာရောက်ကြဲချတိုက်ခိုက်ခဲ့တာလို့ ဆိုပါတယ်။
ဗုံးကျရောက်ပေါက်ကွဲမှုကြောင့် သီလရှင်၊ သံဃာတော်နဲ့ ပြည်သူတွေ သေဆုံးထိခိုက်ဒဏ်ရာရရှိခဲ့ပြီး နေအိမ် (၄)လုံး၊ ကျောင်းဆောင် ၅ဆောင်နှင့် ဓမ္မာရုံ တရုံတို့ ထိခိုက်ပျက်စီးသွားခဲ့တယ်လို့လည်း TNLAက ထုတ်ပြန်ပါတယ်။
Public Service Announcement
ပြီးခဲ့သည့် ဩဂုတ် ၂၆ရက်ကလည်း မိုးကုတ်မြို့နယ်ကို စစ်ကောင်စီက တိုက်ပွဲဖြစ်ပွားခြင်းမရှိဘဲ လေကြောင်းကနေ ပေါင်(၂၅၀)ဗုံး နှစ်လုံး လာရောက်ကြဲချတိုက်ခိုက်ခဲ့ပါတယ်။
ပြည်သူများအနေနဲ့ စစ်ကောင်စီရဲ့ ဗုံးကြဲတိုက်ခိုက်မှုတွေ ရှောင်ရှားနိုင်ဖို့ စစ်ရေးသတိအမြဲရှိရန်လိုအပ်ပြီး လေကြောင်းရန်က ကာကွယ်နိုင်ဖို့ လေကြောင်းရန်ကာကွယ်ရေးဆိုင်ရာနည်းလမ်းတွေ လိုက်နာဆောင်ရွက်ဖို့ လိုအပ်တယ်လို့လည်း TNLAက ထုတ်ပြန်ထားပါတယ်။
