ယီမင်အခြေစိုက် ဟိုသီပြောက်ကျားတွေ ခန့်အပ်ထားတဲ့ ဝန်ကြီးချုပ် အပါအဝင် အစိုးရ တစ်ဖွဲ့လုံး အစ္စရေး လေကြောင်းတိုက်ခိုက်မှုကြောင့် သေဆုံးသွားကြောင်း သတင်းတွေ ထွက်ပေါ်နေပါတယ်။
အစ္စရေး စစ်တပ် (IDF)က ဩဂုတ် ၂၈ ရက်နေ့တုန်းက ယီမင်ရဲ့ မြို့တော် ဆာနားမှာ လုပ်ဆောင်ခဲ့တဲ့ လေကြောင်း တိုက်ခိုက်မှုအတွင်း ဟိုသီဝန်ကြီးချုပ် အာမက် အယ်လ်ရာဟာဝီ အပါအဝင် အစိုးရ အဖွဲ့ဝင်တွေ သေဆုံးသွားတယ်ဆိုတဲ့ သတင်းတွေကို ဆန်းစစ်နေဆဲလို့ ပြောပါတယ်။
ယီမင်မှာ နိုင်ငံတကာက အသိအမှတ် ပြုထားတဲ့ အစိုးရနဲ့ ဆာနားအပါအဝင် နိုင်ငံရဲ့ အစိတ်အပိုင်း အများစုကို ထိန်းချုပ်ထားရာ ဟိုသီတွေက ဖွဲ့စည်းထားတဲ့ အစိုးရဆိုပြီး ပြိုင်ဘက် အစုအဖွဲ့ နှစ်ခု ရှိနေပါတယ်။ ဟိုသီတွေဟာ အစ္စရေးရဲ့ ကမ္ဘာ့ရန် အီရန် အစိုးရက ကျောထောက်နောက်ခံ ပေးထားတဲ့ လက်နက်ကိုင် အင်အားစု တစ်ခုပါ။
ဩဂုတ် ၂၈ ရက်နေ့တုန်းက အစ္စရေးရဲ့ လေကြောင်းတိုက်ခိုက်မှုဟာ ယီမင် ကာကွယ်ရေး ဝန်ကြီးအပါအဝင် ထိပ်ပိုင်း အစိုးရ ခေါင်းဆောင်တွေကို ပစ်မှတ်ထားခဲ့တာလို့ ဆိုပါတယ်။ အဲဒီ တိုက်ခိုက်မှုမှာ ဟိုသီဝန်ကြီးချုပ် အယ်လ်ရာဟာဝီပါ သေဆုံးသွားကြောင်း အစ္စရေးနဲ့ ယီမင်မီဒီယာ တချို့က ဖော်ပြခဲ့ပါတယ်။
Public Service Announcement
အစ္စရေး အစိုးရ အရာရှိ တချို့ကလည်း လေကြောင်း တိုက်ခိုက်မှုအတွင်း ဟိုသီ ကာကွယ်ရေးဝန်ကြီး မိုဟာမက် အယ်လ်အတီဖီ၊ စစ်ဦးစီး အရာရှိချုပ် မူဟာမက် အက်ဘ်ဒ် အယ်လ်ကာရင်မ် အယ်လ်ဂါမာရီတို့လို ထိပ်တန်း ဟိုသီ အာဏာပိုင်တွေ သေဆုံးခဲ့တယ်လို့ ယုံကြည်ရကြောင်း ပြောပါတယ်။
အစ္စရေးရဲ့ လေကြောင်းတိုက်ခိုက်မှုဟာ ဆာနားမြို့ အပြင်ဖက်မှာ သိုသိုသိပ်သိပ် ကျင်းပခဲ့တဲ့ အစိုးရအဖွဲ့ အစည်းအဝေး တစ်ခုကို ပစ်မှတ်ထားခဲ့တာ ဖြစ်ပါတယ်။ အယ်လ်ဂါမာရီဟာ အရင်တစ်ကြိမ် အစ္စရေး တိုက်ခိုက်မှုမှာလည်း ဒဏ်ရာရခဲ့ဖူးပါတယ်။
ဟိုသီတွေရဲ့ ခေါင်းဆောင် အက်ဘ်ဒူလ် မာလစ်ခ် အယ်လ်ဟိုသီက မိန့်ခွန်းပြောမယ့် အစီအစဉ် မတိုင်ခင်မှာ အစ္စရေးရဲ့ လေကြောင်းတိုက်ခိုက်မှု ဖြစ်ပွားခဲ့တာပါ။ အယ်လ်ဟိုသီ ကိုယ်တိုင်ကတော့ အဲဒီပစ်မှတ်နေရာမှာ ရှိမနေခဲ့ဘူးလို့ သိရပါတယ်။
အစ္စရေး စစ်တပ် အကြီးအကဲ ဗိုလ်ချုပ်ကြီး အီယဲလ်ဇာမားက အဲဒီတိုက်ခိုက်မှုကို ဝန်ကြီးချုပ် ဘင်ဂျမင် နေတန်ညာဟုက ကာကွယ်ရေးဝန်ကြီး အစ္စရေးကတ်ဇ်ဆီ တိုက်ရိုက် အမိန့်ပေး ညွှန်ကြားခဲ့တာ ဖြစ်တယ်လို့ ပြောကြားသွားပါတယ်။
ဟိုသီတွေ အနေနဲ့ အစ္စရေးကို ရန်စတဲ့ လုပ်ရပ်တိုင်းအတွက် ကြီးမားပြင်းထန်တဲ့ အကျိုးဆက်တွေ ကြုံရမယ်ဆိုတာ နားလည်သင့်နေပြီလို့လည်း ဇာမားက ခြိမ်းခြောက်သွားပါတယ်။ ဟိုသီတွေဟာ အစ္စရေး ပိုင်နက်ထဲကို ဒရုန်းတွေ၊ ဒုံးကျည်တွေနဲ့ ပစ်ခတ်တာတွေ လုပ်လေ့ရှိပြီး အစ္စရေးကလည်း လေကြောင်းတိုက်ခိုက်မှုတွေနဲ့ တုံ့ပြန်ခဲ့ပါတယ်။
ကိုးကား: Euro News
